Mulopwe Muyampe wa Mfulo wa Isalela

YOSHIA wabikala mu bisaka bibidi bya kunshi bya Isalela aye na myaka mwanda kete. Ino i myaka mityetye pa kubikala. O mwanda bakulumpe bamobamo abamukwasha mu kuludika ntanda.

Yoshia pa kubikala ke myaka isamba-ibidi, washilula kukimba Yehova. Walonda kimfwa kya balopwe bayampe, pamo bwa Davida, Yehoshafata ne Hezekia. Kupwa, ukidi’tu nsongwalume, Yoshia walonga kintu kya bukankamane.

Bene Isalela bavule abalonga bibi mu bula bwa kitatyi kilampe. Batōtanga baleza ba bubela. Ne kwivukwila ku bankishi. Penepo Yoshia watambe ne bantu bandi kumo, ke batalula mutōtelo wa bubela mu ntanda. Uno i mwingilo mukatampe mwanda bantu batōta baleza ba bubela i bavule. Tala Yoshia ne bantu bandi mobatyumwina bankishi.

Kupwa, Yoshia wape bantu basatu kiselwa kya kulongolola tempelo ya Yehova. Abalonga mukongo wa lupeto mu bantu ne kupa bano bana-balume basatu bapote bya kwingila nabyo. Abo bengila mu tempelo, Hilekia kitobo mukatampe wasokola’mo kintu kya mvubu mikatampe. I mukanda wa bijila wālembeje Yehova kudi Mosesa mu myaka ya kunyuma. Wadi ke mujimine umbula bwa myaka mivule.

Abaselela Yoshia uno mukanda, nandi wanena bamutangile’o. Yoshia pa kwiwivwana, wamone amba bantu kebalaminepo bijila bya Yehova. Waivwana bulanda pa kino, kupwa wasana bisandi, enka na momwena pano’pa. Wanena’mba: ‘Yehova i mwitulobele, mwanda batata kebalaminepo bijila bya uno mukanda.’

Yoshia wasoñanya Hilekia kitobo mukatampe ajingulule bisa kwibalonga Yehova. Hilekia nandi wakepangula Hulada mupolofeto-mukaji. Nandi wamusapwila musapu wa Yehova wa kulombola Yoshia’mba: ‘Yelusalema ne bantu bonso bakapebwa mfuto, mwanda abatōta baleza ba bubela ne kuyuja ntanda na bubi. Ino mwanda abe Yoshia ubalonga biyampe, ino mfuto keikafikapo abe kwafwile.’