Mushipiditu Sandu Bukomo Bosakilwa mu Būmi

“KOKANSONSOLOLA mu kifuko kyobe; kadi kokantekuna mushipiditu obe ukola.” (Mitōto 51:11) Luno lo lulombelo lwa kininga lwa Mulopwe Davida pa wāpwile kuluba bikatampe.

Davida wēmwenine myaka mivule bukomo bwa mushipiditu sandu. Pa wādi ukidi nkasampe, wāmukweshe anekenye Ngodiata—sola ulenga nzuba. (1 Samwele 17:45-50) Kadi wāmupele bukomo bwa kusoneka ñimbo ya mitōto itobala kashā. Davida wānene amba: “Mushipiditu wa Yehova wesambile padi ami, kadi kinenwa kyandi kyādi pa ludimi lwami.”—2 Samwele 23:2.

Yesu Kidishitu aye mwine ubingija mwingilo wa mushipiditu sandu mu būmi bwa Davida. Difuku dimo, Yesu wālombwele bemvwaniki bandi amba: “Aye mwine Davida wanenene monka mu Mushipiditu Sandu amba: Yehova wanenene Mfumwami amba: Shikata ku lundyo lwami poso ntūle bidi bakukushikwa panshi ke pa kitūlo-kyamaulu obe.” (Mako 12:36; Mitōto 110:1) Yesu wāyukile amba pāsonekele Davida uno mutōto, wāludikilwe na mushipiditu sandu. Lelo netu tukwashibwanga na uno mushipiditu sandu umo onka?

“Mwikale Kulomba, Nabya Mukapebwa’kyo”

Shobe, kubwanyapo kusoneka mitōto. Ino ukokeja padi kulwa na bikoleja bilenga moyo pamo bwa kampangala Ngodiata. Tala kimfwa kya Isabel.a Mulumyandi wātombokēle kwa kansongwakaji. Wamushila mulwi wa nkongole, kwampikwa kumupa lupeto lwa kumukwasha alele bana babo babidi bana-bakaji. Isabel unena’mba: “Nemwene bu kisumbule, kintya kya bituputupu. Inoko, tamba kasha unshiya, namwene amba mushipiditu sandu i munkwashe.”

Lelo Isabel wadi wilaija mushipiditu sandu wiile ao mwine? Mhm, wadi ulomba Leza difuku ne difuku amutumine’o. Wadi uyukile amba usakilwa bukomo bwa Leza bwa kumukwasha akomene na kininga bisa kumutana, alele bana senene, ne kwimona monka bu muntu. Walamine ku mutyima byānene Yesu amba: “Mwikale kulomba, nabya mukapebwa’kyo. Mwikale kusakasaka kadi mukamona’kyo. Kadi mwikale kututula pa kibelo, nakyo kikemushitwilwa.”—Mateo 7:7.

Roberto nandi wamwene amba usakilwa mushipiditu wa Leza ino mu mwanda mukwabo. Wadi utoma mfwanka ne dyamba kitatyi kyonso. Wadi ulwa na kuleka kino kibidiji myaka ibidi mituntulu, ino ujokela’mo kyaba ne kyaba. Roberto unena’mba: “Pokimba kuleka dyamba usa kwanza kulwa na buya bwa kwiditoma. Ino ngitu nayo koku ikukoka kutoma’dyo difuku ne difuku.”

Roberto ubweja’ko amba: “Nadi nsumininwe kushinta būmi bwami mwanda wa ñingidile Leza mu muswelo waitabije. Nadi nonga bukomo bwa kudinga milangwe miyampe ya mu Bible mu ñeni yami. Nadi nombela na kininga difuku ne difuku, nomba Leza ampe bukomo bwa kutōkeja būmi bwami. Nadi ndyukile amba ami mwine nkibwanyapo. O mwanda nadi nyemena kudi Yehova alondolole milombelo yami, nakampata kitatyi kyonadi ntyumuka pa mutyima shi najokela’mo. Nkulupile amba mushipiditu sandu wa Yehova waumpele bukomo buvule; mwanda pa kubulwa mushipiditu wandi, nkyadipo mbwanya kunekenya kino kyami kibidiji.”—Fidipai 4:6-8.

Kulelemba “na Mapapa’nka bwa Mukebo”

Pamo bwa ba Isabel ne Roberto, Batumoni ba Yehova midiyo ne midiyo i bemwene mu būmi bwabo bukomo bwa mushipiditu sandu. Bukomo bwa Yehova bwingila—bukomo bumweka mu bupangi bwa diulu ne ntanda—bukokeja kukupebwa ne abe shi uswile. Leza usakile ne ukapelakana ku kupa uno mushipiditu shi umulomba’o na mikeketo. Ino pa kutambula uno mushipiditu, ufwaninwe kwifunda bubinebine butala padi Leza ne kukimba kulonga kiswa-mutyima kyandi na mutyima moloke.—Isaya 55:6; Bahebelu 11:6.

Shi utambule bukomo bwa mushipiditu sandu, ukamona muswelo wa kwingidila Leza senene ne kulwa na makambakano okokeja kutana umbūmi. Kino kyo kitukulupija ne Bible amba: “[Yehova] upana bukomokomo kudi wa mpungiji, ne kudi yewa wampikwa bunkanka ulundako bukomo. . . . Boba bakungila Yehova bakansangula bukomo bwabo; bakalelemba na mapapa’nka bwa mukebo; bakanyema, ne kukōkapo kwine mpika; bakananga, ne kupungilapo kwine mpikila.”—Isaya 40:28-31.

[Kunshi kwa dyani]

[Bushintuludi pa paje 8]

‘Nadi nombela na kininga difuku ne difuku, nomba Leza ampe bukomo. Nadi ndyukile amba ami mwine nkibwanyapo. Namwene mwaalondolwedile milombelo yami’

[Kapango/Kifwatulo pa paje 7]

MUSHIPIDITU SANDU WINGILA

Leza wāingidije mushipiditu sandu pa kupanga ntanda ne bintu byonso bidi mu madiulu. Mulembi wa mitōto wāelele kabobo amba: “Ē! abe Yehova; mīngilo yobe īdi pangi pangi pene! I mu ñeni mo weīpangile yonsololo; ntanda i miyūle bupeta bobe. Utuma mushipiditu obe, nabyo byapangwa.”—Mitōto 104:24, 30; Ngalwilo 1:2; Yoba 33:4.

Mushipiditu sandu wāpelwe bantu ba Leza basoneke Bible. Mutumibwa Polo wāsonekele amba: “Bisonekwa byonsololo bisonekeja Leza shi bika, shi bika, byo bimwenwamo.” (2 Temote 3:16) Kishima kya Kingidiki kyalamwinwe bu “bisonekeja Leza” kishintulula pa bute pa bute “byelwe’mo umpuya na Leza.” Umpuya wa Yehova, ke mushipiditu kadi, wāludikile milangwe ya balembi ba Bible, amba balembe “mwanda wa Leza.”—1 Tesalonika 2:13.

Mushipiditu sandu wākweshe bengidi ba Leza bekale na bukomo bwa kulaya bikafika kumeso pampikwa kwitupa. Mutumibwa Petelo wāshintulwile amba: “Kutupu kubanga manga kwa kisonekwa kwa kwishintulwila ako kwine, mhm. Ke-kuntu kubanga manga kekwaīlepo, nansha patyetye pene, monka muswidile mutyima wa muntu, mhm, ino bantu bapandulwemo ba Leza banenene monka mo batwadilwetwadilwe kudi Mushipiditu Sandu.”—2 Petelo 1:20, 21; Yoela 2:28.

Mushipiditu sandu wākweshe Yesu ne bantu bakwabo ba lwitabijo basapule myanda miyampe ya Bulopwe bwa Leza ne kulonga bingelengele. Yesu wānene amba: “Mushipiditu wa Yehova wangikadilako, ke-muntu wanshingile mani ngikale wakusapwila myanda-miyampe ku balanda. Wantalula ñundape ba mityima mibole, ne kusapwila bakukutwa mu nkano kukutululwamo, ne bampofu nabo bapebwe meso.”—Luka 4:18; Mateo 12:28.

[Kapango/Kifwatulo pa paje 9]

MISWELO ITUKWASHA MUSHIPIDITU SANDU

Mushipiditu sandu ukakukwasha ulwe na matompo ne kunekenya bibidiji bibi. Mutumibwa Polo wānene amba: “Leza i wabinebine, wampikwa kwimulekelela’mba: Batompibwe na bitabuke bukomo bwabo; ino nanshi, ponka pa kyakutompa, nandi ukasaula dishinda dya kupandilamo, amba mumone mwakutūkijija mutyima monka.”—1 Kodinda 10:13.

Mushipiditu sandu ukakukwasha utamije ngikadilo ya bwine Leza. “Kipa kya mushipiditu i buswe, nsangaji, ndoe, kitūkijetyima, kanye, buyampe, lwitabijo, kutalala, kwīfula.”—Ngalatea 5:22, 23, NW.

Mushipiditu sandu ukakukomeja ūminine matompo. “Ne mukomo wa kulonga bintu byonso mudi aye wakunkomeja.”—Fidipai 4:13.