Lūbako lwa Mobo a Bulopwe lwa Matanda mu Matanda Amo a Bulaya
1 Mu makumi a myaka ya kunyuma’i, mwingilo wa Batumoni ba Yehova wadi mukankajibwe mu matanda mavule a Bulaya, kubadila’mo ne Bulaya bwa Kutunduka. Pavule, kukankajibwa kwadi kwa kasumalomo. Byadi bikomo kwenda ku kupwila kimwesha, ne kupwidila mu Njibo ya Bulopwe kekwadipo kubwanika. Inoko mu ino myaka, “Yehova wetulongela bintu bikatakata; mo tuloelelwe.”—Mit. 126:3.
2 Tamba mu 1983, kutyinibwa kwa Batumoni ba Yehova kwashilula kutyepa. Mu 1989, matanda a Polonye ne Hongri apa Batumoni ba Yehova mukanda wa kuyukwa ku Leta. Mu 1991, Batumoni ba Yehova bapebwa mu Rusi mukanda wa kulembwa. Tamba penepa, mwingilo ubatubuluka mu Rusi ne mu matanda ādi a Inio Sovietike. Pa bukata bwa Kweji 3, 1996 ne Kweji 10, 1998, Kitango Kyendeji kyaitabije kwapwija māpu a kūbakija nao Mobo a Bulopwe 359 alombele bilo bya misambo itala matanda 11 a Bulaya.
3 Kitatyi kyotala mafoto adi pa dino dyani dya ntentekelo, languluka pa bukata ne bulumbuluke bwa bintu byalonga Yehova pa mwanda wa bantu bandi. (Mit. 136:4) Sangala pa kuyuka amba byabuntu bitūlanga banabetu kujokoloka ntanda yonso bingidijibwanga biyampe mpata, kino kilombola byānene Yesu, monka mobilembelwe mu Yoano 13:35 (NW) amba: “Pa kino po pakemuyukila bonso amba mwi bami bana ba bwanga, shi mudi na buswe umbukata mwenu banwe bene.”
4 Mu matanda a Bulaya amwena biyampe mu mpangiko ya kukwasha ku lūbako lwa Mobo a Bulopwe mu matanda adi na misokwe mityetye mubadilwa ne Rumani, mwaubakilwe Mobo a Bulopwe 36 tamba mu Kweji 7, 2000. Banabetu ba mu Ikrene baubakile’o 61 mu mwaka wa 2001 mungya mūbakilo ūbakilwe kisengele Mobo a Bulopwe abo onso, ino kitungo kyabo mu 2002 kyadi kya kūbaka’o 76. Na bukwashi bwa lupeto lutūlwa byabuntu mu Mukōlo wa Mobo a Bulopwe, ke kūbakwe Mobo a Bulopwe tutwa na tutwa mu Bilgari, mu Kroasi, mu Masedonya, mu Moldavi, mu Rusi, ne mu Serbia ne Montenegro.
5 Lūbako lwa Mobo a Bulopwe mu matanda amo kelupēlapo, kadi bilomba kulonga bukomo bukatampe mpata kumeso kwa kushilula kūbaka. Pavule kuteakanya’lo kujimijanga kitatyi kivule. Ebiya kadi, lupoto lwa bipotwa pa kūbaka Njibo ya Bulopwe mu kino kipindi kya Bulaya i lukomo mpata kupita mu bipindi bivule bya mu Afrika nansha mu Amerika wa Kunshi. Inoko, kukisakila tutwa na tutwa twa Mobo a Bulopwe mu matanda a Bulaya a misokwe mityetye, mwanda kwilundila’ko kwa kibalwa kya boba batōta Yehova i kukatampe mpata!
6 Bine, i kya kutendelwa mpata pa kumona kwilundila’ko kwa lūbako lwa ano Mobo a Bulopwe kwenda lubilo uno muswelo! Bukamoni bulumbuluke bubapānwa mu bipindi moobakwa, pamo na mulombwela myanda mimweke mivule. Mu bipindi bikwabo bya ntanda, ba lupusa ba kibundi batulumukanga bininge pa kumona mushipiditu wa kusangela kulonda bulombodi bwa lūbako.
7 Isaya wānene shandi bupolofeto bwa kwilundila’ko mu butōtyi bwabine mu kino kitatyi. Leza wānene kupityila kudi uno mupolofeto amba: “Ami Yehova nkapelakanya’byo mu bitatyi byabyo.” (Is. 60:22) I byabine, mu Bulaya bwa Kutunduka, mu myaka dikumi ya kunyuma’i byamwekelele’tu amba kino kyotwenda nakyo kyo kitatyi kyālaile Yehova kupāna kwilundila’ko. Yehova endelele na kupungulwila madyese andi a ntanda ne miseke pa bukomo botulonga bwa kupēlakana na lūbako lwa Mobo a Bulopwe mu matanda mavule ne potwela’ko kuboko ku Mukōlo wa Mobo a Bulopwe! Kino kikabutula Mobo a Bulopwe mavule akabwejibwa’ko mu matanda a misokwe mityetye. Ebiya kadi, kikendeja kumeso butōtyi butōka mu bipindi bivule bya mu Bulaya ne kupāna bukamoni bukatampe pi na pi kufika “ne kumfulo kwine kwa ntanda.”—Bil. 13:47.
[Bifwatulo pa paje 3]
Njibo ya Bulopwe Mikatakata Mosku, Rusi
[Bifwatulo pa paje 4-6]
Strumica, Masedonya
Daruvar, Kroasi
Bitola, Masedonya
Sokal, Distrike dya Lviv, Ikrene
Sofia, Bilgari
Krasnooktyabrskiy, Mwaba wa Maykop, Rusi
Bački Petrovac, Serbia ne Montenegro
Plovdiv, Bilgari
Tlumach, Distrike dya Ivano-Frankivsk, Ikrene
Rava-Ruska, Distrike dya Lviv, Ikrene
Stara Pazova, Serbia ne Montenegro
Zenica, Bosni ne Herzegovine
Sokal, Distrike dya Lviv, Ikrene
Zhydachiv, Distrike dya Lviv, Ikrene