Mwana-Mulume Wampikwa Moyo

TALA bantu mobasepela uno nkasampe mwana-mulume. Lelo umuyukile? I Yelemia. I mupolofeto mukatampe wa Leza.

Mulopwe Yoshia pa kushilula konakanya bankishi mu ntanda, Yehova wanena Yelemia ekale mupolofeto Wandi. Ino Yelemia wemone bu mwanuke pa kwikala mupolofeto. Inoko Yehova wamunena’mba nsa kukukwasha.

Yelemia wanena Bene Isalela baleke kulonga bibi. Webanena’mba: ‘Baleza batōtwa na bantu ba mizo i ba bubela.’ Ino Bene Isalela bavule batōtanga bankishi pa kyaba kya kutōta Yehova Leza wa bine. Yelemia pa kwibasapwila’mba Leza ukebapa mfuto, abamusepa.

Myaka ibapite’po. Yoshia wafu, pa kupwa kwa myeji isatu, wandi mwana Yehoyakimi wabikala. Papo Yelemia usapwila bantu’mba: ‘Shi kemwalamwinepo bilongwa byenu bibi, Yelusalema ukonakanibwanga.’ Babitobo abakwata Yelemia ne kwela ñanji’mba: ‘Usa kufwa pa mwanda wa bino byowanena.’ Kupwa abalombola bamfumu ba Isalela’mba: ‘Yelemia ufwaninwe kwipaibwa, mwanda wanenena kibundi kyetu bibi.’

Pano Yelemia usa kulonga namani? Kadipo na moyo! Webalombola abo bonso’mba: ‘Yehova wantumine kwimusapwila bino bintu. Shi kemwalamwinepo bilongwa byenu bibi, Yehova ukonakanya Yelusalema. Ino, yukai kino: Shi mungipaye, mukepaya muntu wampikwa mwanda.’

Bamfumu abaleka kwipaya Yelemia, ino Bene Isalela kuleka bilongwa byabo bibi mpika. Kupwa Nebukaneza mulopwe wa Babiloni waiya kulwa na Yelusalema. Ku mfulo Nebukaneza wamuna Bene Isalela bupika. Waselela bantu tununu tuvule mu Babiloni. Langa’po bidi mokokeja kwiivwanina shi bantu ba kungi abakuselela mu ntanda ya bene bu musungi!