Lelo Leza Udi’ko Bine?
Mulondolwelanga bantu:
◼ “Udi konso, mu bintu byonso. Udi’nka bwa luvula.”
◼ “I ñeni mikomo kujingulula, i bukomo kebumweka.”
Le Yesu wānene’po namani?
◼ “Mu kipango kya Tata mudi bikalo bivule bīne.” (Yoano 14:2) Yesu wānene amba Leza udi na njibo ya kyelekejo, kīkalo mwashikete.
◼ “Nafundukile konka kudi Tata naiya panopantanda. Kadi ke nshie panopantanda ñende kudi Tata.” (Yoano 16:28) Yesu wādi ukulupile amba Leza ushikete mu kifuko kipotoloke.
YESU kānenepo nansha dimo amba Leza i bukomo kampanda kebumweka. Ino wādi wisamba nandi ne kulombela kwadi. Divule wādi wita Yehova bu Tata udi mūlu, binenwa bilombola amba upwene na Leza binebine.—Yoano 8:19, 38, 54.
Na bubine, i kutupu “nansha umo wamwenepo Leza,” ke-muntu “Leza i mushipiditu.” (Yoano 1:18; 4:24) Ino byadi mushipiditu, ke kunenapo amba kadipo na umbidi kamukaya, mhm. Bible witulombola amba: “Kudi ngitu ya bu-muntu kadi, kudi ne ngitu ya bu-mushipiditu.” (1 Kodinda 15:44) Penepa le Yehova udi na ngitu ya ku mushipiditu?
Eyo udi nayo. Yesu pa kusanguka, wātwelele “monka momwa mūlu, kwitumwekela ponka pano bātwe pa mpala ya Leza.” (Bahebelu 9:24) Kino kitufundija myanda ibidi mikatampe itala padi Leza. Umbajinji, Leza udi na kifuko kyashikete. Mwanda wa bubidi i uno amba udi’ko bine, ke bukomopo bwampikwa kuyukana budi konsokonso, ehe.
Shi ke pano, le bukomo bwandi bufikanga konsokonso namani? Leza utumanga mushipiditu sandu wandi, bukomo bwingila, mu diulu ne ntanda yonso. Leza upānanga mushipiditu sandu wandi mwanda wa kufikidija mpango yandi pamo’nka bwa shabantu ubāla kuboko kwandi pa kusenga ne kukwatakanya bandi bana.—Mitōto 104:30; 139:7.
Leza byadi’ko, nanshi wikalanga na ngikadila kampanda yasangela, udi na byaswile ne byashikilwe—udi na milangwe. Bible witulombola amba uswele bantu bandi, usangelanga mingilo yandi, ushikilwe kutōta bankishi, ne ufitwanga pa kumona bubi. (Ngalwilo 6:6; Kupituluka 16:22; 1 Balopwe 10:9; Mitōto 104:31) Mu 1 Temote 1:11, Leza utelwa’mo bu “Leza wa dyese ne dyesepo.” O mwanda mwine Yesu wānene amba tukokeja kwifunda kuswa Leza na mutyima wetu onso!—Mako 12:30.a
[Kunshi kwa dyani]
a Shi usaka kuyukila’ko bivule pa uno mwanda, tala dibuku Lelo I Bika Bine Bifundija Bible? shapita 1, dilupwilwe na Batumoni ba Yehova.
[Bushintuludi pa paje 5]
Leza upānanga mushipiditu sandu wandi mwanda wa kufikidija mpango yandi pamo’nka bwa shabantu ubāla kuboko kwandi