Mutōtelo wabine wendanga usambakana mu Bulaya bwa Kutunduka

¹ Bene Kidishitu ba mu myaka katwa imbajinji bādi basapudi ba Bulopwe bapyasakane. Bādi basangala pādi ‘pevudija bipwilo mobukila mobukila.’ (Bil. 16:⁠5) Busapudi bobādi basapula pambulwa moyo bo bwāfikije mutōtelo wabine mu Azia, mu Afrika ne mu Bulaya, bwāleta mwangulo mukatampe wa bantu betabije.

² Ne mu kino kitatyi kya ku mfulo namo monka na monka, mutōtelo wabine wendanga usambakana mu matanda a Bulaya bwa Kutunduka. Pano tumonanga kwendelela kwabinebine mu matanda motwadi bakankajibwe na imbikalo kufika ne mu myaka ya ku ngalwilo kwa 1990. Kitabu-Mwaka 1999 kilombola’mba matanda abidi a uno muswelo, Rusi ne Ukrene, onso aletele lapolo wa basapudi 100 000 ne musubu batambila mu mwingilo wa patōkelela. Mu myaba 15 italwa na URSS wa kala, tamba mu 1991 bantu 220 000 ne bya pangala bepēne kudi Yehova, babatyijibwa ne kubatyijibwa! Kuno kwilundila’ko kwa bukidibukidi kwalombele mwingilo wa kūbaka Mobo mavule a Bulopwe ne Mobo a Kubungakena’mo mapya, ne kubaija mobo amoamo a musambo.

³ Pamo na motwekivwanine kala mu Mwingilo Wetu wa Bulopwe wa Kweji 9, 1997, kipindi kampanda kya Mukōlo wa Sosiete wa Lūbako lwa Mobo a Bulopwe pano kyapulwanga na bipwilo bya mu matanda musakilwa Mobo a Bulopwe mavulevule, amo’ko mudi bulanda ne kupumbwa kwa lupeto kubikubi. Tamba mu Kweji 3, 1996 kufika mu Kweji 10, 1998, Sosiete waitabije kwapwija lupeto lwa kūbaka nalo Mobo a Bulopwe 359 lwalombelwe na mīsambo itala mwingilo wa mu matanda 11 a mu Bulaya bwa Kutunduka. Mukōlo wa lupeto lutūlwa byabuntu o upotwa nao manza ne bintu bya kūbaka nabyo Mobo a Bulopwe mapya ne kukwasha bipwilo byubakulula mobo obidi nao. Mafoto alombwelwe pano etupa mulangwe wa kuyuka Mukōlo wa Sosiete wa Lūbako lwa Mobo a Bulopwe mu États-Unis ne mu matanda makwabo moukwashishanga banabetu ba mu Bulaya bwa Kutunduka.

⁴ Mu 1998, Bilgari wadi na kwilundila’ko kwa bantu 12 pa katwa, banabetu basepelele mpata pa kushitula Njibo ya Bulopwe imbajinji mu Kweji 4 mu mwine mwaka’u. Kroasi wadi na kwilundila’ko kwa bantu 4 pa katwa, pano banabetu ba mu ino ntanda bekwete’ko bobaka Mobo a Bulopwe mavule mwa kwendeleja mutōtelo utōka kumeso. Mu Hongri mwingidijibwanga kintu kya Mobo a Bulopwe 80 na bipwilo 144. Ko kunena’mba, mu bipwilo 235 bya mu ino ntanda, 61 pa katwa bidi na bifuko byabo bya kutōtela’mo. Mu Masedonya mwapwile kūbakwa Mobo a Bulopwe abidi, mavule makwabo akyubakwa. Mu bushipo bwa uno mwaka wa 1999, mwapwile kūbakwa Njibo ya Bulopwe imo myabanibwe pabidi mu Skopje, mwipata. Ino njibo ikokeja kwingidijibwa na bipwilo bisamba ne kupita.

⁵ Mwaka wadi’mo, mu Rusi mwadi mubatyijibwa kintu kya bantu 260 yenga ne yenga! O mwanda musambo wa mu Rusi walongele mulongela matanda makwabo, wabunda Makomite 12 a Lūbako lwa mu Mwaba mu ntanda yonso ne bukata youtala, a kwimanina mingilo ya lūbako lwa Mobo a Bulopwe makwabo. Dya kungala kwa St. Petersburg, kūbakwanga Njibo ya Kubungakena’mo imbajinji mu mine ntanda’i, ikekala na bishikatwa 1 600. Ino njibo ikekala ne na Mobo a Bulopwe atano, imo ne imo na bishikatwa 200. Pa kusaka kuvuija bisakibwa bya banabetu ne bya bantu bavule basepelela musapu mu Ukrene, Mobo a Bulopwe 84 apwile kūbakwa, ino makwabo 80 akyūbakwa.

⁶ Kuno kwilundila’ko kudi mu Bulaya bwa Kutunduka i kusangaje mityima yetu mpata, mwene i amo? Nansha shi tudi ku kifuko’ka, shi kwepi shi kwepi, kuno kusambakana kwa mutōtelo wabine kwituvuluja amba Leza kadipo na mboloji, ne amba kutūkija kwatūkije mutyima kukaletela “kibumbo kikatampe” lupandilo. (Kus. 7:9; 2 Pet. 3:⁠9) Bine tudi na dyese dikatampe dya kulunga kuboko ku kuno kwendelela kwa bulongolodi kumushipiditu! Nkindi 28:27 witukulupija amba “yewa upana kudi mufudilwe kakabulwepo.” Mutyima wa kusaka kukwasha otudi nao o walujanga lupeto lulupwilwanga lūbako mwa ‘kwikadila mu ludingo lumo’ mu bintu bya kungitu, ino kipanga bonso muswelo wa kumona kuloelelwa kutambanga ku kupāna ne nsangaji ya pa kumona mutōtelo wabine wenda usambakana ntanda yonso.​—⁠2 Kod. 8:​14, 15; Bil. 20:⁠35.

[Binenwa bya Kifwatulo pa paje 3]

[Pictures on page 3]

Sasele, Rumani

Maardu, Estoni

Sevnika, Sloveni

Tiszavasvári, Hongri

[Binenwa bya Kifwatulo pa paje 4]

[Pictures on page 4]

Jurmala, Letoni

Tauraje, Lituani

Tallinn, Estoni

[Binenwa bya Kifwatulo pa paje 5]

[Pictures on page 5]

Prievidza, Slovaki

Mátészalka, Hongri

Belgrade, Yugoslavi

[Binenwa bya Kifwatulo pa paje 6]

[Pictures on page 6]

Ruma, Yugoslavi

Vranov nad Topl’ou, Slovaki

Tornakalns, Letoni