Yoshia Wādi Usenswe Bijila Bya Leza

Yoshia wābikele bu mulopwe wa Yuda na myaka mwānda. Mu mene mafuku’a, bantu bādi balonga bya majende ne kutōta bilezaleza. Yoshia paābwenye myaka 16, wāshilula kwifunda mwa kutōtela Yehova mu muswelo muyampe. Aye pa kubwanya myaka 20, wāshilula konakanya bilezaleza ne bisōkelo byādi mu ntanda’ya. Kadi paābwenye myaka 26, wāanza kulongolola tempelo ya Yehova.

Hilekia, kitobo mukatampe, wāsokwele mu tempelo muvungo wa Bijila bya Yehova—kadi bimweka bu uno muvungo wālembelwe na Mosesa. Shafana, mulembi wa mulopwe wākapele Yoshia uno muvungo, Yoshia wāmunena atange Bijila’bya na diwi ditunduke. Yoshia pa kwivwana bino bijila, wājingulula’mba bantu kebakikōkelepo Yehova mu bula bwa myaka mivule. Mulopwe Yoshia wāsapwila Hilekia amba: ‘Yehova i mwitulobele bininge. Enda ukesambe nandi. Yehova usa kwitulombola byotufwaninwe kulonga.’ Yehova wālondolwele kupityila kudi Huluda, mupolofeto mukaji amba: ‘Bantu ba Yuda abangela. Bafwaninwe kupebwa mfuto inoko, ke kitatyipo kikidi Yoshia bu mulopwe, mwanda wetyepeja.’

Yoshia pa kwivwana uno musapu, wāenda ku tempelo, wākonga- kenya pamo bantu ba Yuda. Ebiya wāanza kutanga Bijila bya Yehova na diwi ditunduke ku meso a muzo onso. Yoshia ne bantu bālaya’mba bakakōkela Yehova na mutyima wabo onso.

Mu myaka mivule, muzo wa Yuda kewādipo ukisobanga masobo a Pashika. Inoko, Yoshia pa kutanga mu Bijila’mba Pashika ifwaninwe kusobwa mwaka ne mwaka, wāsapwila muzo amba: ‘Tusa kusobela Yehova Pashika.’ Ponkapo, Yoshia wāteakanya byabuntu bivule ne kukwata’ko mpangiko ya kwikale kisumpi kya batuimba ba ku tempelo. Kupwa, muzo wāsoba Pashika, mine yālondelwe na Masobo a Mikate Yampikwa Kiyujo, ādi asobwa mu bula bwa mafuku asamba-abidi. Kashā, kwādi kekwalongelwe Pashika pamo bwa ino tamba mu mafuku a Samwele. Na bubine, Yoshia wādi usenswe Bijila bya Leza. Le nobe usangelanga kwifunda myanda ya Yehova?