Bintu bilongelwa Umbufyafya mu Dijina dya Mfumwetu
BOMBE wa mwishi wa sumu wasabikile mu Tokyo, mu Japon, mu kweji wabusatu 1995, waipaile bantu 12 badi mu kudiye wa panshi, wabēleka tununu ne tununu, ino kadi wavumbula kifibwe. Ba mu katango ka mutōtelo kayukilwe bu Aum Shinrikyo (Bubinebine bwa Peulu) baikele kungwija umbufyafya mata a mwishi wipaijana, obasaka kwingidija mu myanda yabo ya panshipanshi.
Kweji umo pa kupita’po, bombe waponena pa njibo ya kibikelo mu mukenza witwa bu Oklahoma City, mu Amerika (Etats-Unis), waipaya bantu 167. Kyamwekele patōka’mba, buluji bwine bwaelelwe uno bombe i kwipotomeja kwaikele kwipotomeja balupusa ba umbikalo na Musambo wa mutōtelo wa Davida udi mu Waco, mu Texas, myaka ibidi kunyuma. Pa kyakyo kyamalwa kyebatene pafwile kubwipi kwa bantu 80 ba mu mwine mutōtelo’wa. Kadi uno bombe waelelwe wasokwele kintu kikatampe kyadi kifibwe ku bantu bavule: Bisumpi bivule bya bantu babīkile byabulwi bengila mu Amerika, pano bantu bevwananga lupupuji amba, bimobimo umbukata mwabyo bikimbanga kuponeja umbikalo.
Mwenda mafuku, kumfulo kwa mwaka wa 1995, basokwele imbidi ya bantu 16 batēme mudilo, ilele mu dito dya kubwipi na Grenoble, mu France. Badi babadilwa mu boba bemanine Ndudi mu Tempelo ya Dyuba, kakitango katyutyu ka mutōtelo kaikele kusapulwa ku binanda mu ntanda ya Swazilande ne mu Kanada mu kweji wadikumi 1994, bino byonso byasapwilwe mu kitatyi kyafwile bantu 53 ba mu kano kakitango bakitatanwa ne dyalelo shi beyoele, nansha shi baipailwe. Ino nansha byokwaikele kino kimbalembale, kano kakitango kaendelele na kwingila. Nkuku yokakutyile ne bitungo byako byokakimba kufikila’po, bikidi bifyame kufika ne dyalelo.
Byaka bya Bifyame bya mu Mitōtelo
Pamwanda wa bino byonso’bi, kumona bantu baselele mityima kūlu pangala pa bisumpi bya mitōtelo, lelo i kintu kya kutulumuka? Na bubine, i kutupu muntu nansha umo usangelanga kwingila mu bulongolodi bulonga bintu umbufyafya—bwikale bwa mutōtelo, nansha ke bwa mutōtelopo—bumulubija mu kikulupiji kyandi ne bumukokela ku kulondalonda bitungo byakasakilepo. Shi kepano, lelo i kika kikokeja kulonga bantu mwanda wa kwepuka kuponena mu dikinga dya kutwela mu bitango byalakanwa bilonga bintu umbufyafya?
I kimweke patōka amba, muntu yense usaka kutwela mu kitango kilonga bintu umbufyafya, ufwaninwe kwikala’po na tunangu twa kujingulula bitungo byokilondalonda. Kafwaninwepo kuningilwa na balunda nansha na boba bamuyukile, ne kadi, kutyiba mbila kwandi kutala pa kutwela’mo nansha pa kuleka kutwela’mo kekufwaninwepo kwimanina pa milangwe ya kitumbuzaji, ino ifwaninwe kwimanina pa bintu biluji. Vuluka’mba, i aye kasuku kandi ye ukafikilwa na byobya byonso bikatamba’ko—ke bakwabopo.
Kulonda misoñanya ya mu Bible o muswelo ukulupilwa kutabuka, wa kujingulula bitango bileta kyaka bidi na bitungo bikobakane. (Isaya 30:21) Kino kilomba ne kulama mwimanino wa kuleka kwikuja mu myanda ya kipolitike, kulombola buswe ku bantu bakwabo, nansha ke ku balwana bene, kwepuka “mīngilo ya ngitu,” ne kutamija bipa bya mushipiditu wa Leza. Kutabukidila, bene Kidishitu babine kebafwaninwepo kwikuja mu myanda ya bwine-ntanda, mwanda Yesu kēkujije’mopo, uno mwimanino wandi ulombola amba, kekyendele’mopo kutwela mu bitango bilonga bintu umbufyafya.—Ngalatea 5:19-23; Yoano 17:14, 16; 18:36; Loma 12:17-21; Yakoba 4:4.
Batumoni ba Yehova abo i befundi ba Bible, befunda’ye na mutyima umo, bakwete na mutyika mukatampe lwitabijo lwabo, ne kadi pi na pi, bebayukile amba i bantu badi na būmi bukwatañane na lwitabijo lwabo. I bayukane kujokoloka ntanda yonso amba i kitango kya mutōtelo ‘kikimba ndoe ne kulonda’yo.’ (1 Petelo 3:11) Dibuku dyabo Les Témoins de Jéhovah: Prédicateurs du Royaume de Dieu dinena pa uno mwanda amba: “Batumoni ba Yehova ke kitangopo kya umbufyafya. Nkulupilo yabo imanine pa Bible i mishintululwe yonso mu mabuku abo akokeja kutangwa na muntu yense. Kadi baloñanga buninge bwabo bonso bwa kwita bantu bakwabo bāye batanwe ku kupwila kwabo, bemwene abo bene ne kuteja bintu biloñwanga’ko.”
Mutōtelo wabine keuloñangapo bintu umbufyafya. Abo Batumoni ba Yehova i batōtyi ba Leza wabine, kebafundijibwepo kufya bintu bya kwibayukila’po nansha byobemanine’po. Bene Kidishitu babajinji ba Yesu bāyujije Yelusalema yense mutuntulu na bufundiji bwabo. Kebādipo befinda na nkulupilo yabo nansha na mwingilo wabo. Mo monka mokikadile ne kudi Batumoni ba Yehova dyalelo. Omwanda nansha shi umbikalo kampanda wa kasusu ubebakankaja byakubulwa kwendela’mo kutōta mu bwanapabo, bano bene Kidishitu bafwaninwe kuvuija mwingilo wabo na budyumuku ne na bukankamane, ko kunena’mba, bafwaninwe kukōkela “kudi Leza, bantu munyuma” pa kintu kyo-kyonso kibaningilwa pamwanda wa busapudi bwabo bobasapula ku meso a bantu bonso.—Bilongwa 5:27-29; 8:1; 12:1-14; Mateo 10:16, 26, 27.
Shi wadi na milangwe ikulombola amba Batumoni ba Yehova i kakipwilo nansha kakitango ka umbufyafya, yuka amba i abe wadi kwebapotolwele biyampe. Mo monka mwādi mutatena ne bantu bavule mu myaka katwa imbajinji.
Bilongwa 28 witusapwila mwāpityile kubungakana kwābungakene mutumibwa Polo mu Loma na bamfumu ‘babuleme ba Bayuda.’ Bāmutentulula’mba: “Bātwe ketwatambwileko nansha mikanda ya uno mwanda obe ku Yudea, nansha bāna betu bāyako bene kebetusapwilangapo, nansha kukwisambila kamwanda kabi, mhm. Nanshi tusaka kukwivwana mwendele mutyima obe, ke-kintu kino kitango kya bakētutyilemo kibayūkibwa ne kuno ko tudi bātwe, kīsambilwa bibi konso konso.” (Bilongwa 28:16-22) Polo pa kwibalondolola, “webashintulwila mwanda ne kwibasapwila bya bulopwe bwa Leza,” ebiya “bamo bamo baitabija.” (Bilongwa 28:23, 24) Kano kadi katokwe kaendaenda kobadi kādi ka kuyuka myanda pa nkote itala pa bwine Kidishitu bwabine.
Batumoni ba Yehova i bepāne mu mwingilo wa Leza, obengilanga ku meso a bantu bonso, kebafyanga’opo, ino basangelanga kulombola bubinebine butala pa mwingilo wabo ne pa nkulupilo yabo ku muntu ye-yense usaka kuyuka bubinebine. Lelo wabulwapo kwibandawila senene abe mwine, umone kusapwilwa senene nkulupilo yabo?
[Kifwatulo pa paje 6]
Batumoni ba Yehova basenswe kwisokola patōka ku bakwabo ne kwibalombola bintu byonso byobaloñanga