MWA KULONGELA BANA BA BWANGA
KIFUNDWA 10
Sumininwa
Musoñanya: “Twadi tusumininwe kwimupa, ke’nkapo myanda miyampe ya Leza kete, ino i ne batwe bene, mwanda mwi baswedibwe betu.”—1 Ts. 2:8.
Byālongele Yesu
1. Tala VIDEO, nansha kutanga Yoano 3:1, 2. Kupwa londolola bino bipangujo:
Mwanda waka padi Nikodema wāsakile kukamona Yesu bufuku?—Tala Yoano 12:42, 43.
Le Yesu pa kwitana na Nikodema bufuku, wālombwele namani amba wādi usumininwe kulonga bana ba bwanga?
Ñeni Yotuboila Kudi Yesu
2. Tulombolanga’mba tusenswe bantu na kusumininwa kwibakwasha bekale bana ba bwanga.
Iula Yesu
3. Mwifundei pa kitatyi ne kifuko kisangela muntu omwifunda nandi. Muntu ubwanya kusangela difuku kampanda mu yenga nansha nsá kamukaya mu difuku. Lelo ukefunda biyampe kokwa kwaingidila, ku njibo, nansha mu kifuko mukananga bantu? Shi bibwanika, shinta mpangiko yobe mwanda wa mwifunde nandi pa kitatyi ne kifuko kyasangela.
4. Mwifundei kitatyi ne kitatyi. Shi kusapo kwikala’po, kokemika kifundwa. Ino tompa kutala:
Le ubwanya kwifunda nandi kitatyi kikwabo mu mwine yenga’wa?
Lelo ubwanya kwifunda nandi kupityila ku telefone nansha ku video?
Lelo ubwanya kunena musapudi mukwabo akefunde nandi?
5. Lomba Yehova akukwashe wikale na mumweno muyampe. Lomba Yehova akukwashe usumininwe nyeke kwifunda na muntu, nansha shi ukolelwanga kwifunda kitatyi ne kitatyi nansha kwingidija madingi a mu Bisonekwa. (Fid. 2:13) Padi omwifunda nandi udi na ngikadila mivule miyampe; lomba Yehova akukwashe ute mutyima pa yayo ngikadila.