Ketwakafityijai Mushipiditu Sandu Wa Yehova Mutyima
“Kemukīkala kufītyija ku mutyima aye Mushipiditu Sandu wa Leza, monka mo twatūdilwa kiyūkeno.”—EF. 4:30.
1. Lelo Yehova i mulongele midiyo ya bantu bika, ne i bika byotufwaninwe kulonga?
YEHOVA i mulongele midiyo ya bantu bekele pano pa ntanda ya kavutakanya kintu kya pa bula. I mwitupe muswelo wa kumufwena kupityila kudi Yesu Kidishitu wandi Mwana wa bunka. (Yoa. 6:44) Shi wi mwipāne kudi Leza ne udi na būmi bukwatañene ne kwipāna kobe, nabya ubadilwanga mu bano bantu. Byobatyijibwe mu dijina dya mushipiditu sandu, ufwaninwe kwiendeja kukwatañana na uno mushipiditu.—Mat. 28:19.
2. Le i bipangujo’ka byotusa kubandaula?
2 Batwe ‘bakuna ku mushipiditu,’ tuvwalanga muntu mupya. (Ngat. 6:8; Ef. 4:17-24) Ino mutumibwa Polo witudingila ne kwitudyumuna tuleke kufityija mushipiditu sandu wa Leza mutyima. (Tanga Efisesa 4:25-32.) Pano tusa kubandaula na katentekeji madingi a mutumibwa. Lelo i bika byādi bisaka kwisamba Polo pa kunena mwanda utala kufityija mushipiditu wa Leza mutyima? Lelo muntu mwipāne kudi Yehova ukokeja kufityija mutyima wa mushipiditu wandi namani? Ne i muswelo’ka otukokeja kwepuka kufityija mushipiditu wa Yehova mutyima?
Byādi Bisaka Kunena Polo
3. Lelo ukashintulula namani buluji bwa binenwa bidi mu Efisesa 4:30?
3 Dibajinji bidi, tala binenwa bya Polo bidi mu Efisesa 4:30. Wāsonekele amba: “Kemukīkala kufītyija ku mutyima aye Mushipiditu Sandu wa Leza, monka mo twatūdilwa kiyūkeno kya ku difuku dya bukūdi.” Polo kādipo usakila banababo baswe batūle būmi bwabo bwa ku mushipiditu mu kyaka. Mwanda i monka mu mushipiditu wa Yehova ‘mobatūdilwe kiyukeno kya ku difuku dya bukūdi.’ Mushipiditu sandu wa Leza wādi utūla kiyukeno ne pano ukitūla’kyo bu “kyeya kya mushipiditu” ku bashingwe māni balamine bululame bwabo. (2 Kod. 1:22) Kino kiyukeno kishintulula amba abaikala ke ba bene ba Leza bafwaninwe būmi bwa mūlu. Bonsololo batūdilwe biyukeno i bantu 144000.—Kus. 7:2-4.
4. Mwanda waka i kya mvubu kwepuka kufityija mushipiditu wa Leza mutyima?
4 Kufityija mushipiditu mutyima i ditabula dibajinji ditwala ku kubulwa kuludikwa na bukomo bwa Leza bwingila mu būmi bwa Mwine Kidishitu. Kino i kimweke patōka mu byānene Davida pa kupwa kujilula na Bafesheba. Davida wēsāshile na kulomba Yehova amba: “Kokansonsolola mu kifuko kyobe; kadi kokantekuna mushipiditu obe ukola.” (Mit. 51:11) I enka bashingwe māni “[babinebine] byonka ne ku lufu kwine” bakatambula “kilukwa” kya būmi bwampikwa kufwa momwa mūlu. (Kus. 2:10; 1 Kod. 15:53) Bene Kidishitu badi na lukulupilo lwa kwikala pano panshi nabo basakilwa mushipiditu sandu pa kulama bululame bwabo kudi Leza ne kutambula kyabuntu kyandi kya būmi ponka pa kwitabija mu kitapwa kya kikūlwa kya Kidishitu. (Yoa. 3:36; Loma 5:8; 6:23) Nanshi, batwe bonso tufwaninwe kwilama kutyina twakafityija mushipiditu sandu wa Yehova mutyima.
Lelo Mwine Kidishitu Ukokeja Kufityija Mushipiditu Mutyima Namani?
5, 6. Lelo Mwine Kidishitu ukokeja kufityija mushipiditu wa Yehova mutyima namani?
5 Byotudi Bene Kidishitu bepāne, tukokeja kwepuka kufityija mushipiditu mutyima. Kino kibwanika enka shi ‘tunangila ne kwikala na būmi buludikwa na mushipiditu,’ nabya ketukalēmenenwapo na bilokoloko bibi bya ngitu ne kwikala na tuto twakubulwa bwine Leza. (Ngat. 5:16, 25, 26) Inoko bintu bikokeja kushinta. Tukokeja kufityija mushipiditu wa Leza mutyima shi tubelekelela kushetemunwa bityebitye, padi kuyuka mpika, twafula ku mwikadilo upelejibwe mu Kinenwa kisonekelwe ku bukomo bwa mushipiditu wa Leza.
6 Shi twendelele mu dishinda dītupe na dya mushipiditu sandu, nankyo tukeufityija mutyima, ne Yehova mwine Nsulo yao. Bubandaudi bwa Efisesa 4:25-32 busa kwitulombola mwa kwikadila, ne busa kwitukwasha twepuke kufityija mushipiditu wa Leza mutyima.
Mwa Kwepukila Kufityija Mushipiditu Mutyima
7, 8. Lombola kine kyotufwaninwe kwikadila ba binebine.
7 Tufwaninwe kwikala ba binebine. Mu Efisesa 4:25, Polo wāsonekele amba: “Ebiya kadi, muleke bubela, mwisambe byabinebine wa ku mukwabo, wa ku mukwabo; ke-twi-bantu tudi byakungitu bya bātwe bene na bene.” Byotwalungwa umbumo bu “byakungitu bya bātwe bene na bene,” na bubine ketufwaninwepo kubombola nansha kupima kongola ku kusaka batōtyi netu, mwanda kudi pamo bwa kwibabepela bubela. Yense wendelela kulonga namino, ubwanya kutyiba kipwano na Leza.—Tanga Nkindi 3:32.
8 Binenwa ne bilongwa bya buzazangi bikokeja kona bumo bwa kipwilo. Nanshi, tufwaninwe kwikala bakulupilwa pamo bwa mupolofeto Danyele, bakwabo kēbatenepo mwadi kya bubi nansha kimo. (Dan. 6:4) Kadi tufwaninwe kulama mu ñeni madingi a Polo aādingile Bene Kidishitu badi na lukulupilo lwa kwenda mūlu amba muntu ne muntu wa “ngitu ya Kidishitu” i wa bonso ne ufwaninwe kulamata nyeke ku balondi ba bine bashingwe māni ba Yesu. (Ef. 4:11, 12) Shi tukulupile kwikala na būmi bwa nyeke mu Paladisa pano pa ntanda, netu tufwaninwe kwisamba bya binebine, mwa kutuntwila ku bumo bwetu bwa bu bana na bana bwa ntanda yonso.
9. Mwanda waka i kya kamweno kulonda binena Efisesa 4:26, 27?
9 Tufwaninwe kumukomena Dyabola, ketwakamushila kyaba kya kwitona ku mushipiditu. (Yak. 4:7) Mushipiditu sandu witukwashanga tumukomene Satana. Kimfwa, tukokeja kumukomena na kwepuka bulobo bwa kilobelobe. Polo wāsonekele amba: “Funai bulobo kemukapīlaimo mambo ponka; kemukashikija dyuba’nka na bukalabale bwenu, mhm! nansha dyabola kemukamujikwila kyaba, mhm.” (Ef. 4:26, 27) Shi tubalobe byendele’mo, kulombela ponka na ponka milombelo ya mundamunda kukokeja kwitukwasha twikale ‘kutalaja mushipiditu,’ kwīfula pa kyaba kya kulonga bintu bifityija mushipiditu wa Leza mutyima. (Nk. 17:27) O mwanda ketwakishala mu bulobo bwetu ne kujikwila Satana kibelo kya kwitutweja mu bilongwa bibi. (Mit. 37:8, 9) Muswelo umo wa kumukomena i na kupwija bukidibukidi kwisusa mungya madingi a Yesu.—Mat. 5:23, 24; 18:15-17.
10, 11. Mwanda waka ketufwaninwepo kwiba nansha kwikala ba budimbidimbi?
10 Ketwakiponena mu dikinga dya kwiba nansha dya budimbidimbi. Pa uno mwanda, Polo wāsonekele amba: “Wakwiba nandi ēbuleke bwivi bwandi; nanshi aputumine mu mīngilo ya kwingila ne makasa andi kyokya kilumbuluke’mba, amone byakupana kudi yewa wampikwa’byo, e nabyako bidi.” (Ef. 4:28) Shi Mwine Kidishitu mwipāne waibe, na bubine ‘wakobakanya dijina dya Leza’ na kwiditopekeja matope. (Nk. 30:7-9) Bulanda kebubingapo bwa kwibila. Boba basenswe Leza ne bantu bayukile amba kekudipo bubinga bwa kwibila nansha bumo.—Mako 12:28-31.
11 Polo katelelepo’tu enka bintu byoketufwaninwepo kulonga ino i mulombole ne byotufwaninwe kulonga. Shi tuludikwe na mushipiditu ne kunangila’mo, tukengila bininge mwa kulelela bisaka byetu ne kumona “byakupana kudi yewa wampikwa’byo.” (1 Tem. 5:8) Yesu Kidishitu ne batumibwa bandi bādi babīka lupeto lwa kukwasha nalo balanda, inoko Ngabañani Yudasa Isakadiota wādi wiba’mo. (Yoa. 12:4-6) Na bubine kādipo uludikwa na mushipiditu sandu. Batwe baludikwa na mushipiditu wa Leza tusakanga “kulumbuluka biyampe, senene, shē, umbintu byonso,” na mwādi mwikadile Polo. (Bah. 13:18) O mwanda twepukanga kufityija mushipiditu sandu wa Yehova mutyima.
Miswelo Mikwabo ya Kwepuka Kufityija Mushipiditu Mutyima
12, 13. (a) Mungya Efisesa 4:29, i binenwa’ka byotufwaninwe kwepuka? (b) Binenwa byetu bifwaninwe kwikala bya muswelo’ka?
12 Tufwaninwe kulama muneneno wetu. Polo wānene amba: “Kemukīkala kuleka kinenwa kibole kulupuka mu kyakanwa kyenu, mhm, poso kilumbuluke kyonka kyakwimutamija biyampe, senene, amba kipane buntu kudi boba babwivwana.” (Ef. 4:29) Pano napo, mutumibwa kesambilepo enka’tu pa bintu byoketufwaninwepo kulonga; ino i mwitulombole ne byotufwaninwe kwendelela kulonga. Shi tuludikwe na mushipiditu wa Leza, tukatononwa kunena ‘kilumbuluke kyonka kyakwitutamija biyampe, senene, amba kipāne buntu kudi boba ba kwivwana.’ Pakwabo kadi, ketufwaninwepo kuleka “kinenwa kibole” kulupuka mu kyakanwa kyetu. Kishima kya Kingidiki kyalamwinwe bu “kibole” kyāingidijibwe mwanda wa kulombola mwikadilanga kipa, mwita wa lui, nansha wa ntanda mutute. Monka motutyanikilwanga bidibwa bya uno muswelo, mo monka motushikilwe binenwa bimwene Yehova bu bibi.
13 Binenwa byetu bifwaninwe kwikala byendele’mo, bya kanye, ne “buntu bwa mwepo.” (Kol. 3:8-10; 4:6) Bantu bafwaninwe kumona amba twi beshile pobemvwana byotunena. O mwanda tukwashei bakwabo na kunena “kilumbuluke kyonka [kyakwitutamija] biyampe.” Kadi twiivwanei na mwēivwanine kaimba wa mitōto wāimbile amba: “Myanda ya kyakanwa kyami, ne mifwatakanyo ya mutyima wami, ītabijibwe kudi abe mu kifuko kyobe, Abe Yehova, kidibwe kyami, ne mukūdi wami.”—Mit. 19:14.
14. Mungya Efisesa 4:30, 31, i bika byotufwaninwe kufundula kotudi?
14 Tufwaninwe kufundula kotudi bululu, kufuna bulobo, lubabo, ne kiji kyonsololo. Polo pa kupwa kuleta kidyumu kya kufityija mushipiditu wa Leza mutyima, wānene amba: “Kadi mufundulei ko mudi bululu bonso, ne bakalabale, ne kufuna bulobo, ne lupotopoto, ne lubabo, ne kiji kyonsololo kumo.” (Ef. 4:30, 31) Byotudi bantu bampikwa kubwaninina, tusakilwa kulonga bukomo bwa kutadija milangwe ne bilongwa byetu. Shi tubaleka “bululu bonso, ne bakalabale, ne kufuna bulobo” bitubikale, tukafityija mushipiditu wa Leza mutyima. Kikekala muswelo umo shi tuta mutyima ku bibi byobetulonga, tulama kiji, ne kupela kumvwañana na betulubila. Shi tubashilula kupumpunya madingi a mu Bible, tukatamija ngikadila itutwala ku kulubila mushipiditu ne tukokeja kutanwa na musala.
15. Le tukalonga bika shi abetusanshija?
15 Tufwaninwe kwikala na kanye, mutyima wa kukōka, ne kwilekela batwe bene. Polo wālembele amba: “Mwikale ne kanye bānwe bene na bene, ne mutyima wa kukōka, mwikale kwilekela bānwe bene, monka mwemulekele aye Leza mudi Kidishitu.” (Ef. 4:32) Nansha shi tubasanshijibwa na bilongwa bibi byo betulongele, twikale kwilekela, pamo na mwitulekēle Leza. (Luka 11:4) Langa’po shi mwanenu mu lwitabijo wanena bintu bibi podi. Pa kulonga bukomo bwa kupwa mwanda, tukamumonanga. Walomba lusa bya binebine ne kulekelwa. Tumulekelanga, ino tusakilwa kulonga bivule. Levi 19:18 unena amba: “Kokasomonwapo kwilubwila kinongo, nansha kwibakwatyilwa manimani ku mutyima bāna ba mu bantu bobe, ino nanshi kusanswa ukasanswanga mwikadi nobe bwa mo wisanshilwe abe mwine; amiwa ne Yehova.”
Tufwaninwe Kudyumuka
16. Leta kimfwa kilombola’mba tusakilwa kujadika bintu mwanda wa kutyina kufityija Yehova mutyima.
16 Nansha ke pa bunka, tubwanya kutompa kulonga bintu kebisangajapo Leza. Kimfwa, tutu ubwanya kwimvwana minjiki ipelejibwe. Bityebitye mutyima wandi wa mundamunda waoneka mwanda wa kupumpunya madingi a Bible aletelwe mu bitabo bya “umpika wa binebine, udi na manwa.” (Mat. 24:45) Ubwanya kulomba pangala pa uno mwanda ne kuvuluka binenwa bya Polo bidi mu Efisesa 4:30. Wasumininwa kuleka kulonga kintu kyonso kifityija mushipiditu wa Leza mutyima, ne kwepuka tamba papo minjiki yampikwa kwitabijibwa. Yehova ukesela mulangwe wa uno tutu. Nanshi, twijibei nyeke ku kufityija mushipiditu wa Leza mutyima.
17. Shi ketudyumukilepo ne kulombela, i bika bikokeja kwitufikila?
17 Shi ketudyumukilepo ne kulombela, tubwanya kuponena mu bibidiji bya disubi nansha bibi, bikafityija mushipiditu mutyima. Mushipiditu sandu byouleta ngikadilo ilombola mwikadile Tata wa mūlu, ubwanya kufītwa, nansha kwivwana bulanda—kintu kyoketusakilepo na bubine kulambikwa. (Ef. 4:30) Basonekeji Bene Yuda ba mu myaka katwa kabajinji bālubile pa kutela bingelengele bya Yesu amba i bya ku bukomo bwa Satana. (Tanga Mako 3:22-30.) Bano balwana na Kidishitu ‘bātukile mushipiditu sandu’ ne kulonga bubi kebukalekelwapo. Ketwakafulai ku kulanga namino!
18. I muswelo’ka otukayuka’mba ketulongelepo bubi kebulekelwapo?
18 Byoketusakilepo kufwena ku kulonga bubi kebulekelwapo, i biyampe tuvuluke byānene Polo pa mwanda utala kufityija mushipiditu sandu mutyima. Le bikekala namani shi tubalonga kilubo kikatampe? Shi tubesāsa, ne tubakwashibwa na bakulumpe, tukanena’mba Leza wetulekela, kadi ketulubilepo mushipiditu sandu. Tukokeja kwepuka kufityija mushipiditu sandu mutyima mu miswelo yo-yonso na bukwashi bwa Leza.
19, 20. (a) Lelo i bintu’ka byotufwaninwe kwepuka? (b) Lelo tufwaninwe kusumininwa kulonga bika?
19 Kupityila ku mushipiditu sandu wandi, Leza upanga bantu bandi buswe, nsangaji, ne bumo. (Mit. 133:1-3) Nanshi, tufwaninwe kwijiba ku kufityija mushipiditu mutyima na kwikuja mu lubabo lubilubi nansha na kunena bintu bipwija bulēme bwa bakumbi batongelwe ku bukomo bwa mushipiditu. (Bil. 20:28; Yude 8) Ino, tukeelela’ko kuleta bumo ne kwilēmeka batwe bene na bene mu kipwilo. Na bubine, ketufwaninwepo kupunga tutangotango mu bantu ba Leza. Polo wāsonekele amba: “Ebiya kadi nemwisashilapo, bānwe bāna betu, ku dijina dya Mfumwetu Yesu Kidishitu, amba bānwe bonso mwisambe kyakanwa kimo kyonka, kemukīketa bānwe bene pala, pala, ehe; nanshi mwikale babambakanibwe pamo, monka umutyima umo, ne pa kutyiba-mambo napo mo monka.”—1 Kod. 1:10.
20 Yehova udi na mutyima ne ubwanya kwitukwasha twepuke kufityija mushipiditu wandi mutyima. Twendelelei kulomba mushipiditu sandu ne kusumininwa kuleka kwiufityija mutyima. Twendelelei ‘kukuna ku mushipiditu,’ na kukimba ne kininga buludiki bwao dyalelo ne nyeke-ke.
Usa Kulondolola Namani?
• Lelo kufityija mushipiditu wa Leza mutyima kushintulula bika?
• Le muntu wipēne kudi Yehova ukokeja kufityija mushipiditu wandi mutyima namani?
• Lelo tukepuka kufityija mushipiditu sandu mutyima muswelo’ka?
[Kifwatulo pa paje 30]
Pwijai bukidibukidi kwisusa
[Kifwatulo pa paje 31]
Binenwa byobe byelekejibwe na kipa’ka?