Le Bengidi ba Mingilo Badi na Mwingilo’ka?

Bible utela bibumbo bibidi bya bana-balume bene Kidishitu ba kusela bisela mu kipwilo—“batadi ne bengidi ba mingilo.” (Fidipai 1:1) Divule, kudi bakulumpe ne bengidi ba mingilo palapala bengila mu kipwilo ne kipwilo. Le i mwingilo’ka wingila bengidi ba mingilo mwanda wa kamweno ketu?

Bakwashanga kitango kya bakulumpe. Bengidi ba mingilo i bantu baswele bintu bya ku mushipiditu, kadi i bantu bakulupilwa, bengila na mutyima umo, bamo i bankasampe, bakwabo nabo i batame. Bavuijanga mingilo ya mvubu, divule i mingilo ya kuteakanya bintu ne ya makasa ingilwanga pa kipwilo. Kino kilengejanga bakulumpe nabo bate mutyima ku mingilo ya kufundija ne ya bukumbi.

Bakwashanga ku mingilo ya mvubu. Bengidi ba mingilo bamo i bapebwe mwingilo wa kutundaila boba bonso bāya ku kupwila. Bakwabo bengilanga ku binanda, ku kwabanya mabuku, ku lubalo lwa kipwilo, ne ku mwingilo wa kupa banabetu mu kipwilo myaba ya kusapula’mo. Kadi bakwashanga ne ku kulongolola Njibo ya Bulopwe. Bakulumpe babwanya kwibalomba bakakwashe boba ke banunu. Nansha shi mwingidi wa mingilo wapebwa mwingilo’ka, wingilanga’o na mutyima tō ne kino kilengejanga bonso bebalēmeke.—1 Temote 3:13.

Bashilanga banababo kimfwa kiyampe. Bengidi ba mingilo batoñwanga pa mwanda wa ngikadila yabo milumbuluke ya bwine Kidishitu. Bakankamikanga lwitabijo lwetu kitatyi kyobapityija bipindi ku kupwila. Baningijanga bupyasakane bwetu kitatyi kyobatangidila mu mwingilo wa kusapula. Byobadi na mutyima wa kwingidila pamo na bakulumpe, betulengejanga twikale na nsangaji ne bumo. (Efisesa 4:16) Mwenda mafuku, nabo bakokeja kubwanya bisakibwa bya kwingila bu bakulumpe.

• Le bengidi ba mingilo i bantu ba muswelo’ka?

• Le bengidi ba mingilo bakwashanga namani kipwilo kingile biyampe?