Lūbako Lwa Mobo A Bulopwe Mu Amerika (États-Unis)

¹ Kutala mwingilo wingilwa kujokoloka ntanda yonso, i kintu kikankamika bininge, pa kumona kwilundila’ko kudi pano mu bulongolodi bwa Yehova bwa pano panshi. Mwaka wapityile’u, bipwilo 246 byaikele kushimikwa mu Amerika, kadi kujokoloka ntanda yonso kwabundilwe bipwilo 3 288. Na kuno kwilundila’ko, ke kya kutulumukapo shi kudi kusakibwa kukatampe kwa Mobo a Bulopwe.

² Batutu ne bakaka bavule i balombole bupyasakane bukatampe kadi i bakwatakanye bulongolodi bwa Yehova na kupāna ku kusaka kwabo, kitatyi kyabo ne lupeto lwabo mwanda wa kūbaka Mobo a Bulopwe. Komite ne komite, mu makomite 75 emanine lūbako mu mwaba wa Amerika, wimanine bipwilo 140 bya mu mwaba wapelwe. Mwaka ne mwaka, kūbakwanga kubwipi kwa Mobo a Bulopwe 200, kadi kulongololwa makwabo 200. Kiselwa kya ino mpangiko yonso kidi pa mutwe wa makomite a mu myaba, kadi mwingilo oengila utendelwanga mpata. Bintu byonso bitala lūbako lwa Mobo a Bulopwe byendejibwa’nka na mushipiditu wa bwine Kidishitu, wa kupāna ne wa kwipela, mwishīle kulampe kwine na ou utadīle ino ntanda.​—⁠2 Tem. 3:​2, 4.

³ Pa kusaka amba kwikale muneñenya wa mobo, Sosiete i mupe makomite a mu myaba myubakilo imo yonka ya Mobo a Bulopwe mu Amerika, mimanine pa mapulá a B.B.K. (Bifwatulo Bilondwa mu Kompyuta). Ino mpangiko ityepejanga mafuku a mingilo ne kibalwa kya bengidi ba kwisakila kine. Kadi ipēlejanga kuleya kwa Mukōlo wa Sosiete wa Lūbako lwa Mobo a Bulopwe. Pano, bakulumpe batoñanga pa ano mapulá. Komite umo wa lūbako lwa mu mwaba wanene pa kupwa kwa kutambula kino kingidilwa kipya amba: “Twi basangale bininge, kadi kunena na bubine, twi basepelele mpata pa kutambula ano mapulá. . . . Banabetu bapotolwele mingilo ya lūbako ne bakwabo basendwe mulongo banena’mba, kwingidija ano mapulá kubetukwasha tukūle kitatyi kifika nansha ku 50 kutūla ku 60 pa katwa. Kadi ino myūbakilo iketupāna muswelo wa kukala ñeni mikwatañane ne mishikate itala pa Mobo a Bulopwe.” Bipwilo bisakilwa kwikala na mushipiditu muyampe wa kwingidila netu umbumo, na kwela kuboko ku uno mwingilo wa kuneñenya Mobo a Bulopwe, mwanda tusangela kiselwa kya kwipāna kidi na bōbaki, na basendwe, ne na boba bonso badi na bengidi betwangulanga’ko ku kiswamutyima kyabo kikale kupēlejibwa byabinebine.

⁴ Bengidi Bakwisakila Bakwatakanyanga Mwingilo Mulumbuluke: Sosiete ufwijanga’ko bikatampe bengidi bakwisakila bengila mwingilo wa lūbako lwa Mobo a Bulopwe. I kinengele’po kashāa pa kumona bantu tununu makumi bepāna mu bintu byonso bidi mu mwingilo wa lūbako. Kutubuluka kwa ino mpangiko ya lūbako kutamba ku mushipiditu wa kwisakila, wa buntu ne wa kwingidila pamo ulombolwa na bano bantu bengila ku bitupu na kupāna kitatyi kyabo kyobadi bakokeja kupityija nansha mu kulonga bintu bikwabo mu kipwilo kyabo nansha mu bisaka byabo. (Mit. 110:3; Kol. 3:23) Bantu badi na mutyima wa buswe namino bafwaninwe kupebwa luñanyañanya, kufwijibwa’ko ne kukwatakanibwa pampikwa kwikaka.​—⁠Loma 12:10; Bah. 13:⁠1.

⁵ Boba bonso bayukile busendwe, babwanya kukwasha kitatyi ne kitatyi makomite a lūbako lwa mu mwaba, i balombwe kudinga fomu wa Lūbako lwa Mobo a Bulopwe​—⁠Bipangujo ku Bengidi ba Kwisakila (S-82). Kipwilo kyo akyo kikatuma ano mafomu ku komite wa mu mwaba wenu mwanda wa kumuyukija ngikadilo ya bengidi bakwisakila ne i kitatyi’ka kyobakāya kutanwa’ko. Ino, shi mwikadilo wa mwingidi wa kwisakila ubālamuka, kimfwa shi waviluka nansha padi watongwe bu mwingidi wa mingilo nansha bu mukulumpe, kikamulomba kudinga fomu ungi bukidibukidi, ukatumwa na mulembi wa pa kipwilo. Shi kampanda’wa kakibwenyepo bisakibwa bilombelwe, bakulumpe bafwaninwe ponka na ponka kuyukija komite wa mu mwaba kupityila ku mukanda. Shi musakile kutambula mafomu mavule a bipangujo, mukokeja kulomba’o na kudinga fomu wa Kulomba kwa Mabuku utumwanga ku kweji ne kweji. Mutadi wa kipindi nandi ufwaninwe kuyuka mulongo wa majina a bantu balombele kwikala bengidi ba kwisakila mu uno mwingilo ukola. Ko kunena amba, nandi ukabandaula uno papye wa bipangujo bya bengidi ba kwisakila lwendo lonso lwapempula kipwilo.

⁶ Tutyepejei’ko Lupeto Lujimina Pangala pa Lūbako: Makomite a lūbako lwa mu myaba i mapebwe madingi a kulongolola mwingilo wa kupota bintu, uno mwingilo ukendejibwa na mukulumpe mubwanye bisakibwa. Banabetu babundile uno mwingilo bafwaninwe kukonkotola kokwa konso kusumbijibwa bya lūbako na lupoto luyampe, ne kudingakanya bei mishileshile mwanda wa kunyemena kokwa kudi buseba butūke. Mu uno muswelo, bakayuka i ku bāni kobafwaninwe kupota bintu ne i bingidilwa’ka bifwaninwe kupotwa. Pakwabo, kitatyi kikikatwakatwa na kukala ñeni ya Njibo ya Bulopwe, banabetu babwenye bisakibwa pa kipwilo bakokeja kukwasha’ko boba bengila uno mwingilo.

⁷ Mwanda wa kuyuka shi lupeto luleibwanga senene, mulupu onso wa lupeto lutala pa lūbako ufwaninwe kwitabijibwa bidi na komite wa lūbako lwa mu mwaba, uno komite ye yenka ukashinya dyabubidi pa masheke nansha pa mafakitile onso. Shi mpangiko ya kūbaka Njibo ya Bulopwe nansha kwiilongolola ilomba kukwashibwa na bengidi bakwisakila ba mu bipwilo bikwabo kutalula’mo boba bakapwidila mu mine njibo’ya, komite wa mu mwaba ukatwikwa kino kiselwa kya kutala ino mpangiko.

⁸ Yewa yense udi na bengidi ukimba kushinya kontala ya kwingila ku mwingilo wa Njibo ya Bulopwe ufwaninwe bidi kulombola mikanda ya Leta mishinye amba binebine i bengidi bandi, i kiselwa kyandi kyaetwikile, na kwitabija amba i mushinye kontala ya kwingidila pamo na kipwilo ne amba nansha kubebatambila kīka kampanda, i mutalule kipwilo mu mambo.

⁹ Bukwashi Butumwa ku Misambo Mikwabo: Misambo mikwabo ikalanga ilomba bukwashi ku makomite a lūbako a mu mwaba wa Amerika. Kikalanga divule uno muswelo shi kubaikala kulongololwa kwa bintu byonekele na kimpengele nansha shi ba mu komite wa lūbako wa mu mwaba’wa basaka bebafundijije mwabo. Pa kino, banabetu baselele kiselwa mu uno mwingilo, betabije kwenda ku lupeto lwabo mu matanda a bweni mwanda wa kukakwasha bakwabo, balombolanga bukamoni bulumbuluke bwa buswe. Shi kulomba kwalombwa na musambo kampanda kubaitabijibwa, Sosiete uketa komite umo wa mu mwaba, umweka bu wambulwa kulēmenenwa na mpangiko ya lūbako mu mene mafuku’a. Namino bintu byonso bikekala bilongololwe senene.

¹⁰ Tufwaninwe kuleya mukōlo otudi nao na tunangu mpata, mwanda bipwilo bisakilwa Mobo a Bulopwe mu matanda makwabo byenda bilundila’ko. Mukanda wa mafuku 15 kweji 6, 1995, watuminwe ku bipwilo byonso bya mu Amerika, wetukankamikile kuleya lupeto luvule lwa kūbaka nalo nansha kulongolola nalo mobo. Uno mukanda beusangedile mpata. Omwanda, monka mwekilombwedile Mwingilo Wetu wa Bulopwe wa kweji 3, 1997 walupwilwe mu Amerika, kipindi kimo kya Mukōlo wa Sosiete wa Lūbako lwa Mobo a Bulopwe i kibikilwe pano bipwilo bikimba kwapula, bidi mu matanda amoamo mukisakilwa mobo mavulevule, ino nabyo i byobya bidi na misokwe mityetye, bidi na makambakano a kusokola lupeto.

¹¹ Annuaire 1997 i mukokele milangwe pa mvubu ya kwikala na mobo mavule mu matanda amoamo. Kimfwa mu Ukraine, kutūla ne pano baūbakile’mo Mobo a Bulopwe 47, kadi bakyūbakila’ko makwabo 56. I kimweke patōka amba mu ano matanda mukisakilwa kūbaka mobo mavule. Kino kyo kilombolwa na lapolo umo amba: “Mu Rusia, mukisakilwa mobo mavule. Kibalwa kya Batumoni kyenda kilundila’ko bukidibukidi, ino bipwilo kubwipi kwa 85 pa katwa bimaninwe na musambo wa Rusia kebidipo na bifuko byabo bya lonso bya kupwidila’mo. Mu Zimbabwe, mudi bipwilo 800, bivule mu bukata mwabyo bipwidilanga panja. Pa kino, bapya bamobamo basangela musapu beshisanga kukatanwa ku kupwila.” Ngikadila ya uno muswelo itanwa ne mu Bulaya bwa Kutunduka, mu Afrika ne mu Amerika Latine.

¹² Bine mu ano mafuku a ku mfulo, buswe bwa bantu bavule bwendanga butalala, ino boba babundile muzo wa bantu ba Leza bendelelanga nyeke na kwilombola buswe abo bonso, buswe kebuyukile kubanga mikalo ya tubila nansha ya matanda mine. (Mat. 24:12) Twendelelei na kwiula Tata wetu wamūlu, mu kulombola buswe bwa uno muswelo bwa kukwatakanya na mutyima tō lūbako lwa Mobo a Bulopwe, mu Amerika ne mu matanda makwabo! Shi tulonge namino, Yehova uketutōkelwa pa mutyima, ne kadi uketwesela madyese a ntanda ne miseke.​—⁠Mal. 3:10; Bah. 6:⁠10.

¹ Mobo a Bulopwe i kisakibwa kikatampe kujokoloka ntanda yonso. Mu bula bwa mwaka wa mingilo wa 1996, kwashimikilwe bipwilo 3 288 ne kupita, bivule bine byashimikilwe mu Afrika, mu Amerika wa pa bukata, mu Amerika wa Kunshi, mu Azia ne mu Bulaya bwa Kutunduka.

² Manimelo a Mwingilo Wetu wa Bulopwe alupwilwe mu mafuku a kunyuma alombwele kwendelela kumeso kwa lūbako lwa Mobo a Bulopwe mu matanda mavule. Inoko, malapolo alombola amba kudi Njibo ya Bulopwe imo kete mu ntanda idi na bipwilo 568. Mu ntanda mikwabo, bapikwile batana Njibo ya Bulopwe imo ku bipwilo 129. Kukwabo nako, kudingakanya kwa mobo ne bipwilo kwalombwele amba njibo imo idi na bipwilo 41. Mu matanda mavule makwabo mudi bipwilo 1 000 ne kupita, ino pa kūbaka’mo nansha’tu Njibo imo ya Bulopwe i kikomo, pamwanda wa makambakano a lupeto. Mwingilo mukatampe ke muvuijibwe kala, ino kukishele bintu bivule bya kulonga. Tukulupile binebine amba banabetu bavule ba mu Amerika (États-Unis) basaka kukwasha’ko bipwilo bya mu matanda a bweni bibudilwe Mobo a Bulopwe mafwaninwe.

³ Uno mulangwe i mukwatañane na 2 Kodinda 8:​14, unena’mba: “I kudingakenya pamo ponka’mba, kuvudilwa kwenu kwa uno mwaka uno’u kufikile pamo mukubulwa’byo mwabo.” Mu matanda makwabo ke mutūlwe kala Mukōlo wa Lūbako lwa Mobo a Bulopwe, ino ngikadilo ya lupeto keipepo banabetu muswelo wa kūbaka mobo mungya bisakibwa byobadi nabyo. Ino, na bukwashi bwa banabetu ba mu matanda makwabo, Sosiete waikele kwela kuboko ku lūbako lwa Mobo a Bulopwe 413 ne kulongolweja makwabo 727 kubwipi kwa mu matanda 75 meshileshile, umbula bwa makweji aná kete. Balomba bukwashi byobadi nyeke bavule, kifwaninwe nanshi kutapula mu Mukōlo wetu wa Lūbako lwa Mobo a Bulopwe mwanda wa kukwatakanya lūbako mu matanda makwabo. Pano twendelelanga na kwapwija lupeto lwa lūbako lwa mobo asakibwa mu Amerika, shi bino bisakibwa bivuijibwe ne shi lupeto lwikele monka, nankyo tukendelela na kwingidija mukōlo wetu mwanda wa kukwasha bipwilo bya mu matanda makwabo. Tudi na nsangaji mikatampe ya kukwasha ku lūbako lwa Mobo a Bulopwe mavule kujokoloka ntanda yonso pamwanda wa ntumbo ya Yehova.​—⁠Mit. 102:16; Hak. 1:​7, 8.

[Binenwa bya Kifwatulo pa paje 4]

Kapango pa paje 4]

Lūbako Lwa Mobo A Bulopwe Kujokoloka Ntanda Yonso