Bengidi ba Mingilo Bengilanga Mwingilo wa Mvubu
1 “I bana-balume bepāne byabinebine. Kadi badi na lwitabijo lukomo, bengila mwingilo wa Bulopwe na bupyasakane, bakwasha bakwabo nabo bekale bakomo mu lwitabijo.” Mo munenena dibuku Huduma Yetu, pa paje 57, pa mwanda utala bengidi ba mingilo. I bine, kifwa kya kumushipiditu kiletanga bengidi ba mingilo i kiyampe kwiula. Kwingidila nabo pamo ne na bakulumpe ‘kutamijanga umbidi mwa kwiūbakila’o ao mwine mu buswe.’—Ef. 4:16.
2 Bengidi ba mingilo bengilanga mwingilo mukatampe mu kipwilo. Langa’po bidi ino mingilo ya mvubu yobengila: lubalo, mabuku, mapepala, maabonema, ne myaba; batundaila bāya, bengila ku binanda, ne kukundula Njibo ya Bulopwe. Bapityija bipindi ku Masomo a Mwingilo wa Kiteokratike ne ku Kupwila kwa Mingilo. Bamo banena ne bishinte bya bantu bonso nansha kwendeja kupwila kumokumo kwa pa kipwilo. Bine, bengidi ba mingilo bengilanga mingilo ya mvubu kotudi, pamo’nka bwa bipindi bya umbidi.—1 Kod. 12:12-26.
3 Kumona kumonwanga bengidi ba mingilo bengidila pamo senene na bakulumpe, bu umbidi umo, belēmeka ne kwiumvwañana biyampe abo bonso, kukankamikanga mpata ba pa kipwilo bonso nabo balongele monka. (Kol. 2:19) Kuvuija kobavuijanga biselwa byabo na kikōkeji yenga ne yenga, ne kuta kobatele mutyima bininge ku bakwabo, kukwashanga kipwilo kyendelele kumeso kumushipiditu.
4 Lelo i kika kyotukokeja kulonga kilombola’mba tutendelanga bengidi ba mingilo baputuma na mingilo? Kitulomba kupotolola mingilo ibapelwe ne kwikala na mutyima wa kwingidila nabo pamo ponso palomba kwibakwasha. Tulombolei mu binenwa ne mu bilongwa byetu amba tutendelanga mwingilo obengila. (Nk. 15:23) Bine, tufwaninwe kufwija’ko boba bonso baputuma na mingilo pa mwanda wetu.—1 Tes. 5:12, 13.
5 Kinenwa kya Leza i kilombole mwingilo ne bisakibwa bya bengidi ba mingilo. (1 Tem. 3:8-10, 12, 13) Mwingilo ukola obengila udi na kamweno kakatampe mu bwendeji bwa kipwilo. O mwanda tufwaninwe nyeke kukankamika bano bana-balume, ke-pantu abo bonso ‘i bavudilwe bya kulonga mu mwingilo wa Mfumwetu.’—1 Kod. 15:58.