KIFUNDWA 25

Mobo a Bulopwe—Obakwanga Namani ne Mwanda Waka?

Bobaki ba kwilanga bobaka Njibo ya Bulopwe mu Bolivi — Bolivi

Njibo ya Bulopwe kumeso kwa kubakululwa’yo mu Nijeria

Njibo ya Bulopwe pa kupwa kubakululwa’yo mu Nijeria — Nijeria, kumeso ne pa kupwa

Kifuko kyubakilwa’po Njibo ya Bulopwe mu Tahiti — Tahiti

Mungya buluji bwa dijina Njibo ya Bulopwe, bufundiji bwa mu Bible bufundijibwa’ko bwimanine pa Bulopwe bwa Leza—mutwe wa mwanda wa busapudi bwa Yesu.—Luka 8:1.

I kité kya butōtyi bwa bine mu kibundi. Mu ino njibo mo muteakanibwanga mwingilo wa kusapula myanda miyampe ya Bulopwe mu mwaba. (Mateo 24:14) Mobo a Bulopwe i meshile ku bukata ne ku mūbakilo, inoko onso i mobakwe mu muswelo upēla, ne mavule apwidilanga’mo bipwilo bivule. Mu ino myaka, twi bobake nansha kulongolola Mobo a Bulopwe tununu makumi na makumi (kubwipi kwa mobo atano difuku ne difuku) mwanda wa bipwilo byenda bivudila’ko bibwane’mo. Le twi babwanye’byo muswelo’ka?—Mateo 19:26.

Obakwanga na byabuntu bitumwa ku kité. Bino byabuntu bitumwanga ku bilo ya musambo amba lupeto’lwa lukwashe bipwilo bisakilwa Njibo ya Bulopwe ya kūbaka nansha ya kūbakulula.

Obakwanga na bantu ba kwilanga batambile ku mitamba yonso. Mu matanda mavule mudi Bisumpi bya Lūbako lwa Mobo a Bulopwe. Bengidi ne bakwashi ba kwilanga ba mu bisumpi bya lūbako bendanga kutamba pa kyoki kipwilo ke pa kyoki mu ntanda imo, enka ne kunja kwine, mwanda wa kukwasha bipwilo’bya byūbake abo Mobo a Bulopwe. Mu matanda makwabo, Batumoni ba bwino bapebwanga mwingilo wa kutala lūbako ne kulongolola Mobo a Bulopwe mu mwaba wibapelwe. Nansha bengidi bebipotolwele byobepānanga ku mingilo ya lūbako, banabetu ba pa kipwilo’pa bo bengilanga kipindi kikatampe kya mingilo. Mushipiditu wa Yehova ne bukomo bulonga bengidi bandi na muya wabo onso byo bilengeja tubwanye ino mingilo.—Ñimbo ya Mitōto 127:1; Kolose 3:23.

Mwanda waka bifuko byetu bya kutōtela’po bitwanga bu Mobo a Bulopwe?
Le tubwanyanga namani kūbaka Mobo a Bulopwe ntanda yonso?