Mpangiko ya Lūbako lwa Mobo a Bulopwe Yendelela Kumeso
1 Ku Bitango bya Distrike “Bumo bwa Bulopwe” byalongelwe mu 1983 mu États-Unis, kwaletelwe musapu amba kwatūdilwe mukōlo wa pa bula wa kūbaka ne kūbakulula nao Mobo a Bulopwe mu États-Unis ne mu Kanada monso. Inoko ketwadipo tuyukile i madyese’ka adi a kukalupuka ku byobya byalwilo bityetye nabya. Tubashilula kwimwena amba binebine Mitōto 92:4 wānene byabine, amba: “Ke-wi-muntu, abe Yehova, ubantōkeja ku mutyima ne mīngilo yobe; nkatombokanga mu mīngilo ya makasa obe.”
2 Pano tudi na nsangaji bininge pa kumona mingilo ingilwa. Dyalelo ino mpangiko ya lūbako lwa Mobo a Bulopwe pano pa ntanda ponso yendanga nyeke kumeso. Batwe bonso tudi na madyese a kwela kuboko ku ino mingilo mu muswelo kampanda nansha mu muswelo kansangwa. Tukiloñanga namino potutūlanga byabuntu bya lupeto bityetye nansha bivule bipotwanga nabyo bya lūbako lwa bifuko bivulevule bya kutōtela’mo byubakwa kujokoloka ntanda yonso. Banabetu bavule bengidijanga pakubulwa nsengwa bingidilwa byabo ne kitatyi kyabo, busendwe bwabo, ne bwino bwabo mu mpangiko ya uno muswelo. Kwendeka kwa ino mpangiko kutamba ku bwendeji bwa Yehova, mwine utenga’po kuboko, ne ku madyese andi a ntanda ne miseke aesela bukomo botulonga umbumo.—Mit. 127:1.
3 Misambo mivule ilondanga kifwa kibajinjibajinji kyaletele bipwilo bya mu États-Unis. Mu Mobo a Bulopwe mu matanda mavule, mudi kasanduku mutūlanga basapudi byabuntu byabo bya Mukōlo wa Mobo a Bulopwe. Mu États-Unis, mwaletelwe mu Mwingilo Wetu wa Bulopwe wa Kweji 3, 1997 musapu wa busenduludi mu ino mpangiko. Amba: “Tamba kasha Mukōlo wa Mobo a Bulopwe ushimikwa mu 1983, banabetu batūlanga byabuntu pakubulwa nsengwa, enka namino, babwanya lupeto lwa kwapula lwa kūbaka nalo Mobo a Bulopwe. Mu États-Unis kemudi kala bipwilo 2 700 bimwenine biyampe mu ino mpangiko. Shi ino mpangiko yadi amba keidi’kopo, longa bipwilo bivule kebibwenyepo kūbaka Mobo a Bulopwe mapya nansha kulongolola oa adi asakilwa kulongololwa. Pano palomba kupēlakana bininge kwingidija mukōlo wa byabuntu, wa kwapwija bipwilo bidi mu matanda mudi bufudile bwa lupeto. Bukwashi bwenu bomukwashanga nyeke ku ino mpangiko butendelwanga mpata na Sosiete ne na bipwilo bimwenanga biyampe ku byabuntu byenu.”
4 Uno musapu lwadi lwito lwa kwela kuboko ku mpangiko yenda lubilo ya lūbako lwa Mobo a Bulopwe. Mukōlo wa Mobo a Bulopwe wadi ulomba kubaijibwa, mwa kubwaninya ne bisakibwa bya banabetu ba mu matanda makwabo, koku wendelela na kulupula lupeto lwa kwapwija lwa kūbaka nalo Mobo a Bulopwe mu États-Unis. Kishinte kimo kyalondele’po kya mu Mwingilo Wetu wa Bulopwe wa Kweji 8, 1997 kyanene amba: “Mobo a Bulopwe i kisakibwa kikatampe kujokoloka ntanda yonso. Mu bula bwa mwaka wa 1996, kwashimikilwe bipwilo 3 288 ne kupita, bivule bine byashimikilwe mu Afrika, mu Amerika wa pa Bukata, mu Amerika wa Kunshi, mu Azia ne mu Bulaya bwa Kutunduka.”
5 I bintu’ka bilupukile’ko tamba kyokya kitatyi? Dibuku Annuaire 2001 dinena’mba: “Na ino mpangiko, ke kūbakwe kala mu matanda 30 Mobo a Bulopwe 453, makwabo 727 akyubakwa. Milangwe ikokelwanga bininge pa mpangiko ya Mobo a Bulopwe a muswelo umo mu ntanda ne ntanda mungya bya lūbako bidi’mo ne myubakilo yamo. Mu Kenya bobakanga na mabwe; mu Togo na matafwadi; mu Kamerune na mabolokoshima obakanga nao bavule, ku mfulo bashinwina’o boloshitala. Mu uno muswelo, banabetu kebejangapo kuyuka bwino bwa kwingila mingilo mikatampe mu mpangiko ikwetwe mu yabo ntanda.”
6 Madyese a Yehova pa ino mpangiko i mamweke patōka mu kontina mikatampe ya Afrika. Bine, tala’po mafoto a Mobo a Bulopwe amoamo aubakilwe, ulange’po bidi muswelo wendejibwa kumeso mingilo ya Batumoni ba Yehova na luno lūbako! Bino i bimweke mu bintu bisatu—bumo bwa bu bana na bana kujokoloka ntanda, kutengwa kwa ba kibundi, ne kwilundila’ko kwa buvule bwa batanwanga ku kupwila kwa pa kipwilo. Eyo, dino dyani dya ntentekelo byodyalombola Mobo a Bulopwe aūbakwa mu Afrika, manimelo otutengele a Mwingilo Wetu wa Bulopwe akemanina pa mwendela kumeso mpangiko ya lūbako lwa Mobo a Bulopwe mu bipindi bikwabo bya ntanda.
[Bifwatulo pa paje 3]
REPUBLIQUE CENTRAFRICAINE
Bimbo, Bangui
Begoua, Bangui
[Bifwatulo pa paje 4]
Ukonga, Tanzania
[Kifwatulo pa paje 4]
Akra, Ghana
[Kifwatulo pa paje 4]
Salala, Liberia
[Kifwatulo pa paje 4]
Karoi, Zimbabwe
[Bifwatulo pa paje 4, 5]
Allada, Bénin—Njibo ya Bulopwe ya kala
Allada, Bénin—Njibo ya Bulopwe impya
[Kifwatulo pa paje 5]
Kpeme, Togo
[Kifwatulo pa paje 5]
Sokodé, Togo
[Kifwatulo pa paje 4, 5]
Fidjilose, Bénin
[Kifwatulo pa paje 6]
Lyenga, Zambia—Njibo ya Bulopwe ya kala
[Kifwatulo pa paje 6]
Lyenga, Zambia—Njibo ya Bulopwe impya
[Kifwatulo pa paje 6]
Kinshasa, Congo
[Kifwatulo pa paje 6]
Musambira, Rwanda