Ingidijai Bijila Bya Kristu Mu Būmi Bwenu

“Mwiselelei byakwimulemena bānwe bene na bene, nankyo umbafikija ponka pa mukanda-wabijila wa Kidishitu.”​—NGALATEA 6:2.

MU Rwanda, kitatyi kyapityile kunyuma’ki, ba Tumoni twa Yehova ba Hutu ne ba Tutsi, batudile būmi bwabo pa kyaka mwanda wa kusaka kupandija banababo mu lwitabijo kitatyi kyālupukile divita dya bisaka mu yabo ntanda. Mu Japon, ba Tumoni twa Yehova bavule bāshele na kyāso kikatampe pa kujimija bantu ba mu kyabo kisaka mu kintenshi kyāipaile bantu bavule mu Kobe. Ino, bāendele na kampeja-bukidi kukapandija bakwabo bātenwe na kino kisuwa. Bine, bimfwa bivule bitamba kujokoloka ntanda yonso bileta ne kyanga ku mutyima, bilombolanga’mba bijila bya Kristu bilupulanga bipa dyalelo. I bukomo butulumukwa butonwena bantu ku biyampe.

² Mu kitatyi kimo kyonka, bupolofeto bwa mu Bible butala pa “mafuku a kumfulo” nabo bwendanga bufikidila. Bantu bavule ‘bedingakanyanga bu ba bwine-Leza’ ino “bukomo bwa bu-bwine Leza bafutulwile’bo.” (2 Temote 3:​1, 5) Nakampata mu Bipwilo bya Ki-kristu, pavule mutōtelo i kisela’tu bitupu, ke mwandapo ukunka ku mutyima. Lelo i pamwanda bijila bya Kristu i bikomo kwingidija umbūmi? Mhm. Yesu kādipo ukokeja kwitupa bijila bikomo kulonda. Bipwilo bya Ki-kristu i bikomenwe kwivwanija buluji bwa bino bijila. Kebilondangapo bino binenwa bya ku bukomo bwa mushipiditu: “Mwiselelei bya kwimulemena bānwe bene na bene, nankyo umbafikija ponka pa mukanda-wabijila wa Kidishitu.” (Ngalatea 6:2) ‘Tufikidijanga bijila bya Kristu’ na kwiselela bitundu byetu bilema umo ku mukwabo, ke na kwiulapo Bafadiseo ne kubwejeja banabetu bintu bilema ku biselwa byabo.

³ Mu bijila bya Kristu mudi mbila yonso ya Kristu Yesu​—ikale itala pa kusapula ne kufundija, pa kwikala na dīso dipēla ne ditōka, mu kukimba ndoe na banabetu ne kwiilama, nansha ke mu myanda itala kufundula bubi mu kipwilo. (Mateo 5:​27-​30; 18:15-​17; 28:19, 20; Kusokwelwa 2:​14-​16) Nabubine, bakristu bafwaninwe kulemeka mbila yonso ya mu Bible itala balondi ba Kristu. Ne kudi myanda mikwabo mivule. Bulongolodi bwa Yehova ne bipwilo byonso kimo ne kimo, bifwaninwe kutūla’ko mbila ya kamweno ne bulombodi mwanda wa kulama ndudi milumbuluke. (1 Kodinda 14:33, 40) Bine, bakristu kebādipo bakukokeja kubungakana pamo shi kebādipo na mbila nansha imo itala pa nsāa, kifuko, ne muswelo wa kupityija kupwila kwabo! (Bahebelu 10:24, 25) Kwitabija bulombodi bulumbuluke buletwa na boba bapelwe lupusa mu bulongolodi, i muswelo umo wa kuvuija bijila bya Kristu.​—Bahebelu 13:17.

⁴ Inoko, bakristu babine kebalekelepo mutōtelo wabo wikale kulemenenwa na bijila byabituputupu byakubulwa mvubu. Kebengidilangapo Yehova amba mwanda muntu kampanda nansha bulongolodi ye abo bwibasoñanya kwikilonga. Ino buswe ye abo bukomo bwibakunka ku mutyima mu butōtyi bwabo. Polo wāsonekele’mba: ‘Buswe bwa Kristu bwituningilanga.’ (2 Kodinda 5:​14, kunshi kwa dyani) Yesu wāsoñenye balondi bandi besanswe umo ku mukwabo. (Yoano 15:12, 13) Buswe bwakubulwa kwisakila ye kitako kimanine’po bijila bya Kristu, kadi butononanga nansha kukunka bakristu babine ku mutyima konso kobatanwa, mu kisaka nansha mu kipwilo. Tutale i muswelo’ka.

Mu Kisaka

⁵ Mutumibwa Polo wāsonekele’mba: “Balume nenu sanswai bakaji benu, monka musanshilwe Kidishitu kipwilo, wēpanine ponka pa akyo.” (Efisesa 5:​25) Wivwane mulume wiulanga Kristu ne kukwatakanya mukajandi na buswe ne kumwivwana, nankyo uvuijanga kipindi kikatampe kya bijila bya Kristu. Kadi, Yesu wālombwele patōka buswe ku twāna tutyetye, na kwitutekuna mu maboko andi, na kwitutenteka makasa, ne kwitwesela dyese. (Mako 10:16) Bambutwile bavuija bijila bya Kristu nabo balombolanga buswe ku babo bana. I bine, kudi bambutwile bakwabo bamwene bu i kikomo kwiula kimfwa kya Yesu pa uno mwanda. Bakwabo kebadipo na kibutwila kya bya kunena-nena. Banwe bambutwile, kemukilekai mwikadilo wa uno muswelo wimukankaje kulombola buswe bwenu ku benu bana! Kekifwaninwepo ku wenu mutamba kuyuka’tu bitupu amba musenswe benu bana mhm. Nabo bafwaninwe kwikiyuka. Ne kebakekiyukapo poso enka banwe bene mukimbe muswelo wa kwibalombola buswe bwenu.​—Enzankanya na Mako 1:11.

⁶ Kadi, bana basakilwanga kukadilwa mikalo, kino kishintulula’mba bambutwile bafwaninwe kwibatungila mbila ne kwiiningisha kyaba kimo na madingi ne mfuto. (Bahebelu 12:7, 9, 11) Nansha nankyo, bana bafwaninwe kukwashibwa bityebitye mwanda wa bevwanije buluji bwa ino mbila​—amba bambutwile babo bebasenswe. Ne kadi bafwaninwe kwifunda kuyuka’mba buswe ye bubajinji bufwaninwe kwibatonona bakōkele bambutwile babo. (Efisesa 6:1; Kolose 3:​20; 1 Yoano 5:3) Kitungo kibajinji kifwaninwe kwitungila bambutwile i kufundija bana bankasampe bamone muswelo wa kwingidija “bukomo bwa buluji” bwabo mwanda wa kutyiba mbila milumbuluke mu myanda ibatala abo bene. (Loma 12:1; enzankanya na 1 Kodinda 13:11.) Ku mutamba mukwabo, mbila keifwaninwepo kwikala mivule nakampata, bulemununi nabo kebufwaninwepo kwikala busanshija bipitepite. Polo unena’mba: “Banwe bashabo nenu, kemukisomba bāna benu, mwanda wa kunena’mba, bakanyoñama pa mutyima.” (Kolose 3:​21; Efisesa 6:4) Shi bijila bya Kristu i bibikale mu kipango kyenu, kemukekalapo kyaba kya midiululo itapa ku mutyima nansha kulemununa bana na bulobo bupitepite. Mu kisaka kya uno muswelo, bana bakeivwana bu bakingwe senene ne bakwatakanibwe biyampe, kebakeivwanapo bu balemenenwe nansha batyinibwe mbavu.​—Enzankanya na Mitōto 36:7.

⁷ Boba kebapempule mobo a ma Betele kujokoloka ntanda yonso banenanga’mba i bimfwa bilumbuluke bilombola ndingamano mu myanda itala muswelo ufwaninwe kutūlwa mbila mu kisaka. Nansha byokudi enka bantu batame, ino bino bitango bingidilanga umbumo pamo’nka bwa bisaka.a Mingilo ya ku Betele i mikomo bininge, ne ilombanga buvule kampanda bwa mbila​—eyo, kutabuka yoya ikokeja kutulwa mu kisaka. Inoko, bakulumpe badi kumeso mu mobo a ma Betele, mu mabilo ne mu bitampilo, baloñanga buninge bwa kwingidija bijila bya Kristu. Kebekimonangapo enka bu kiselwa kya kulongolola mwingilo bitupu, ino bekimwene ne bu kyepelo kibapa muswelo wa kukwasha balunda nabo mu mingilo bendelele ku mushipiditu ne kushinsakanya “nsangaji ya Yehova” umbukata mwabo. (Nehemia 8:​10) Omwanda, bēelelanga’ko mwanda wa kulonga bintu mu muswelo ūbaka ne ukankamika ne kulonga bukomo mwanda wa bekale bu bantu bakubulwa kaninga-mpo. (Efisesa 4:​31, 32) Omwanda bisaka bya ku ma Betele i biyukane pamwanda wa mushipiditu wabyo wa nsangaji.

Mu Kipwilo

⁸ Kitungo kyetu mu kipwilo i kimo kyonka, tufwaninwe kwiūbaka umo ku mukwabo mu mushipiditu wa buswe. (1 Tesalonika 5:​11) Omwanda bakristu bonso bafwaninwe kudyumuka kutyina’mba bakabwejeja bintu bilēma ku kitundu kya bakwabo, na kwibaningila betabije milangwe yabo mu myanda ilomba butongi butala muntu aye mwine. Kyaba kimo, kudi bantu bekalanga basonekela Sosiete Watch Tower mwanda wa kwipangula mbila ifwaninwe kulondwa mu myanda itala butongi bwa mafilime, mabuku, ne makayo. Ino, Sosiete kadipo na lupusa lwa kulonda-londa tumyanda tonso kamo ne kamo ne kutūla’po mbila. Pavule, ino i myanda ifwaninwe muntu ne muntu nansha mutwe wa kisaka aye mwine kutyiba, na kwimanina pa buswe bwandi butala pa misoñanya ya mu Bible. Bakwabo nabo balamunanga madingi ne bulombodi buletwa na Sosiete bu mbila. Kimfwa, mu Kiteba kya Mulami kya mu 15 kweji 3, 1996, mwādi kishinte kilumbuluke kikankamika bakulumpe balonge kitatyi ne kitatyi bupempudi bwa bukumbi ku bekadi bonso ba pa kipwilo. Lelo kitungo kyādi kusaka kutūla’ko mbila? Mhm. Nansha bamo-bamo babwanya kulonda ano madingi byobamwenanga’mo kamweno kavule, ino bakulumpe bakwabo kebadipo na muswelo wa kwikilonga. Muswelo umo onka, kishinte “Bipangujo bya Batangi” kyālupukile mu Kiteba kya Mulami kya mu 4 kweji 1, 1995 (Falanse), kyāletele madingi pa mwanda utala kutyepeja bulēme bwa lubatyijo na kulonga bintu byakubulwa kwendela’mo, kimfwa kuteakanya mafetyi nansha kwela makasa mūlu mwanda wa kulombola bushindañani. Bakwabo bāingidije ano madingi a tunangu mu muswelo wakubulwa kwendela’mo, kimfwa na kutūla mbila’mba kutumina muntu kakanda kakumufwijako mu kino kitatyi, i kibi!

⁹ Kadi, tuyukei’mba shi “kijila kibwane kya bu-mwana-pabo” i kibikale umbukata mwetu, tufwaninwe kwitabija’mba mutyima wa mundamunda wa mukristu umo ne umo keudipo pamo. (Yakoba 1:​25) Lelo tukafitwa kitatyi kikalonga bantu butongi bwa abo bene mu myanda yakubulwa kujilula misoñanya ya mu Bisonekwa? Mhm. Shi tulonge uno muswelo nankyo kikaleta nkalañani. (1 Kodinda 1:​10) Polo wētudyumwine pa mwanda utala kutopeka balunda netu bakristu amba: “Emane i kudi Mfumwandi wandi, ne kupona nako monka. I binebine ukēmikwa ke-muntu Yehova udi ne bukomo bwa kumwimanija.” (Loma 14:4) Shi twikale kwinenena bibi umo ku mukwabo mu myanda ifwaninwe kuleka mungya mutyima wamundamunda wa muntu ne muntu, nankyo tukafityija Leza pa mutyima.​—Yakoba 4:​10-​12.

¹⁰ Kadi, tuvulukei’mba bakulumpe i bapebwe kiselwa kya kulela luombe lwa Leza. (Bilongwa 20:28) Badiko mwanda wa kukwasha. Ketufwaninwepo kwikaka kwibobolola mwanda wa kwibalomba madingi, ke-pantu i befundi ba Bible kadi bayukile senene myanda mivule yēsambilwe’po mu mabuku a Sosiete Watch Tower. Shi bakulumpe abamone muntu kampanda kadi na mwiendelejo ukokeja kumufikija ku kujilula misoñanya ya mu Bisonekwa, bakamupa madingi amusakila pakubulwa moyo. (Ngalatea 6:1) Bantu ba mu kipwilo balondanga bijila bya Kristu na kwingidila pamo na bano bakumbi baswedibwe, bebatangidile kumeso.​—Bahebelu 13:7.

Bakulumpe Bengidijanga Bijila bya Kristu

¹¹ Bakulumpe badi na bupyasakane bwa kusaka kuvuija bijila bya Kristu mu kipwilo. Batangidile kumeso mu busapudi bwa myanda miyampe, kadi bafundijanga na kwimanina pa Bible mwanda wa kutenga pa mityima ya bantu, ne kwisamba na boba “bampungiji ya ku mutyima” pamo bwa bakumbi ba buswe ne ba kanye. (1 Tesalonika 5:​14) Bepukanga mikadilo yakubulwa kukwatañana na bwine-kristu idi mu Bipwilo bya Ki-kristu. Nabubine, ino ntanda yendanga yoneka lubilolubilo, omwanda pamo’nka bwa Polo, bakulumpe bakokeja kwivwana mutyima kuzumbazumba pamwanda wa kamweno ka luombe; ino balamanga ndingamano kitatyi kyo bavuija ino mingilo.​—2 Kodinda 11:28.

¹² Kimfwa, padi mukristu umo ukokeja kusaka kwisamba na mukulumpe pa mwanda umo wa mvubu mikatampe wakubulwa kulombolwa patōkelela mu Bisonekwa nansha ulomba kwikala na ndingamano mu myanda itala misoñanya ya bwine-kristu. Padi abamukandija pa kitenta ku mingilo kikamuletela lupeto luvule, inoko kimulomba biselwa bikatampe. Nansha kadi, padi shabana wakubulwa kwitabija uningilanga wandi mwana nkasampe mukristu alonge kintu kampanda kikokeja kuvutakanya wandi mwingilo. Mu myanda ya uno muswelo, mukulumpe ufwaninwe kwikaka kuleta milangwe ya aye mwine. Ino, ukengidija Bible ne kukwasha uno muntu alanguluke pa misoñanya milumbuluke itanwa’mo. Ukokeja kwingidija Publications de la Société Watch Tower — Index, shi udi nandi, mwanda wa kukimba’mo byānene “umpika wabinebine ne wa manwa,” ne mu Kiteba kya Mulami nansha mu mabuku makwabo, pa uno mwanda. (Mateo 24:45) Ino lelo kikekala namani shi mukristu watyibe mbila imweka bu yakubulwa kwendelamo kumeso a mukulumpe? Shi keikokejapo kujilula patōkelela misoñanya nansha bijila bya mu Bible, nankyo mukristu ufwaninwe kuyuka’mba mukulumpe uyukile bwanapabo budi na muntu ne muntu butala pa kutyiba mbila aye mwine mu myanda ya uno muswelo, na kuyuka’mba ‘umo ne umo ukeselelanga kitundu kyandi.’ Inoko, mukristu ufwaninwe kuvuluka’mba ‘kyonso kikuna muntu, ye kyonka kyakangula.’​—Ngalatea 6:​5, 7.

¹³ Mwanda waka mukulumpe wa manwa ufwaninwe kulonga uno muswelo? Nakampata i pamwanda wa buluji bubibi. Dibajinji, Polo wālombwele kipwilo kimo amba kādipo ‘mfumwandya lwitabijo lwabo.’ (2 Kodinda 1:​24) Kitatyi kyakwasha mwanabo na kulanguluka nandi pa Bisonekwa ne na kumuleka atyibe mbila aye mwine, pa kupwa kwa kumushintulwila byonso, uno mukulumpe ukeula ngikadilo yādi na Polo. Uyukile’mba lupusa lwandi ludi na mikalo, pamo’nka na mwādi muyukile Yesu’mba lupusa lwandi lwādi na mikalo. (Luka 12:13, 14; Yude 9) Inoko kadi, bakulumpe bapānanga madingi a bukwashi emanine pa Bisonekwa, kyaba kimo pakubulwa kafinda shi ye mokisakila. Kyabubidi, i pamwanda wa kufundija mulunda nandi mukristu. Mutumibwa Polo wānene’mba: “Bidibwa bikomokomo i bya boba ke bapwe kutama; ke boba kadi badi ne byakwivwana nabyo byabo bībidile kala bya kuyūkidila ne bulumbuluke ne bibi.” (Bahebelu 5:​14) Pa kunena’mba tutame kumushipiditu, tufwaninwe kwingidija byakwivwana nabyo byetu, ketufwaninwepo nyeke kukimba enka muntu mukwabo etupe kilondololwa. Mukulumpe ulombola mulunda nandi mukristu muswelo wa kulanguluka pa Bisonekwa, nankyo umukwashanga endelele kumeso.

¹⁴ Tufwaninwe kukulupila’mba Yehova Leza ukatenga mityima ya batōtyi babinebine kupityila ku mushipiditu sandu wandi. Omwanda, bakristu batame kumushipiditu bateñanga mityima ya banababo, ne kwibesashila, pamo na mwēkilongēle Polo. (2 Kodinda 8:8; 10:1; Filemone 8, 9) Polo wādi uyukile’mba bantu bakubulwa boloke ye abo basakilwa nshintulwilo ya bijila kamo ne kamo mwanda wa bekale na būmi bukwatañane senene na bino bijila, ke bolokepo, mhm. (1 Temote 1:9) Binenwa bya Polo kebilombolapo’mba wādi ufwatakenya banababo bibibibi nansha kubulwa kwibakulupila, ino bilombola’mba wādi wibakulupile. Wāsonekele kipwilo kimo’mba: “E mo twimukulupidile mudi Mfumwetu.” (2 Tesalonika 3:​4, MB) Bine, lwitabijo lwa Polo, kikulupiji ne kusumininwa kwandi byākankamikile boba bakristu ba mu Tesalonika. Bakulumpe ne batadi bendakana nabo dyalelo badi na kitungo kimo kyonka. Bine, bano bana-balume bakikōkeji batalajanga mityima ya bantu, bu bakumbi babuswe ba luombe lwa Leza!​—Isaya 32:​1, 2; 1 Petelo 5:​1-3.

Kwingidija Bijila bya Kristu Umbūmi

¹⁵ Tufwaninwe kwibandaula batwe bonso kitatyi ne kitatyi mwanda wa kuyuka shi twingidijanga bijila bya Kristu ne kukankamika bakwabo nabo balongele monka. (2 Kodinda 13:5) Nabubine, kikekala kya kamweno ku batwe bonso shi twīipangule’mba: ‘Binenwa byami byūbakanga’ni nansha mfutululanga’nka bakwabo? Ngidi na mutyima mutūke’ni nansha ngidi na kaninga-mpo? Le ndemekanga milangwe ya bakwabo’ni nansha nsenswe’nka kūminina ku byonsaka ami mwine?’ Mukristu kafwaninwepo kutyibila mwanabo i ditabula’ka dyafwaninwe kulonda nansha dyakafwaninwe kulonda mu myanda keitale Bible.​—Loma 12:1; 1 Kodinda 4:6.

¹⁶ I kya mvubu mikatampe kotudi kukimba miswelo ya kwikankamika umo ku mukwabo, mu kino kitatyi kya malwa. (Bahebelu 10:24, 25; enzankanya na Mateo 7:​1-5.) Kitatyi kyotutala banabetu ba tutu ne ba kaka, ngikadilo yabo miyampe lelo keidipo na mvubu kutabuka bukokekoke bwabo? Kumeso a Yehova umo ne umo udi na bulēme. Ino, i kintu kileta lusa pa kumona’mba ke bonsopo bekimwene mu uno muswelo, nansha ke pa mwanda wibatala abo bene. Bantu bavule bamonanga’nka bubi bwabo ne kubulwa kubwaninina kwabo. Shi tusaka kukankamika bantu ba uno muswelo​—ne bakwabo​—lelo ketukokejapo kutompa kwisamba na muntu umo nansha na babidi difuku ne difuku dya kupwila, ne kwibalombola bu tusangelanga bininge kutanwa kwabo ku kipwilo ne bukwashi bukatampe bobaleta pa kipwilo? I kya nsangaji mikatampe pa kwibapēleleja uno muswelo byakwibalemena byabo na kuvuija bijila bya Kristu!​—Ngalatea 6:2.

Bijila bya Kristu Bilupulanga Bipa!

¹⁷ Bijila bya Kristu bilupulanga bipa mu kipwilo kya bwine-kristu. Twikimonanga difuku ne difuku​—kitatyi kisapulanga ba Tumoni banabetu myanda miyampe, po beseñanga ne kwikankamika umo ku mukwabo, po balwanga mwanda wa kwingidila Yehova nansha byo batanwa na makambakano makomokomo, kyaba kiloñanga bambutwile bukomo bwa kufundija bana basanswe Yehova na mutyima wa nsangaji, kitatyi kifundijanga bakulumpe Kinenwa kya Leza na buswe, ne na kyanga, na kusombela luombe ku bupyasakane bwabine bengidile Yehova nyeke ne nyeke. (Mateo 28:19, 20; 1 Tesalonika 5:​11, 14) Wivwane umo ne umo umbukata mwetu engidije bijila bya Kristu umbūmi bwandi, bine kikatōkeja Yehova ku mutyima! (Nkindi 23:15) Usakanga bantu bonso basenswe bijila byandi bibwaninine bamone būmi bwa nyeke ne nyeke. Mu Paladisa ikaya kumeso, tukamona kitatyi kikekala bantu umbubwaninine, kitatyi kikatukila bantu bajilula bijila, ne kitatyi kyotukayuka kuludika mwīivwanino onso wa mu mityima yetu. Bine, mu kwingidija bijila bya Kristu, mudi mpalo ya ntumbo!

[Kunshi kwa dyani]

[Bipangujo]

1. Mwanda’ka tukokeja kunena’mba dyalelo bijila bya Kristu i bukomo butulumukwa butonwena ku biyampe?

2. I muswelo’ka ubudilwe kwivwanija Bipwilo bya Ki-kristu buluji bwa bijila bya Kristu, ne tukokeja kulonga kika mwanda wa kuvuija bino bijila?

3. (a) Lelo i mbila’ka imo imo idi mu bijila bya Kristu? (b) Mwanda’ka kikekala kyakubulwa kwendelamo kulanga’mba kipwilo kya bwine-kristu kekifwaninwepo kwikala na mbila mikwabo poso enka mbila ya Kristu kete?

4. I bukomo’ka butonwena bantu ku mutōtelo utōka?

5. (a) I muswelo’ka ukokeja bambutwile kuvuija bijila bya Kristu mu kisaka? (b) Bana basakanga kika kudi bambutwile babo, ne i bijika’ka bifwaninwe kulwa na bambutwile bamo-bamo mwanda wa kwibapā’kyo?

6. (a) Lelo bana basakilwanga mbila ya bambutwile, ne mwanda waka ubalondolola uno muswelo? (b) Bana bafwaninwe kwivwanija buluji’ka bwinebwine bwimanine’po mbila ya mu kisaka? (c) I byaka’ka bikepuka kisaka shi bantu badimo balēmeke bijila bya Kristu?

7. I kimfwa’ka kileta mobo a ma Betele mu myanda itala kutūla mbila mu kipango?

8. (a) Lelo i kitungo’ka kyotufwaninwe kwikala nakyo nyeke mu kipwilo? (b) Bantu bamo-bamo bāikele kulomba nansha kupima kutūla’ko mbila mu myanda’ka imo-imo?

9. Mwanda waka ketufwaninwepo kwifutulula nansha kwitopeka-topeka umo ku mukwabo?

10. I bāni bapelwe lupusa lwa kukwatakanya kipwilo, ne i muswelo’ka otufwaninwe kwibakwasha?

11. Bakulumpe bengidijanga muswelo’ka bijila bya Kristu mu kipwilo?

12. Mukulumpe ukokeja kulondolola namani, kitatyi kimufwena mukristu kampanda usaka kupebwa bukwashi?

13. Mwanda waka bakulumpe bafwaninwe kukwasha bakwabo balanguluke senene pa yabo myanda, kyaba kya kwibapa malondololo patōkelela?

14. Bantu batame kumushipiditu, i muswelo’ka obakokeja kulombola’mba bakulupile mudi Yehova?

15. I bipangujo’ka byotukokeja kwīipangula tuyuke shi twingidijanga bijila bya Kristu mu kipwano kyetu na banabetu?

16. I muswelo’ka otukokeja kukwasha boba badi na milangwe yakubulwa kwendelamo itala pa ngikadilo yabo, mwanda wa kuvuija kipindi kya kamweno kya bijila bya Kristu?

17. Bijila bya Kristu bilupulanga bipa mu miswelo’ka mishileshile pa kipwilo kyenu?

[Kapango pa paje 30]

Benu bana basakanga buswe pakatampe

[Kapango pa paje 31]

Bakulumpe betu baswedibwe betutalajanga mityima mu muswelo mulumbuluke!

Ulanga Namani?

◻ Mwanda waka Bipwilo bya Ki-kristu i bikankalwe kwivwanija buluji bwa bijila bya Kristu?

◻ I muswelo’ka otukokeja kwingidija bijila bya Kristu mu kisaka?

◻ I kika kyotufwaninwe kwepuka, ne i kika kyotufwaninwe kulonga, shi tusaka kwingidija bijila bya Kristu mu kipwilo?

◻ I muswelo’ka ukokeja bakulumpe kukōkela ku bijila bya Kristu mu kipwano kyabo na kipwilo?