Kipindi Kyabubidi—Bitōkeji bya Mwinya​—Bikatampe ne Bityetye

“Mu mwinya obe tukamonanga mwinya.”​—MITŌTO 36:9.

MUKANDA wa Kusokwelwa udi mu Bible wākambakenye bakristu mu kwiwivwanija tamba mu kitatyi kyakala. Kino kileta kimfwa kilumbuluke kya muswelo wenda ukamba kitōkeji kya bubinebine bityebitye. Mu mwaka wa 1917, bantu ba Yehova bālupwile bushintuludi bwa Kusokwelwa mu dibuku Le mystère accompli dyāsokwedile patōka pakubulwa moyo Bipwilo bya Ki-kristu ne baludiki ba kipolitike, inoko bushintuludi buvule bwādimo bwāselelwe ku nsulo mishileshile. Inoko, dibuku Le mystère accompli dyāingidijibwe mwanda wa kutūla kikokeji kya kulama bijila kya Befundi ba Bible mu matompo mu muswelo umweka patōka wāingidije Yehova.

² Kitōkeji kya mwinya kikatampe kitala pa mukanda wa Kusokwelwa kyāeñenye kupityila ku kishinte kinena’mba “Kubutulwa kwa Muzo” kyālupwilwe mu Kiteba kya Mulami kya mu 1 kweji 3, 1925 (Angele). Bādi balanga’mba Kusokwelwa shapita 12 wādi ushintulula divita dikalwa Umbikalo wa Loma wa bajentaila ne mutōtelo wao wa Ki-babiloni na Kipwilo kya Katolika Loma, mwana mwana-mulume ntunguluji wa umbikalo wa papa. Ino kino kishinte kyālombwele’mba Kusokwelwa 11:​15-18 kwādi na bushintuludi budi mu shapita 12, na kulombola’mba uno shapita ukwatañene na kubutulwa kwa Bulopwe bwa Leza.

³ Bino byonso byāfikīje ku kwivwanija kukatampe kwa patōkelela kwa Kusokwelwa kwāletelwe na dibuku Lumière, dyālembelwe mu mabuku abidi mu mwaka wa 1935. Ino kwivwanija kukatampe kupita kwālupwilwe mu dibuku “Babylone la Grande est tombée!” Le Royaume de Dieu a commencé son règne! (1969) ne dibuku “Alors sera consommé le mystère de Dieu” (1972). Kupwa, kwādi monka myanda mivule ya kwifunda yādi itala pa mukanda wa bupolofeto wa Kusokwelwa. Eyo, kitōkeji kikatampe kyāeñenye mu mwaka wa 1988, kupityila ku dibuku Ufunuo​—Upeo Wao Mtukufu U Karibu! Tukokeja kunena’mba kushintululwa bityebitye kwa kino kitōkeji kwāikele uno muswelo mwanda bupolofeto bwa Kusokwelwa bufunkila pa “difuku dya Mfumwetu,” dyāshilwile mu mwaka wa 1914. (Kusokwelwa 1:10) Nanshi mukanda wa Kusokwelwa wādi ufwaninwe kwivwanijibwa senene umbula bwa kitatyi kyenda kitunduluka dino difuku.

“Bakatampe Balupusa” Abasokwelwa Patōka

⁴ Kitōkeji kya mwinya ukelema tōo kyāeñenye mu mwaka wa 1962 kukwatañana na Loma 13:​1, unena’mba: “Bantu bonso bēkale kukōkela bakatampe balupusa.” Befundi babajinji ba Bible bājingulwile’mba “bakatampe balupusa” batelelwemo bafunkila pa balupusa ba pano panshi. Bāivwanije kino kishima na bushintuludi bwa’mba shi mukristu watongwe mu kitatyi kya divita, ufwaninwe kuvwala ñonga, kusela buta pa kipuji, ne kwiela mu mulongo wa benda ku bulwi, kwiela mu kadyōpe (kīna mufyamanga bamudyavita). Bādi balanga’mba mukristu byakakokeja kwipaya mukwabo muntu, shi bibakoma bininge ufwaninwe kusobwela buta bwandi mūlu.a

⁵ Kiteba kya Mulami kya mu 15 kweji 11 ne kya mu 1 kweji 12, 1962 (Angele), kyāletele kitōkeji kikatampe pa uno mwanda na kwisambila pa binenwa bya Yesu bidi mu Mateo 22:21 binena’mba: “Lubulai . . . bya Kesala kudi Kesala, bya Leza nabyo kudi Leza.” Binenwa bya batumibwa bidi mu Bilongwa 5:29 (MB) byālombwele’mba: “Batwe tufwanyinwe kukokela Leza [bu muludiki], kutabuka kukokela bantu.” Bakristu bakokelanga Kesala​—“bakatampe balupusa”—​enka shi kino kekilombepo mukristu kujilula kijila kya Leza. Bāmwene amba kukokela Kesala i kwa mu myanda imo-imo, ke kwa mu myanda yonsopo. Bakristu balubwilanga Kesala enka byobya kebityumunanga myanda isaka Leza. Kyāletele nsangaji mikatampe pa kutambula kwivwanija kulumbuluke pa uno mwanda!

Bitōkeji bya Mwinya mu Myanda Itala Bulongolodi

⁶ Kwādi kipangujo kya kusaka kuyuka i ba ani bādi bafwaninwe kwingila bu bakulumpe mu bipwilo ne i ba ani bakekala bengidi. Mwanda wa kutyina kuponena mu mwilondelo wa bitenta ubikēle mu Bipwilo bya Ki-kristu, bātyibile mbila’mba bano bafwaninwe kutongwa kupityila ku vote ya kwela munwe mūlu ikalongibwa na bantu ba pa kipwilo ne kipwilo. Ino kitōkeji kyāeñenye mu Kiteba kya Mulami kya mu 1 kweji 9 ne kya mu 15 kweji 10, 1932 (Angele), kyālombwele’mba Bisonekwa kebinenepo nabya pa mwanda utala kuvotwa kwa bakulumpe. Omwanda ano mavote āpingakanibwe na kitango kimanine mingilo, ne kitango kyendeji kyātongelwe na Sosiete.

⁷ Mu Kiteba kya Mulami kya mu 1 kweji 6 ne kya mu 15 kweji 6, 1938 (Angele), mwādi bitōkeji bya mwinya byālombwele’mba bengidi ba pa kipwilo kebafwaninwepo kuvotwa, ino bafwaninwe kutongwa, ko kunena’mba, kutongwa musakila kiteokratike. Mu mwaka wa 1971, kitōkeji kikwabo kya mwinya kyālombwele’mba kipwilo ne kipwilo kekifwaninwepo kuludikwa enka na mwingidi umo kete. Ino, kipwilo ne kipwilo kifwaninwe kwikala na kitango kya bakulumpe, nansha baledi, bapelwe mwingilo na Kitango Kyendeji kya ba Tumoni twa Yehova. Mu uno muswelo kupityila ku mwinya wādi wenda ukamba kubwipi kwa myaka 40 ne kupita, kyāmwekele patōka’mba bakulumpe pamo ne bengidi bayukilwe pano bu bengidi ba mingilo, bafwaninwe kutongwa na “umpika wabinebine ne wamanwa,” kupityila ku Kitango Kyendeji kyandi. (Mateo 24:​45-47, NW) Kino kyādi kyendelemo na myanda yāpityile mu kitatyi kya batumibwa. Bana-balume bamo-bamo, kimfwa Temote ne Tetusa bātongelwe bu baledi na kitango kyendeji kya mu myaka katwa imbajinji. (1 Temote 3:​1-7; 5:22; Tetusa 1:​5-9) Bino byonso bifunkila pa kufikidila kukatampe kwa Isaya 60:17 unena’mba: “Nkapingakanya nsahabu pa mukuba, ne ndalama pa lubwe, ne mukuba pa mutyi, ne lubwe pa mabwe; nkapa baledi bobe ndoe, ne batyibi bobe ke boloke.”

⁸ Kwādi kadi mwanda wādi utala mwa kuludikila Sosiete Watch Tower. Umbula bwa myaka mivule Kitango Kyendeji kya ba Tumoni twa Yehova kyādi kimo kyonka na kitango kya baludiki ba mingilo ya Sosiete Watch Tower Bible and Tract of Pennsylvania, ne myanda yonso yādi iludikwa mu kipindi kikatampe na mwimaniji wayo. Pamo’nka na mokilombwedilwe mu dibuku Annuaire des Témoins de Jéhovah 1977 (paje 258-260), mu mwaka wa 1976 Kitango Kyendeji kyāshilwile kwingila na makomite asamba, komite ne komite wāpelwe kukwatakanya bipindi kampanda bya mwingilo kujokoloka ntanda yonso. Komite Utala Bengidi wimanine myanda ya bengidi, kubadilamo ne bisakilwa boba bonso bengila mu kisaka kya Betele kujokoloka ntanda yonso. Komite Wimanine Bulupudi bwa Mabuku utalanga myanda yonso itala bintu bya kubulwa kukwatañana na bya kumushipiditu ne bijila bya Leta, kimfwa kupota mobo, bipungwa ne bingidilwa pamo ne bitampilo. Komite Utala Mingilo ye aye utalanga mingilo ya kupāna bukamoni ne kuludika myanda ya baledi bendakana, bapania ne mingilo ya basapudi ba pa bipwilo. Komite Wimanine Bufundiji wimanine myanda itala kupwila kwa pa bipwilo, buvule bwa mafuku a kitango kyapabula, kitango kya kipindi, kitango kya distrike ne kitango kya matanda mavule, pamo ne masomo meshileshile a bufundi bwa kumushipiditu bwa bantu ba Leza. Komite Wimanine Bilembwa utalanga kuteakanya ne bwalamuni bwa mabuku a miswelo yonso, ne kujingulula’mba myanda yonso ikwatañene na Bisonekwa. Komite wa Mwimaniji utalanga myanda ilomba bukwashi bwa bukidi-bukidi ne myanda mikwabo isakilwa kuvuijibwa bukidi-bukidi.b Kadi mu myaka ya 1970, mabilo a musambo a Sosiete Watch Tower āshilwile kutalwa na komite pakyaba kya kuludikwa na muledi umo.

Mwinya Utala pa Mwiendelejo wa Bwine-Kristu

⁹ Bitōkeji bivule bya mwinya byāningile nakampata pa mwiendelejo wa bwine-Kristu. Kimfwa, tubandaulei bidi mwanda utala kuleka kwikuja mu myanda ya byantanda. Kitōkeji kya mwinya kya pabula kyāeñenye pa uno mwanda mu kishinte kinena’mba “Kuleka kwikuja mu myanda ya byantanda” kyālupwilwe mu Kiteba kya Mulami kya mu 1 kweji 11, 1939 (Angele). Bine, kyādi kitatyi kifwaninwe, mwanda kyāfikile kupwa kwa ngalwilo ya Divita Dyabubidi dya Ntanda Yonso! Kino kishinte kyāshintulwile muswelo wa kuleka kwikuja mu myanda ya byantanda ne kyālombwele’mba bakristu kebafwaninwepo kwikuja mu myanda ya kipolitike nansha mu ñuma yumana mizo na mizo. (Mika 4:​3, 5; Yoano 17:​14, 16) Kino ye kintu kibaletelanga kushikibwa na mizo yonso. (Mateo 24:9) Mavita ādi alwa Isalela wakala kealetapo kimfwa ku bakristu, pamo’nka na mwālombwedilekyo Yesu patōka mu Mateo 26:52. Pakwabo kadi, dyalelo kekudipo muzo nansha umo ulonda misoñanya ya kiteokratike, uludikwa na Leza pamo na mwādi mwikadile Isalela wakala.

¹⁰ Bāletele monka kitōkeji kitala pa bu-ujila bwa mashi. Befundi ba Bible bādi balanga’mba kijila kya kuleka kudya mashi, kidi mu Bilongwa 15:​28, 29, kyāpelwe bakristu Bayuda kete. Inoko, Bilongwa 21:25 ulombola’mba mu kitatyi kya batumibwa ino mbila yādi monka itala ne boba bajentaila bālamukile ke bene Leza. Nanshi kwitabija bu-ujila bwa mashi kutala bakristu bonso, pamo’nka na mokyālombwedilwe mu Kiteba kya Mulami kya mu 1 kweji 7, 1945 (Angele). Kino kekishintululapo enka kupela kudya mashi a banyema kete, kimfwa mashi a mu soshiso, ino i kwilama monka ne ku mashi a bantu, kimfwa mashi a kutwejibwa mu mijilo na bipompwa.

¹¹ Bipa byālupukile ku mwinya wenda ukamba, i bya’mba bibidiji bimo-bimo byādi bitalwa dibajinji bu mwanda mutyetye, mwenda mafuku byākwetwe na makasa abidi bu mwanda mukatampe bininge. Kimfwa kimo mu bino i kya mwanda utala kutoma mfwanka. Mu Kiteba kya Mulami kya Ziona kya mu 1 kweji 8, 1895 (Angele), Tutu Russell wākokele milangwe pa 1 Kodinda 10:31 ne pa 2 Kodinda 7:1 ne wālembele’mba: “Ami kimwenepo amba mukristu utoma mfwanka, shi ya muswelo’ka, shi ya muswelo’ka, bu i muswelo uletela Leza ntumbo, nansha bu kudi kamweno kamwenamo aye mwine.” Tamba mu mwaka wa 1973 bāivwanije senene’mba kekudipo ntomya-mfwanka nansha umo ukekala umo wa mu ba Tumoni twa Yehova. Mu mwaka wa 1976 bālombwele patōka’mba kekudipo Kamoni nansha umo ukokeja kwingila mu njibo ya mazua ne kulekwa mu kipwilo.

Kunemununa Kukwabo

¹² Kwādi monka kitōkeji kyāeñenye pa mwanda utala kibalwa kya mfungulo ya kyelekejo yāpelwe Petelo na Yesu. Befundi ba Bible bāsokwele’mba Petelo wātambwile mfungulo ibidi yāshitwidile bantu dishinda dya kwikala bampyana ba Bulopwe​—lumo lwāingidijibwe ku Bayuda mu Pentekosa mu mwaka wa 33 K.K., ne lukwabo lwāingidijibwe ku Bajentaila musunsa umbajinji mu mwaka wa 36 K.K. mu kitatyi kyākasapwile Petelo kudi Konilusa. (Bilongwa 2:​14-41; 10:​34-48) Mu myaka ya kunyuma, kyāmwekele’mba kwādi kibumbo kyabusatu kyābadilwemo​—kya bene Samadia. Petelo wāingidije lufungulo lwabubidi mu kitatyi kyāebashitwidile kyepelo kya Bulopwe. (Bilongwa 8:​14-17) Nanshi, lufungulo lwabusatu lwāingidijibwe mu kitatyi kyākasapwile Petelo kudi Konilusa.​—Kiteba kya Mulami, kya mu 1 kweji 1, 1980, paje 16-22, 26 (Falanse).

¹³ Kupityila ku mukejima mukwabo wa kitōkeji, bājingulwile’mba Yesu kādipo wisambila pa bipombo bibidi kete bya mikōko, ino byādi bipombo bisatu. (Yoano, shapita 10) Bino bipombo byādi (1) kipombo kya Bayuda kyābikilwepo Yoano Mubatyiji bu kalama wa njibo, (2) kipombo kya bampyana ba Bulopwe bashingwe-māni, ne (3) kipombo kya “mikōko mikwabo,” idi na lukulupilo lwa kukekala pano pantanda.​—Yoano 10:​2, 3, 15, 16; Kiteba kya Mulami, kya mu 15 kweji 5, 1984, paje 9-18 (Falanse).

¹⁴ Kwivwanija kwa Masobo makatampe a kyelekejo ādi atēkibwa pakala kwāshintulwilwe senene. Kukwatañana na Mukanda-wabijila, mwaka onso wa 50 wādi mwaka wa Masobo makatampe, mu mwine mwaka’wa bintu byonsololo byādi bijokejibwa ku bene’byo. (Levi 25:10) Bāivwanije umbula bwa myaka mivule amba kino kyādi kyelekejo kya Umbikalo wa Myaka Kanunu wa Kristu. Inoko, mu mafuku a kunyuma’a, kyāmwekele’mba Masobo makatampe a kyelekejo āshilwile mu Pentekosa mu mwaka wa 33 K.K., mu kitatyi kyālupwilwe boba bātambwile mushipiditu sandu mu lupungu lwa Mukanda-wabijila wa Mosesa.​—Kiteba kya Mulami, kya mu 1 kweji 1, 1987, paje 18-28 (Falanse).

Kweñenya kwa Kitōkeji Kitala pa Kwingidija Bishima

¹⁵ “Musapudi walangile kusokola binenwa bifwaninwe, ne kyokya kyalembelwe kyoloke, ke binenwa bya bu-binebine kadi.” (Musapudi 12:10) Bino binenwa byendelemo kwingidijibwa pa uno wetu mwanda otwisambilapo, mwanda mwinya kewāletelepo kitōkeji enka pa myanda mikatampe itala lufundijo ne mwiendelejo kete, ino wāletele monka kitōkeji pa bishima bya bwine-Kristu ne bushintuludi bwabyo bwabinebine. Kimfwa, umbukata mwa Befundi ba Bible, dibuku dimo mu mabuku obādi basenswe bininge dyādi dibuku dibajinji dya dibuku Études des Écritures, dyādi na mutwe wa mwanda unena’mba Le divin plan des âges. Inoko, mu kine kitatyi’kya, bājingulwile’mba Kinenwa kya Leza kyādi kisambila enka pa bantu kete amba bobetudilangako mpangiko. (Nkindi 19:21) Bisonekwa kebilombolapo nansha dimo amba Yehova witudilangako mpangiko. Aye kasakilwangapo kwitudilako mpangiko. Myanda yonso yapangilanga mpango, shi myanda’ka, shi myanda’ka, ukulupile’mba ikalongeka pamwanda wa tunangu twandi ne bukomo bwandi bwakubulwa mikalo, pamo’nka na motutangila mu Efisesa 1:​9, 10 amba: ‘Monka muswidile mutyima wandi mungya mwapangīle mpango aye mwine mwanda wa kuludika kufikija’nka ne pa mfulo pene pa mikalo ya bitatyi bitungwe.’ Mu uno muswelo bājingulwile bityebitye’mba kishima “mpango” ye kine kyendelemo mu kwisambila padi Yehova.

¹⁶ Penepo kwādi mwanda wādi utala kwivwanija kudi senene kwa Luka 2:14. Kukwatañana na Bible King James Version, kino kisonekwa kitangwa’mba: “Ntumbo kudi Leza momwa mūlu mwine, ne ndoe pano panshi, kanye ka bulunda ku bantu.” Kyāmwekele’mba buno bwalamuni kebwālupwilepo mulangwe moloke, mwanda Leza kalombolangapo kanye ka bulunda ku bantu babi. Pa kino, ba Tumoni bāmwene’mba besambila pa mwanda wa ndoe ipebwa ku bantu balombolanga kanye ka bulunda ku meso a Leza. Omwanda bāikele kutēla boba basangela Bible bu bantu badi na kanye ka bulunda. Ino bāivwanije kadi’mba wādi mwanda utala kanye ka bulunda, ku mutamba wa Leza, ke ku mutamba wa bantupo. Omwanda, Bible Traduction du monde nouveau (Angele) kunshi kwa dyani wisambila pa Luka 2:14 amba “bantu betabijibwa nandi [Leza].” Bakristu bonso badi na būmi bukwatañene na mutyipo wabo wa kwipāna Leza wibalombolanga kanye ka bulunda bwandi.

¹⁷ Muswelo umo, tamba kala, ba Tumoni bādi besambila pa kubingija dijina dya Yehova. Lelo Satana wāpatenye dijina dya Yehova? Pa uno mwanda, lelo kudi mwingidi wa Satana nansha umo wāpatenye amba Yehova kafwaninwe kwitwa pa dino dijina? Mhm, ke amopo. Ke dijinapo dya Yehova dyālwidilwe ne dyādi disakilwa kubingijibwa. Omwanda mabuku alupulwa pano-pano na Sosiete Watch Tower keakisambilapo pa kubingija dijina dya Yehova. Esambila pa kubingija umbikalo wa Yehova ne amba bu-ujila bwa dijina dyandi buyukijibwe. Kino kikwatañene na mwētulombwedile Yesu kulombelela’mba: “Buujila bwa dijina dyobe buyukwe.” (Mateo 6:9, MB) Misunsa mivule, Yehova wādi unene’mba ukayukija bu-ujila bwa dijina dyandi, kekunenapo’mba bene Isalela bēdyalakene, mhm, ino bēdifutulwile.​—Ezekyele 20:​9, 14, 22; 36:23.

¹⁸ Mwanda wakamweno i wa’mba, mu mwaka wa 1971, dibuku “Les nations sauront que je suis Jéhovah” ​— Comment? dyālombwele kuno kwishīla’mba: “Yesu Kristu ulwilanga . . . kubingija Umbikalo wa umbuo onso wa diūlu ne ntanda wa Yehova ne kutumbija dijina dya Yehova.” (Paje 365) Mu mwaka wa 1973, dibuku Le Royaume millénaire de Dieu s’est approché dyānene’mba: “‘Kyamalwa kibūke’ kikāya kumeso i kitatyi kikabingijanga Yehova Leza Mwinebukomobonso Umbikalo wandi wa umbuo onso wa diūlu ne ntanda ne kuyukija bu-ujila bwa dijina dyandi dyabuleme.” (Paje 407) Ebiya, mu mwaka wa 1975, dibuku Fin prochaine de la détresse mondiale dyānene’mba: “Mwanda mukatampe kutabuka mu mānga ya umbuo onso wa diūlu ne ntanda pano ukafikidijibwa, i kubingija umbikalo wa diūlu ne ntanda wa Yehova ne kuyukija bu-ujila bwa dijina dyandi dikola.”​—Paje 280.

¹⁹ Bine bantu ba Yehova baloelelwanga bininge mu bino bitōkeji byonso bya kumushipiditu! Mu kinyuma, muswelo uponene bakulumpe ba Bipwilo bya Ki-kristu mu fukutu wa kumushipiditu ulombwelwe mu bino binenwa bya mukulumpe umo wa kipwilo’mba: “Lelo i mwanda waka kudi bubi? Lelo i mwanda waka kudi masusu? Lelo i mwanda waka kudi dyabola? Bino ye bipangujo byonsaka kukepangula Mfumwetu ponkenda mūlu.” Ino ba Tumoni twa Yehova bakokeja kumulondola’mba: I pamwanda wa lupata lutala pa boloke bwa umbikalo wa Yehova ne pamwanda wa kipangujo kya kusaka kuyuka shi bantu bakokeja kukokela Leza nansha shi bapangwapangwa na Dyabola.

²⁰ Umbula bwa myaka, bitōkeji bya mwinya, bikatampe ne bityetye byātōkeje kashinda ka bengidi ba Yehova bepēne. Kuno kwādi kufikidila kwa bisonekwa kimfwa Mitōto 97:11 ne Nkindi 4:18. Ino ketukilwaiko nansha dimo’mba kunangila mu kitōkeji kushintulula kutendela mwinya wenda ukamba ne kwendela nao umbumo. Pamo’nka na motubekimwena kala, uno mwinya wenda ukamba i kubadilamo byonso bibidi, mwiendelejo wetu ne mwingilo wa busapudi otupelwe.

[Kunshi kwa dyani]

[Bipangujo]

1. I bukomo’ka bubajinji bwālongelwe mwanda wa kwivwanija binenwa bya kyelekejo bidi mu mukanda wa Kusokwelwa?

2. Kishinte “Kubutulwa kwa Muzo” kyāletele kitōkeji’ka pa mukanda wa Kusokwelwa?

3. I mabuku’ka āletele kitōkeji kikatampe pa mukanda wa Kusokwelwa?

4, 5. (a) Befundi ba Bible bādi na milangwe’ka pa Loma 13:1? (b) I mwimanino’ka utala pa “bakatampe balupusa” wājingulwilwe mwenda mafuku amba o ukwatañene na Bisonekwa?

6. (a) Mwanda wa kutyina kuponena mu mwilondelo wa bitenta ubikēle mu Bipwilo bya Ki-kristu, i musoñanya’ka wāitabijibwe? (b) Kumfulo i muswelo’ka wājingulwilwe’mba ye moloke ufwaninwe kulonda mwanda wa kutonga boba badi na mwingilo wa kulela kipwilo?

7. Bitōkeji bya mwinya byānemunwine muswelo wādi utongwa bengidi pa kipwilo muswelo?

8. (a)Bubinebine bwenda butunduluka bwālamwine muswelo wa mwa kuludikila Sosiete muswelo’ka? (b) I makomite’ka adi mu Kitango Kyendeji, kabidi komite ne komite udi na bipindi’ka byaludika nansha bipindi pemanine wandi mwingilo?

9. Kitōkeji kya bubinebine kyālamwine kipwano kya bakristu na imbikalo ya ino ntanda muswelo’ka?

10. Bitōkeji bya mwinya byāsokwele kika pa muswelo ufwaninwe kumona bakristu mashi?

11. Bājingulwile kika pa muswelo ufwaninwe kumona bakristu kutoma kwa mfwanka?

12. (a) Kitōkeji kya mwinya kyāsokwele kika kitala pa kibalwa kya mfungulo ya Bulopwe yāpelwe Petelo? (b) I mu myanda’ka mwāingidije Petelo lufungulo ne lufungulo?

13. Bitōkeji bya mwinya byāsokwele kika kitala pa bipombo bilombwelwe mu Yoano shapita 10?

14. Kweñenya kwa mwinya kwāshintulwile patōka myanda itala Masobo makatampe a kyelekejo muswelo’ka?

15. I kitōkeji’ka kyāeñenye kitala pa kwingidija kishima “mpangiko”?

16. I myanda’ka yobājingulwile bityebitye amba bo abo bushintuludi bwendelemo bwa Luka 2:14?

17, 18. Yehova ukabingijanga kika, ne i kika kyakayukija bu-ujila bwakyo?

19, 20. I muswelo’ka otukokeja kulombola kufwijako kwetu pamwanda wa bitōkeji bya mwinya wa kumushipiditu?

[Bilembwa bya pa Bifwatulo 21]

Lelo Ukivulukile’byo?

◻ I kitōkeji’ka kyālombwelwe pa mwanda utala kukokela “bakatampe balupusa”?

◻ Bitōkeji bya mwinya byāletele kwendelela’ka mu bulongolodi?

◻ Mwinya wenda ukamba wālamwine muswelo’ka mwiendelejo wa bakristu?

◻ Mwinya wa kumushipiditu wānemunwine myanda’ka itala pa kwivwanija kwetu kwa myanda imo-imo ya mu Bisonekwa?

[DO NOT SET] References

1. The Finished Mystery, posthumous work of Pastor Russell, 1917, (International Bible Students Association, Brooklyn, NY), Table of Contents.

2. The Watch Tower and Herald of Christ’s Presence, (magazine; Brooklyn, NY), March 1, 1925, pp. 67, 69.

3. Light, Book One, by Joseph F. Rutherford, 1930, (International Bible Students Association, Brooklyn, NY), Preface, p. 5;

Light, Book Two, by Joseph F. Rutherford, 1930, title page.

4. King James Version, [date], (The World Syndicate Publishing Co., Cleveland, OH), Romans 13:1.

5. The Watch Tower and Herald of Christ’s Presence, June 1, 1929, pp. 163, 167;

The Watch Tower and Herald of Christ’s Presence, June 15, 1929, p. 179.

6. The Watchtower, (magazine; Brooklyn, NY), December 1, 1962, pp. 709-23;

The Watchtower, November 15, 1962, pp. 681, 690, 692.

7. The Watchtower, November 15, 1962, p. 685.

8. The Watchtower, September 1, 1932, pp. 265-6;

The Watchtower, October 15, 1932, p. 319.

9. The Watchtower, June 1, 1938, pp. 163, 168;

The Watchtower, June 15, 1938, pp. 179, 187.

10. The Watchtower, October 1, 1971, p. 603;

The Watchtower, November 15, 1971, pp. 690, 696.

11. 1977 Yearbook of Jehovah’s Witnesses, Watch Tower Bible and Tract Society of Pennsylvania, 1976, (Watchtower Bible and Tract Society of New York, Inc., Brooklyn, NY), pp. 258-9;

The Watchtower, January 1, 1977, pp. 15-16.

12. The Watchtower, April 15, 1992, p. 31.

13. The Watchtower, November 1, 1939, pp. 323, 329.

14. The Watchtower, July 1, 1945, pp. 198-200.

15. Zion’s Watch Tower and Herald of Christ’s Presence, (magazine; Allegheny, PA), August 1, 1895, pp. 182-3.

16. The Watchtower, June 1, 1973, pp. 339-40.

17. Jehovah’s Witnesses—Proclaimers of God’s Kingdom, Watch Tower Bible and Tract Society of Pennsylvania, 1993, (Watchtower Bible and Tract Society of New York, Inc., Brooklyn, NY), pp. 179-80;

The Watchtower, September 1, 1980, pp. 29-30.

18. The Watchtower, October 1, 1979, pp. 18, 22, 26.

19. The Watchtower, February 15, 1984, pp. 11, 14, 16-17.

20. The Watchtower, January 1, 1987, p. 24.

21. The Divine Plan of the Ages, Charles T. Russell, 1907, (Watch Tower Bible & Tract Society, Allegheny, PA), cover and title page.

22. King James Version, Luke 2:14.

23. ”The Nations Shall Know That I Am Jehovah”—How?, Watch Tower Bible and Tract Society of Pennsylvania, 1971, Watchtower Bible and Tract Society of New York, Inc., Brooklyn, NY), pp. 364-5;

God’s Kingdom of a Thousand Years Has Approached, Watch Tower Bible and Tract Society of Pennsylvania, 1973, (Watchtower Bible and Tract Society of New York, Inc., Brooklyn, NY), p. 409;

Man’s Salvation Out of World Distress at Hand, Watch Tower Bible and Tract Society of Pennsylvania, 1975, (Watchtower Bible and Tract Society of New York, Inc., Brooklyn, NY), pp. 280-1.

24. U.S.News & World Report, (magazine; Washington, D.C.), May 3, 1993, p. 72.