Kwiteakanya ku myaka kanunu ko kwa mvubu!

MYAKA Kanunu ya Umbikalo wa Kidishitu ikaletela bantu byabuyabuya bya ntanda ne miseke. Bantu bakakūlwa ku ino ngikadilo ya bulanda ne kufikijibwa ku bubwaninine bwabinebine mu bwendeji bwa buswe bwa Yesu. Langa’po mobikekadila ku obe mutamba. Mukomo nkē! Lubanga ne lubanga ulanguka na bukomo kupita bowadi nabo kesha. Bana-balume, bana-bakaji ne bana tununu ne tununu batengele kukekala mu ino myaka ya nsangaji. Basumininwe amba idi’ko, balomba ifike. Kwifunda kobefundile Bible i kwibakulupije amba bino byabuyabuya byo byobakaloelelwa’mo.

Ino kumeso kwa uno Umbikalo wa Myaka Kanunu kushilula, Yesu Kidishitu ukatalula bidi bonso balwana na bubikadi bwandi. Ukebatalula ku bulwi bwitwa mu Bible bu Amakedona. (Kusokwelwa 16:16) Bene Kidishitu babine badi pano pantanda kebakalupo dino divita. I divita dya Leza. Kadi kedikalwibwapo mu kifuko kimo kete kya ntanda. Bible unena’mba dikafika mu mafinko a ntanda a kulampe kwa kulampe. Balwana na buludiki bwa Kidishitu bakepaibwa bonsololo. Kekudipo nansha umo ukapanda!—Yelemia 25:33.

Ebiya Yesu ukālamukila kudi Satana Dyabola ne bademona bandi. Fwatakanya mobikapityila pamo na mwēbimwenine mulembi wa mukanda wa Kusokwelwa, amba: “Namwene ne mwikeulu [Yesu Kidishitu] utūka mūlu, wa lufungulo lwa lupongo’lwa, ne [lukano] lukatampe byamalwa ku kuboko kwandi. Ino wakwata mukishi’wa, nyoka wa kala ne kalā, ke dyabola, Satana mwine, kadi, wamukuta myaka kanunu.” (Kusokwelwa 20:1, 2) Kupwa, Satana ne bademona bandi bakonakanibwa lonsololo.—Mateo 25:41.

Bantu “kibumbo kikatampe kīne kekibadibwapo na muntu” bakapanda ku Amakedona. (Kusokwelwa 7:9) Kidishitu ukebatwala ku biyampe bitamba “ku nsulo ya mema a būmi,” pamo bwa mukumbi utwala mikōko yandi ku mema a būmi. (Kusokwelwa 7:17) Bano bakapanda ku Amakedona bakakwashibwa bityebitye bamone kunekenya mutyima ulēmenene ku kusaka kulonga bubi, kutūla ne byobakafikila pa bubwaninine, papo Satana ne bademona bandi ba kukalakanya kwendelela kwabo kwa kumushipiditu ke kutupu’bo!

Mu buludiki bwa Kidishitu, būmi bukalumbuluka mpata. Yehova Leza, kupityila kudi Yesu Kidishitu, ukafundula bintu byonso bilengeja masusu ne bufudile. “Ukapampula impolo yonso mu meso abo; ne lufu nalo kelukēkalakopo dikwabo kadi, mhm, nansha kuyoyokota miyoa, nansha kudila kwine, nansha misongo mīne mpika.” (Kusokwelwa 21:4) Mupolofeto Isaya uvuya mwanda amba: “Penepa kadi meso a bampofu akapūtulwa, ne matwi a babitwi akajikulwa. Ponkapo usunkuta ukatumbuka’nka bwa kasha kalume, ne ludimi lwa kamama lukembanga.” (Isaya 35:5, 6) Ne bāfwile bene, “bakatampe ne batyetye,” bakasangulwa ke bōmi, kupwididile kebakikafupo dikwabo!—Kusokwelwa 20:12.

“Kibumbo kikatampe” kya bantu bakapanda ku Amakedona kikikongakanibwa ne dyalelo dino. Beteakanyanga ku Umbikalo wa Myaka Kanunu wa Kidishitu. Nansha byokebayukile kitatyi kikashilula uno umbikalo, bakulupile amba ukashilula binebine, pakabwana kitatyi kitungilwe na Leza. Ukokeja kubadilwa nobe umbukata mwabo, ino kikusakila bidi kwiteakanya. Kuno kwiteakanya ke kwa kupotejapo bintu byobe koenda ku kifuko kampanda, mhm, i kwa kutambula buyuki bwabinebine bwa kuyuka Yehova Leza ne mpango yandi kupityila ku kifundwa kya Bible. Batumoni ba Yehova bakasepelela kukulombola mwa kwifundila Bible mwanda wa abe ne kisaka kyobe mumwene’mo kamweno, pambulwa kufuta. Balembi ba dino dipepala bakasepelela kukusapwila’ko myanda mikwabo.

[Box on page 7]

Myaka kanunu—yabine’ni nansha ya kyelekejo?

Kudi kipangujo kiipangulwa, mwanda bintu bivule bidi mu mukanda wa Kusokwelwa byāsonekelwe mu muneneno wa kyelekejo. Lelo Myaka Kanunu ya Umbikalo wa Kidishitu itelelwe mu Kusokwelwa nayo? I kitatyi kyabine’ni nansha i kya kyelekejo?

Kudi bintu bivule bilombola patōka amba ino myaka kanunu i yabine. Ivwana: Mutumibwa Polo wātelele Umbikalo wa Myaka Kanunu wa Kidishitu bu difuku, dyakatyibila bantu mambo. (Bilongwa 7:31; Kusokwelwa 20:4) Mutumibwa Petelo nandi amba difuku dimo (nsaa 24) kudi Yehova i bwa kanunu ka myaka. (2 Petelo 3:8) Kino kilombola amba dino “difuku” dya butyibi dikalāla myaka kanunu yabinebine. Kadi tutanga mu Kusokwelwa 20:3, 5-7 misunsa iná mituntulu pa bifuko pala pala amba “myaka kanunu.” Kino kishima byokibadikilwa mu bulungu na ntangye mupotoloke (article défini), nanshi kifunkilanga pa kitatyi kidi na bula kampanda.