Kuyuka mutōtelo wabine kuletanga biselwa

“Badyese ne dyese, i bakwivwana uno mwanda wa Leza, ne kulama balame’o.”​—LUKA 11:28.

KEKIFWANINWEPO enka kuyuka mutōtelo wabine. Shi twi bantu basenswe myanda milumbuluke ne yabine, kitatyi kyotusokola mutōtelo wabine, tukōbaka būmi bwetu kukwatañana nao. Mutōtelo wabine kewimaninepo enka pa kuyuka bintu kete ne kwibilama muñeni, mhm; i mwikadilo wa umbūmi.​—Mitoto 119:105; Isaya 2:3; enzakanya na Bilongwa 9:2.

² Yesu Kristu wēsambile bininge pa mvubu ya kulonga myanda ilombola Leza amba kyo kiswamutyima kyandi. Pa kufudija misambo iyūkene bu Busapudi bwa pa Lūlu, Yesu wānene’mba ke bonsopo bakumwita bu Mfumwetu (betēla bu bakristu) bakatwela mu Bulopwe; ino i enka boba balonga kiswamutyima kya Shandi. Wānene kadi’mba bakwabo nabo bakafundulwanga’mba i “bakulonga bibi.” Mwanda’ka wēbatelele bu bakulonga bibi? Mwanda enka na mwikilombwela Bible, kubulwa kulonga kiswamutyima kya Leza i bubi, ne bubi bonso i kujilula bijila. (Mateo 7:​21-23; 1 Yoano 3:4; enzakanya na Loma 10:​2, 3.) Padi muntu kampanda ukokeja kuyuka mutōtelo wabine, kutendela boba beulonda ne kwanya boba bewingidija, inoko aye nandi udi monka na kiselwa kya kwiwingidija mu būmi bwandi. (Yakoba 4:17) Shi aketabije kino kiselwa, būmi bwandi bukalumbuluka ne ukekala na nsangaji yakakokejapo kwikala nayo mu muswelo mukwabo.

³ Mu kishinte kyabadikileko, twājingulwile tuyukeno tusamba twa kuyukilapo mutōtelo wabine. Kayukeno kamo ne kamo keketukwashangapo enka mwanda wa kujingulula mutōtelo wabine kete ino kadi ketutulanga kumeso kwa butongi ne kuyuka bikāya kumeso. Muswelo’ka?

Ulondololanga Muswelo’ka ku Kinenwa kya Leza?

⁴ Bantu bapya basangela musapu befunda Bible na ba Tumoni twa Yehova, bavule umbukata mwabo bajingululanga pakubulwa kwija’mba myanda yobebafundijanga itambanga mu Bible. Mu kwibalondolola ku bipangujo byabo, ba Tumoni kebengidijangapo nkulupilo ya mu mutōtelo, bibidiji bya bantu bya kishila, nansha milangwe ya bantu babitenta bikatakata. Kinenwa kya Leza akyo-kine kyo kidi na lupusa. Po bendanga ku Njibo ya Bulopwe bamonanga’mba ne kwine’kwa Bible kyo kingidilwa kibajinji. Bantu bakimba bubinebine na mutyima umo kebejangapo kujingulula’mba nsangaji mikatampe yobamonanga umbukata mwa ba Tumoni twa Yehova ilombola’mba badishibwanga biyampe ku mushipiditu na Kinenwa kya Leza.​—Isaya 65:​13, 14.

⁵ Shi kodi mwikijingulule kala, i muswelo’ka olondololanga? Shi kodi muyuke mvubu ya uno mwanda kufwaninwepo kwikitala enka bitupu kete, nansha kusaka kwikala uno muswelo. Bible witulombola’mba boba ‘bakwivwana mwanda bitupu’ ino ‘kwiulonga mpika beongolanga abo-bene na milangwe ya bubela.’ (Yakoba 1:22) Nansha abanena kika, beongolanga abo-bene mwanda bapelanga kwitabija’mba kupela kukōkela Leza kulombola’mba binebine kebamusenswepo. Lwitabijo lwa kutela kukanwa bitupu pakubulwa kwilulombola kupityila ku bilongwa i lufwe. (Yakoba 2:​18-26; 1 Yoano 5:3) Padi kwishila na muntu utakikwa na buswe bwa Yehova mwanda wa ekale “wakulonga wa mingilo” “ukeselwapo dyese dya pa bilongwa byandi.” Eyo, Yesu Kristu wānene’mba: “Badyese ne dyese, i bakwivwana uno mwanda wa Leza, ne kulama balame’o.”​—Yakoba 1:25; Luka 11:28; Yoano 13:17.

⁶ Ino nsangaji ikekala mivule kitatyi kyotwenda tutama mu buyuki bwa kiswamutyima kya Leza ne kwingidija myanda yotwifunda. I bukomo bwa muswelo’ka bokalonga mwanda wa kwifunda Kinenwa kya Leza? Makumi ne tutwa twa bantu bādi kebayukile kulemba nansha kutanga bāingile bininge mwanda wa bayuke kulemba ne kutanga, enka mwanda wa babwanye kutanga Bisonekwa ne kwibifundija ku bantu bakwabo. Bakwabo nabo balangukanga ku lubanga bwē mwanda wa kutanga Bible ne mikanda ikwashanga mu bwifundi bwa Bible difuku ne difuku, kimfwa Kiteba kya Mulami. Kitatyi kyotutanga Bible nansha kubandaula bisonekwa bitelelwe mu mukanda kampanda otwifunda, tulembei pafula mbila ne bijila bya Yehova, ne kukimba kujingulula misoñanya mivule itudilwemo mwanda wa kwituludika. Tulangulukei senene pa myanda itala padi Leza, ilombolwa mu kipindi ne kipindi, mpango yandi, ne muswelo wandi wa kumvwañana na bantu. Witudileko kitatyi mwanda wa bingidije lupusa mu mutyima obe. Tutalei shi kudi muswelo otukokeja kwingidija madingi a mu Bible mu muswelo mubwaninine mu būmi bwetu.​—Mitoto 1:​1, 2; 19:​7-11; 1 Tesalonika 4:1.

Lelo Wipēne Abe Yense Mutuntulu Kudi Yehova?

⁷ Miliyo ya bantu, ibasengwe mutyima pa kuyuka’mba Leza wabine ke Busatu po. Shintulwilo ya’mba “i kikata kifyame” keyādipo ibasangaja nansha dimo. I muswelo’ka obādi bakokeja kufwena kudi Leza obādi kebakokeja kumvwanija? Pamwanda wa buno bufundiji, bāidilwe Tata (obādi kebaivwene dijina dyandi nansha musunsa umo mu kipwilo) ne bādi batōta Yesu amba ye Leza nansha kulombela mu dijina dya Maria (obebāfundije’mba ye “Inandya Leza”). Ino mityima yabo yālondolwele na nsangaji mikatampe kitatyi kyāputwile Kamoni ka Yehova umo Bible ne kwibalombola’mba dijina dya Leza i Yehova. (Mitoto 83:18) Mwana-mukaji umo wa ku Venezwela wāsangele bininge po bāmuyukije dijina dya Leza, wapamba bipa nsongwakaji Kamoni wāmuyukije buno bubinebine ne waitabija kifundwa kya Bible kya ku njibo. Bantu ba uno muswelo, pobevwananga’mba Yesu wēsambile padi Shandi amba i “Leza wami kadi i Leza wenu,” ne kadi’mba wāmutelele amba i “Leza wabinebine kasuku,” bājingululanga’mba myanda itala Leza ifundija Bible kemikomopo kumvwanija. (Yoano 17:3; 20:​17, MB) Po bayukanga ngikadila ya Yehova, beivwananga pabwipi nandi, bashilula kumulombela, ne kusaka kumusangaja. I bipá’ka bilupukangako?

⁸ Umbula bwa myaka dikumi yāpityile kunyuma, bantu 2 528 524 mu bipindi bisamba bya ntanda ne bisanga bivule bapēne būmi bwabo kudi Yehova ne kwikilombola na kubatyijibwa mu mema. Lelo nobe wādi umo wa umbukata mwa bano bantu’ni nansha pano witeakanyanga mwanda wa kubatyijibwa? Lubatyijo i ditabula dya mvubu mikatampe umbūmi bwa mukristu yense wabine. Yesu wāpele balondi bandi mbila ya kukalonga bana-babwanga ku bantu ba mizo yonso ne kwibabatyija. (Mateo 28:​19, 20) Tukajingulula monka’mba i pakupwa kubatyijibwa kwa Yesu po pānene Yehova aye-mwine kutamba momwa mūlu’mba: “Abe wi wami Mwana muswibwe nakampata, mudi abe mo ndoelelwa ku mutyima, tō.”​—Luka 3:​21, 22.

⁹ Kwitabijibwa na Yehova i kintu kyotufwaninwe kukwatakanya ne kusanswa bininge. Shi kodi kala mu kipwano kya uno muswelo na Leza, kodi mwipāne ne mubatyijibwe kala, epuka kintu kyonso kikokeja konakanya kino kipwano. Kokileka makambakano a umbūmi nansha kukimba bintu bya kungitu bikatule kipwano kyobe na Leza pa kifuko kyabubidi. (1 Temote 6:​8-12) Bine, ikala na būmi bukwatañene na madingi adi mu Nkindi 3:6 anena’mba: “Mu mashinda obe onso muyuke [Yehova], kadi aye ukōlolanga tushinda tobe.”

Lelo Buswe bwa Kristu Bukutenekanga Binebine?

¹⁰ Eyo, kwitabija’mba Yehova ye Leza wabine umo yenka kete, kekikokejapo kwitupa mulangwe wa kwilwa Yesu Kristu. Kepantu, Kusokwelwa 19:10 unena’mba: “Busapudi bwa Yesu o muya ne muya wa kubanga mānga konso.” Kushilwila ku Ngalwilo kufika ku Kusokwelwa, bupolofeto bwa kubukomo bwa mushipiditu bulombolanga myanda yonso itala pa mwingilo wa Yesu Kristu mu mpango ya Leza kamo ne kamo. Byotuyukile ino myanda kamo na kamo, tudi na bifwatulo bitulumukwa muñeni yetu byakubulwa kwimanina pa mifwatakanyo ne milangwe ya bubela itamba ku bufundiji bwa bubela bwa Bipwilo bya Ki-kristu.

¹¹ Kumvwanija bubinebine butala padi Mwana Leza kukokeja kwingidija lupusa lukatampe ku muntu wibufunda. Kyokyāfikile Danuta, mwana-mukaji wa mu Polonye. Wēsambile na ba Tumoni twa Yehova umbula bwa myaka mwanda, wādi usangela myanda yobādi bamufundija ino kādipo ukwatañenye būmi bwandi na mutōtelo wabine. Penepo bāmupele dibuku Yule Mtu Mkuu Zaidi Aliyepata Kuishi, mobasekunwine būmi bwa Yesu mu muswelo umvwanikwa senene.a Ku kyolwa, waputula dibuku, na mulangwe wa kutangamo enka shapitra umo kete. Ino wēdiputyile enka kesha ku lubanga pakupwa kwiditanga dyonso dituntulu. Ponkapo impolo yamusuma. Kaabija’mba: “Yehova, mfwileko lusa.” Pamwanda wa myanda yātangile, wāikele kumona patōka buswe bwa Yehova ne bwa wandi Mwana kupita mwādi wikiyukile pakala. Wājingulwile’mba umbula bwa myaka mwanda kāikelepo na kufwijako, wādi ufutulula bukwashi bwa Leza bwādi umulombola na butukanye. Mu 1993 wābatyijibwe ne kulombola kwipāna kwandi kudi Yehova kwimanine pa lwitabijo mudi Yesu Kristu.

[Kunshi kwa dyani]

¹² ‘Buyūki bwabinebine butala padi Mfumwetu Yesu Kristu’ bwimanine ne pa kwikala bu mukristu wingila bininge ne ulupula bipá. (2 Petelo 1:8) I muswelo’ka otukokeja kuputumina mu uno mwingilo na kusapula Bulopwe bwa Leza ku bantu bakwabo? Bungi bwa bikokeja kulonga bantu mu kino kipindi bulondanga mungya ngikadilo mishileshile. (Mateo 13:​18-23) Tukokeja kwalamuna ngikadilo imo-imo, ino mikwabo padi ketukeibwanyapo. I kika kiketukwasha mwanda wa kwitulombola’byo ne kwitupa muswelo wa kwibyalamuna? Mutumibwa Polo wāsonekele’mba: “Lusa, [buswe, NW] lwa Kidishitu lwituningilanga”; mu bishima bikwabo, i kunena’mba buswe bwālombwele na kupāna būmi bwandi pamwanda wetu i bukatampe bininge, bufwaninwe kwituteneka ku mutyima tulombole kufwijako kwetu kukatampe. Tubajingulula’mba kikekala kyakubulwa kwendelamo kotudi shi twendelela na kukimba bitungo bya kungitu ne kwikala na būmi butala’nka pa batwe bene. Pa kyaba kya bino, tukalongolola būmi bwetu mwanda wa kutula mwingilo wāshidilwe bana-babwanga na Kristu pa kifuko kibajinji.​—2 Kodinda 5:​14, 15.

Kwisansanya na Ino Ntanda​—Muswelo’ka?

¹³ Kekikomenepo kujingulula myanda mivule ilongwa na Bipwilo bya Ki-kristu ne mitōtelo mikwabo pamwanda wa kusaka kwikuja mu myanda ya ino ntanda. Lupeto lwa bipwilo lwāikele kwingidijibwa mwanda wa kukwatakanya bilongwa bya butomboki. Bamupe bādi mu mulongo wa balwi ba malwi. Difuku ne difuku, mazyulunale esambilanga pa bibumbo bya bantu ba mitōtelo balwa bamo na bakwabo mu bipindi bishile bya ntanda. Makasa abo i mayule mashi. (Isaya 1:15) Ne bakulumpe ba Bipwilo bya Ki-kristu kujokoloka ntanda yonso batompanga kuludika myanda ya kipolitike. Batōtyi babine kebekujangapo mu ino myanda.​—Yakoba 4:​1-4.

¹⁴ Ino kwisansanya na ino ntanda kushintulula bintu bivule. Tuyukeno twa ntanda i kusanswa lupeto ne bintu bikokeja kupotwa na lupeto, kilokoloko kya kusaka kwilombola, ne kulondalonda nsangaji, kubulwa kutá bakwabo mutyima, kubepa, binenwa bya kafutululo, kutombokela balupusa, ne kubulwa kwifula. (2 Temote 3:​2-5; 1 Yoano 2:​15, 16) Pamwanda wa kubulwa kubwaninina kwetu, kitatyi kimo-kimo twikalanga tuponena mu ino ngikadila. I kika kikokeja kwitukwasha mu bulwi bwetu botulonga mwanda wa kwepuka ano makinga? Ketukivulaminwai’mba i ani wimanine ngikadila yonso idi mu ino ntanda. “Pano pantanda ponsololo palele mudi yewa umbi.” (1 Yoano 5:19) Nansha shi manwa engidija Satana adi na lupusa lwa muswelo’ka, nansha shi bantu bakwabo bavule bengidijanga mene mashinda’a, ino shi tuyukile’mba i Satana Dyabola walwana na Yehova ye muludiki udi kunyuma kwa ino myanda, binebine tukeimona’mba i imbi kutabuka.​— Mitoto 97:10.

Buswe Bwetu Bumwekanga Muswelo’ka?

¹⁵  Kitatyi kyotwāshilwile kwinangila na ba Tumoni twa Yehova musunsa umbajinji, pakubulwa kupatanya, buswe botwāmwene umbukata mwabo bwākokele milangwe yetu mwanda ibwishile na mushipiditu wa ino ntanda. Buswe bwakubulwa kwisakila kamwemo bulombolwa mu mutōtelo wabine wa Yehova, bulombola kwishila kwao na mitōtelo mikwabo yonso. Padi kyo kyākutonwene witabije’mba binebine ba Tumoni twa Yehova badi mu mutōtelo wabine. Yesu Kristu aye-mwine wānene’mba: “Po bakemuyukila bu-bāna-bami-babwanga ponka pa kwisanswa mo mwikadile banwe bene.”​—Yoano 13:35.

¹⁶ Lelo kano kayukeno kakuyukanyanga nobe bu umo wa mu bana-babwanga ba Kristu? Lelo kudi muswelo okokeja kubaija muswelo obe wa kulombola buswe? Pakubulwa lupata, umo ne umo umbukata mwetu ukokeja kwikilonga. Buswe bulombanga bivule kupitako enka kwilombola bulunda ku Njibo ya Bulopwe. Ne shi twikalanga tulombola buswe enka ku boba betusenswe, lelo tukeshila muswelo’ka na ino ntanda? Bible witusonganya’mba: “Kitabukile byonso i kwisanswa bikata banwe bene na bene.” (1 Petelo 4:8, MB) I ku ba ani kotufwaninwe kulombola buswe bukatampe? I kudi tutu nansha kaka mukristu wa mu kibundi kingi udi na mulongelo wa myanda witupa nsungu? Lelo i kudi yewa ukomene kutanwa ku kupwila kitatyi ne kitatyi pamwanda wa misongo nansha bununu? Lelo i kudi wetu mulume nansha wetu mukaji? Nansha padi i ku bambutwile betu benda banunupa? Bakristu bamo-bamo bādi balombolanga kala bipá bya mushipiditu mu muswelo mulumbuluke, kutentekelapo ne buswe, bāmwene bu bādi befunda dipya kwingidija buswe po bātenwe na ngikadilo mikomo ya kukwatakanya kitatyi ne kitatyi muntu wa mu kyabo kisaka wādi mufudilwe bininge. Binebine, nansha mu ngikadilo mikomo, buswe bwetu kebufwaninwepo kwimanina enka pa kyetu kisaka.

Busapudi bwa Bulopwe​—Budi na Mvubu’ka Kodi?

¹⁷ Muswelo mukwabo mulumbuluke otukokeja kulombola buswe ku bakwetu i kwibasapwila Bulopwe bwa Leza. Enka kibumbo kimo kya bantu kyo kiloñanga uno mwingilo wātobele Yesu. (Malako 13:10) I ba Tumoni twa Yehova. Batwe netu twānwenine mu uno mwingilo. Tupelwe madyese a kukwasha bakwabo. Shi tukwatañene na milangwe ya Leza pa uno mwanda, tukatula uno mwingilo pa kifuko kibajinji umbūmi bwetu.

¹⁸ Nsekununi yakutulumukwa isambila pa muswelo obākafikije musapu wa Bulopwe mu bipindi bya ntanda bya kulampe mu ano mafuku a kumfulo idi mu dibuku​—Les Témoins de Jého­vah​—Pré­dica­teurs du Royaume de Dieu. Shi kedilupulwe kala mu lobe ludimi, kokibulwai kwiditanga. Ne pokeditanga, jingulula senene miswelo yonso yāingidije bantu mwanda wa kupāna musapu wa Bulopwe. Lelo mudi bimfwa bimo-bimo byokokeja kwiula? Kudi bitatyi bivule bitudilwe kumeso a muntu ne muntu umbukata mwetu. Shi ke pano, buswe bwa Yehova bwikale kwitutakika twingidije bino bitatyi bilumbuluke.

¹⁹ Shi twikankamika kwingidija kiswamutyima kya Yehova, tukokeja kulondolola ku bipangujo kimfwa, Shintulwilo ya būmi i kika? (Kusokwelwa 4:11) Ketukafufukutapo nansha kwimona bu ketuyukilepo kintu. Kekudipo mwingilo nansha umo otukokeja kuputuminamo ukokeja kwituletela nsangaji mikatampe kupitako kwipāna na mutyima umo ku mwingilo wa Yehova Leza. Myanda milumbuluke itutengele ku mafuku akāya kumeso! Kwikala na būmi bwanyeke bwa nsangaji mu ntanda yandi impya, motukengidija manwa etu onso kukwatañana na mpango ya buswe ya kine kyapāngile Leza muzo wa muntu.

1. Kupwa kwa kujingulula mutōtelo wabine, i bantu ba muswelo’ka bobakanga būmi bwabo kukwatañana na uno mutōtelo?

2, 3. (a) I muswelo’ka wēsambile Yesu bininge pa mvubu ya kulonga kiswamutyima kya Leza? (b) I kiselwa’ka kidi na muntu yense uyūkile mutōtelo wabine?

4. (a) Pashilulanga bantu bamo-bamo kuñangila ba Tumoni twa Yehova, i kika kyobājingululanga bukidi-bukidi mu muswelo obengidija Bible? (b) Bidibwa bilumbuluke bya kumushipiditu bidya bengidi ba Yehova bingidijanga lupusa’ka pobadi?

5. (a) I kika kifwaninwe kulonga boba kebapwe kala kubandaula mwikadilo wa ba Tumoni twa Yehova? (b) I muswelo’ka obakokeja kwikala na nsangaji pamo na idi na ba Tumoni twa Yehova?

6. Shi binebine tusangelanga Kinenwa kya Leza, i bitatyi’ka byotukokeja kwingidija?

7. (a) Mfundijo ya Busatu ingidijanga lupusa’ka pa bantu balonga bukomo bwa kutōta Leza? (b) I kika kikokeja kulongeka shi muntu wapu kwifunda bubinebine butala padi Yehova?

8. (a) Pamwanda wa buswe bwabo kudi Yehova ne kusaka kwabo kwa kumusangaja, i kika kilonga ma miliyo a bantu? (b) Mwanda’ka lubatyijo lwa bwine-kristu ludi na mvubu mikatampe?

9. I kika kyotufwaninwe kulonga mwanda wa kwitabijibwa na Yehova?

10. Mwanda’ka kutōta Yehova kekukokejapo kwitutakika tuvulaminwe Yesu?

11. Mwana-mukaji umo mwine Polonye wātenekelwe pa mutyima muswelo’ka kitatyi kyēfundile myanda inena Bible itala padi Mwana Leza?

12. Buyuki bwabinebine butala padi Yesu Kristu bwingidija lupusa’ka mu būmi bwetu?

13. Mwanda’ka tufwaninwe kwepuka mutōtelo wikuja mu myanda ya ino ntanda?

14. (a) I kika kyotufwaninwe kwepuka shi ketusakepo kwikuja mu myanda ya ino ntanda? (b) I kika kikokeja kwitukwasha tuleke kuponena mu dikinga dya ngikadila ya ino ntanda ne bilongwa byayo?

15. Buswe bwakubulwa kwisakila kamweno botwājingulwile bwetukwēshe muswelo’ka mwanda wa kuyuka mutōtelo wabine?

16. I bitatyi’ka byotukokeja kwingidija mwanda wa kutandabula buswe bwetu?

17. Shi twāmwene kamweno mu bupempudi bwa ba Tumoni twa Yehova, netu tufwaninwe kulonga kika?

18. Butangi bwetu bwa dibuku Les Témoins de Jého­vah​—Pré­dica­teurs du Royaume de Dieu bukokeja kwingidija lupusa’ka mu muswelo wetu wa kutambila mu busapudi bwa Bulopwe?

19. Tukamwenamo kika kitatyi kyotwitabija kiselwa kyetu kikwatañene na kuyuka mutōtelo wabine?

[Bilembwa bya pa Bifwatulo]

Rusi

Sénégal

Papouasie Nouvelle-Guinée

Etats-Unis

Lubatyijo i ditabula dibajinji ku muntu witabija biselwa bya mutōtelo wabine Kweji ne kweji, kubwipi kwa bantu 25 000 kujokoloka ntanda yonso baloñanga dino ditabuka

Kuyukija bubinebine bwa Bible ku bantu bakwabo i kipindi kya mu mwingilo wa mutōtelo wabine

Etats-Unis

Etats-Unis

Brésil

Hong Kong

Ukalondolola Namani?

◻ Mwanda’ka mutōtelo wabine ufwaninwe kwitabija Bible bu Kinenwa kya Leza ne kulemeka Yehova amba ye Leza wabine?

◻ I mwanda’ka ufundija mutōtelo wabine utala pa mwingilo wa Yesu wa bukudi?

◻ Mwanda’ka bakristu bafwaninwe kwisansanya na ino ntanda ne kulombola buswe bwakubulwa kwisakila kamweno?

◻ I mwingilo’ka udi na basapudi ba Bulopwe mu mutōtelo wabine?