Ngubako Yūbakwa mu Musambo Wetu—Kipindi kya Mvubu mu Mwingilo Ukola
1. I bika byoketudi balonge mu lūbako lwa Mobo a Bulopwe ne mu ngubako mikwabo mu musambo wetu, ino i bika bikishele’ko?
1 Mu myaka itano ishele kunyuma, twaūbakile ne kulongolola Mobo a Bulopwe 564 mu mwaba wa musambo wetu. Bine, tufwija’ko bininge batutu ne bakaka ba mu bipwilo ne bengidi ba kitatyi kyonso batuminwe na musambo bengile uno mwingilo. Twi bengile mwingilo mukatampe mpata, ino kadi kukishele bivule bya kulonga mwanda kukidi Mobo a Bulopwe a kūbaka ne ngubako mikwabo kimfwa ya Mobo a Kubungakena’mo mu Limete, Kinshasa; mu Kisangani, Province Orientale; ne mu Brazzaville, République du Congo. Lelo i muswelo’ka otukakwatakanya batwe bonso kino kipindi kya mvubu mu mwingilo wetu ukola otwingidila Yehova?—Kus. 7:15.
2. Le i muswelo’ka otukokeja batwe bene kukwasha ku mingilo ya lūbako ingilwa mu musambo wetu?
2 Ikala na Mutyima wa Kukwasha: Shi wi musapudi mubatyijibwe, tukulomba nobe wikale na mutyima wa kukwasha mu ino ngubako palapala, kutabukidila kitatyi kyūbakwa nansha kilongololwa Njibo yenu ya Bulopwe. (Mit. 110:3) Boba baketabija kwingila bafwaninwe kwikala bengidi badi na mutyima wa kukwasha ne wa kwingidila pamo na bakwabo. (Mit. 133:1; Ef. 4:16) Ukokeja kukwasha senene ku ino ngubako nansha shi kudipo na bwino mu myanda ya lūbako. Ne kadi kukabulwepo kwifundila’ko bwino bukakukwasha wingidijibwe bininge kungya-meso.
3. I miswelo’ka mikwabo yotukokeja kwela kuboko ku ino mpangiko ya lūbako?
3 Nansha shi kubwanyapo kwiya kwingila’ko, ukokeja kwela’ko kuboko na kukankamika boba bengila. Ukokeja kwingila mingilo ya mu kipwilo yadi ipelwe boba bakengile ku lūbako. Bakulumpe nabo bakabadikila kuteakanya bintu mwanda wa kipwilo kyendelele biyampe nansha byendele bamo ku lūbako lwa Njibo ya Bulopwe nansha ku ngubako mikwabo. Na bubine, Yehova uloelelwanga potwingidila umbumo mwanda wa kwendeleja kumeso tumweno twa Bulopwe.—Bah. 13:16.
4. Tukokeja kukankamika namani boba bengila mu ino ngubako palapala?
4 Kankamika Bakwenu: Kūbaka bifuko bya kutōtela’po ne mobo makwabo a mingilo ya Bulopwe kulomba kitatyi ne mingilo mikomo. Kunena na bubine, boba betwa kukwasha ku ino ngubako bashiyanga kyaba kimo bipwilo byabo mu bula bwa mafuku. Twikalei nanshi na kampeja-bukidi ka kufwija’ko ne kukankamika bano banabetu bepāna ne kujimija bivule pangala pa “īno mīngilo” ya mvubu.—Bil. 6:3; Loma 14:19.
5. Boba bengila mu ino ngubako bakekala na bujalale namani?
5 Ikala na Bujalale: Kiselwa kibajinji mu mingilo ya butōtyi bwetu i kusapula Bulopwe bwa Leza. (Mako 13:10) Mabilo a lūbako ayukile kino, o mwanda akwatanga mpangiko miyampe ya lūbako kutyina amba boba bāya kwingila bakashiya bipwilo byabo mwanda ke mwanda. Nanshi boba betabija kwingila nabo bafwaninwe kwikala na bujalale pobavuija biselwa byabo bivulevule. Bakakwata mpangiko ya kukimba muntu wa kwingila mingilo yobapelwe pa kipwilo mu kitatyi kyokebakekala’kopo. Boba batongelwe bu bapania bafwaninwe kuta mutyima bininge ku kiselwa kyabo: ke mwingilo wa kusapula kitatyi kyonso kadi. Koku nako kadi bakokeja kwingila pamo na bakwabo na kwipāna mu bula bwa kitatyi kampanda ku ino ngubako.
6. I bika byotukalonga shi batwe bonso pa kipwilo twingidila umbumo mwanda wa kwendeleja mutōtelo wa bine kumeso?
6 Mutumibwa Polo wānene amba bantu ba mu kipwilo bengidilanga umbumo ne ‘kubaija ngitu ne kwiitamija ayo mine mu buswe.’ (Ef. 4:16) Nanshi tusaka buswe botuswele Yehova ne mutōtelo wa bine bwitutonone twingidile pamo mu kusapula myanda miyampe ne mu kukwatakanya ngubako ya Bulopwe.