“Mushipiditu Usakidilanga . . . Ne Bikomo Bīne Bya Leza”
“Mushipiditu usakidilanga bintu byonsololo, ne bikomo bīne bya Leza kumo.”—1KOD. 2:10.
1. Lelo i mwingilo’ka wingila mushipiditu sandu wānenenwe na Polo mu 1 Kodinda 2:10, ne i bipangujo’ka biipangulwa?
BINE tufwija’ko pa mwingilo wingila mushipiditu sandu wa Yehova! Bisonekwa bitela mushipiditu bu mukwashi, kyabuntu, kamoni, ne bu witusengela. (Yoa. 14:16; Bil. 2:38; Loma 8:16, 26, 27) Mutumibwa Polo wānene ukoma mwingilo mukwabo wingila mushipiditu sandu amba: “Aye Mushipiditu usakidilanga bintu byonsololo, ne bikomo bīne bya Leza kumo.” (1 Kod. 2:10) Na bubine, Yehova wingidijanga mushipiditu sandu wandi pa kusokola bubinebine bwa ku mushipiditu bwa mushike. Lelo twadi ba kwimvwanija mpango ya Yehova namani kwakubulwa buno bukwashi? (Tanga 1 Kodinda 2:9-12.) Inoko kudi bipangujo palapala biipangulwa, amba: Lelo ‘mushipiditu usakidilanga ne bikomo bine bya Leza’ namani? Lelo Yehova wāsokwele bino bintu bikomo mu myaka katwa kabajinji K.K. kupityila kudi ani? Lelo mushipiditu usakidilanga bino bintu bikomo namani mu ano etu mafuku ne kupityila kudi ani?
2. Lelo mushipiditu wādi wa kwingila mu miswelo’ka ibidi?
2 Yesu wālombwele miswelo ibidi yadi ya kwingila mushipiditu. Kitatyi kityetye kumeso kwa lufu lwandi wāsapwidile batumibwa amba: “Ino aye Nsenga-mukwashi, Mushipiditu Sandu, ukatuma Tata mu dijina dyami, aye ukemulombolanga byonsololo, ne kwimuvulula byonso byo nemusapwila bino.” (Yoa. 14:26) Nanshi mushipiditu wādi wa kwingila pamo bwa mufundiji ne bu wa kuvuluja. Pamo bwa mufundiji, mushipiditu wādi wa kukwasha Bene Kidishitu bemvwanije bintu byokebadipo bemvwanije dibajinji. Pamo bwa wa kuvuluja, wādi wa kwibakwasha bavuluke byobya byēbashintulwidilwe ne kwibilonda senene mu būmi.
Mu Myaka Katwa Kabajinji
3. Lelo i binenwa’ka bya Yesu bilombola’mba bintu “bikomo bīne bya Leza” byādi bya kusokolwa bityebitye?
3 Yesu wāfundije balondi bandi bubinebine buvule bokebādipo bayukile. Inoko bādi basakilwa bivule bya kwifunda. Yesu wāsapwidile batumibwa amba: “Ngidi bidi na bikwabo byakwisamba nenu bivule bīne. Ino kemwibiyūkapo kwibīvwana panopano. Poso ponka pa kwiya aye Mushipiditu wa binebine, ye ukemulombola ku bya binebine byonsololo.” (Yoa. 16:12, 13) Nanshi Yesu wālombwedidile’tu amba, bintu bikomo bya Leza byādi bya kusokolwa bityebitye kupityila ku mushipiditu sandu.
4. Lelo mu difuku dya Pentekosa 33 K.K., mushipiditu wāingile namani bu mufundiji ne bu wa kuvuluja?
4 Mu difuku dya Pentekosa 33 K.K., “Mushipiditu wa binebine” wāfikile, wāpungulwilwa pa Bene Kidishitu 120 bādi babungakenine mu Yelusalema. Kwādi bukamoni bumweke ne bwimvwanike. (Bil. 1:4, 5, 15; 2:1-4) Bana ba bwanga bēsambile mu ndimi palapala “myanda ya bintu bikatampe bya Leza.” (Bil. 2:5-11) Kitatyi kyābwene kya kusokolwa kwa bintu bipya. Mupolofeto Yoela wālaile kuno kupungululwa kwa mushipiditu sandu. (Yoe. 2:28-32) Bantu bādi batala bēmwenine kufikidila’kwa mu muswelo okebādipo balanga, ne kadi mutumibwa Petelo wāimene kashintulula mobikadile. (Tanga Bilongwa 2:14-18.) Mu uno muswelo, mushipiditu wāingile pamo bwa mufundiji wa kutōkejeja Petelo amba bino byemwena bana ba bwanga i kufikidila kwa bupolofeto bwa pa kala. Kadi mushipiditu wāingile bu wa kuvuluja, mwanda Petelo kātelelepo’tu enka Yoela, ino wātelele ne mitōto ibidi ya Davida. (Mit. 16:8-11; 110:1; Bil. 2:25-28, 34, 35) Byonso byāmwene boba bādi babungakene ne byobāimvwene byādi bine bintu bikomo bya Leza.
5, 6. (a) Lelo i bipangujo’ka bya mvubu bitala kipwanino kipya byādi bilomba kulondololwa pa kupwa kwa Pentekosa 33 K.K.? (b) Lelo ino myanda yābandawilwe na bāni, ne butyibi bwākwetwe namani?
5 Bene Kidishitu ba mu myaka katwa kabajinji bādi basakilwa nyeke kitōkeji mu myanda mivule. Kimfwa, kwādi mwanda utala kipwanino kipya kyāshilwile mu difuku dya Pentekosa. Lelo kino kipwanino kyākadikile enka ku Bayuda ne boba baketūtyile’mo? Lelo Bajentaila nabo bādi ba kwitabijibwa’mo ne kushingwa mani a mushipiditu sandu? (Bil. 10:45) Lelo Bajentaila bana-balume bādi basakilwa kutwejibwa kwisao ne kukōkelelela Bijila bya Mosesa? (Bil. 15:1, 5) Bino byādi bipangujo bya kamweno mpata. Mushipiditu wa Leza wādi usakibwa mwanda wa kusakidila bino bintu bikomo. Ino le wādi wa kwingila kupityila kudi ani?
6 Mwanda ne mwanda wādi ubandaulwa na batutu bapelwe lupusa. Petelo, Polo, ne Banabasa bātenwe ku lenyo ya kitango kyendeji kadi bāsekunwine mumwenine Yehova Bajentaila bampikwa kutwejibwa kwisao. (Bil. 15:7-12) Pa kupwa kubandaula uno mwanda mungya Bisonekwa bya Kihebelu ne na bukwashi bwa mushipiditu sandu, kitango kyendeji kyākwata’po butyibi. Ebiya kyātumina bipwilo mukanda wa kwibalombola buno butyibi.—Tanga Bilongwa 15:25-30; 16:4, 5; Ef. 3:5, 6.
7. Lelo bubinebine bwa mushike bwāsokwelwe muswelo’ka?
7 Myanda mikwabo mivule yātokejibwe kupityila ku bisonekwa bya ku bukomo bwa mushipiditu bya Yoano, Petelo, Yakoba, ne Polo. Ino kitatyi kyābwene Bisonekwa bya Bwine Kidishitu, kyabuntu kya kufumika ne ñeni ya kusokolwa mu kingelengele byāfundwilwe. (1 Kod. 13:8) Lelo mushipiditu wādi wa kwendelela kwingila pamo bwa mufundiji ne wa kuvuluja? Lelo wādi wa kwendelela kukwasha Bene Kidishitu basakidile bintu bikomo bya Leza? Bupolofeto amba eyo.
Mu Kyaba kya ku Mfulo
8, 9. Le i bāni badi ba ‘kulelema’ na ñeni ya ku mushipiditu mu kyaba kya ku mfulo?
8 Mwikeulu pa kwisambila pa kyaba kya ku mfulo, wālaile amba: “Boba badi ne ñeni bakalelemanga’nka bwa kitōkeji kya diulu; kabidi boba baalamwina bangibangi ku boloke pamo’nka bwa ñenyenye, kwa nyeke ne nyeke-ke . . . ne kuyukidija kukavudijibwa bungibungi.” (Dan. 12:3, 4) Lelo i bāni badi ba kwikala ba ñeni ne kulelema? Yesu wāletele kayukeno mu kyelekejo kyandi kya ñano ne bityani. Aye pa kwisambila pa myanda ya “pamfulo pene pa panopantanda,” wānene amba: “Ino bakoloka nabo bakatēma, tē, enka bwa dyuba monka umbulopwe bwa Shabo.” (Mat. 13:39, 43) Yesu wāyukenye mu bushintuludi bwandi amba “bakoloka” i “bāna ba bulopwe,” Bene Kidishitu bashingwe māni.—Mat. 13:38.
9 Lelo Bene Kidishitu bashingwe māni bonso badi ba ‘kulelema’? Mu buluji bumo, eyo, mwanda Bene Kidishitu bonso badi ba kusapula, kulonga bana ba bwanga ne kwitamija abo bene na bene ku kupwila. Bashingwe māni badi ba kushiya kimfwa. (Zek. 8:23) Inoko, kutentekela pa kino, bino bikomo bine byadi bya kusokolwa mu kyaba kya ku mfulo. Mupolofeto Danyele wānene amba i “bifibwe” kufika ne ku kino kyaba. (Dan. 12:9) Lelo mushipiditu wādi wa kusakidila bintu bikomo namani ne kupityila kudi ani?
10. (a) Lelo mushipiditu usokolanga bubinebine bwa mushike mu ano mafuku a ku mfulo kupityila ku bāni? (b) Shintulula muswelo wātōkejibwe bubinebine butala pa tempelo mikatampe ya ku mushipiditu ya Yehova.
10 Pafikanga kitatyi kya kutōkeja myanda ya ku mushipiditu mu ano etu mafuku, mushipiditu sandu ukwashanga bemaniji ba “umpika wa binebine, udi na manwa” ku kite kya ntanda bemvwanije bubinebine bwa mushike bokebadipo bemvwanije dibajinji. (Mat. 24:45; 1 Kod. 2:13) Kitango Kyendeji kyonso pamo kitalanga ne kujadika bushintuludi. (Bil. 15:6) Byobya byobefunda, balupwilanga’byo bantu bonso amba bamwene’mo. (Mat. 10:27) Mwenda mafuku, kukokeja kusakilwa bitōkeji bikwabo, nabyo kadi bishintululwanga pampikwa budimbidimbi.—Tala kapango “Muswelo Wāsokwele Mushipiditu Buluji bwa Tempelo ya ku Mushipiditu.”
Tumwenei mu Mwingilo wa Mushipiditu Dyalelo
11. Lelo Bene Kidishitu bonso dyalelo bamwenanga namani mu mwingilo wa mushipiditu sandu wa kusokola bikomo bine bya Leza?
11 Bene Kidishitu bonso ba kikōkeji bamwenanga mu mwingilo wa mushipiditu sandu wa kusokola bintu bikomo bine bya Leza. Batwe netu dyalelo twifundanga, tuvuluka kadi tulonda bufundiji bwitukwasha mushipiditu sandu twimvwanije, pamo na Bene Kidishitu ba mu myaka katwa kabajinji. (Luka 12:11, 12) Ketusakilwapo kufunda masomo malamala mwanda wa kwimvwana bubinebine bwa mushike bwa ku mushipiditu bulupwilwe. (Bil. 4:13) Le tubwanya kulumbulula namani mwimvwanino wetu wa bintu bikomo bya Leza? Tutalei madingi abala anga.
12. Lelo i kitatyi’ka kyotufwaninwe kulomba mushipiditu sandu?
12 Lomba mushipiditu sandu. Potubandaula myanda ya ku mushipiditu, tufwaninwe dibajinji kulomba Leza etupe mushipiditu sandu wituludike. Tulombei’o potudi pa bunka nansha’tu tudi na kitatyi kityetye. Milombelo ya kwityepeja uno muswelo ikasangaja bine Tata wetu wa mūlu ku mutyima. Enka na mwālombwedile’kyo Yesu, Yehova ukapāna ku buntu bitupu mushipiditu sandu wandi kudi boba bamulomba’o na mutyima umo.—Luka 11:13.
13, 14. Lelo kuteakanya kupwila kukwashanga mwimvwanino wetu wa bintu bikomo bya Leza namani?
13 Teakanya kupwila. Tutambulanga ‘bidibwa pa kitatyi kifwaninwe’ kupityila kudi kabumbo ka umpika. “Umpika” uvuijanga mwingilo wandi na kupāna bidibwa bya mu Bisonekwa ne na kutūla’ko mpangiko ya kwifunda ne ya kupwila. Kudi bubinga bufwaninwe bwa kulombela banabetu ba mu “bu-bāna na bāna” babandaule myanda imoimo. (1 Pet. 2:17; Kol. 4:16; Yude 3) Twingidilanga pamo na mushipiditu sandu potulonga bukomo bwa kulonda misoñanya yotupebwa.—Kus. 2:29.
14 Potuteakanya kupwila, i biyampe kutanga bisonekwa bitelelwe bitupu ne kutompa kujingulula mobikwatañenine na mwanda wisambilwa’po. Kwikala na kino kibidiji kukabaija bityebitye mwimvwanino otwimvwana Bible. (Bil. 17:11, 12) Kutanga bisonekwa kuletanga mulangwe mu ñeni wa amba mushipiditu sandu usa kwitukwasha tuvuluke. Kadi, shi tutange kisonekwa mu Bible, tukapēlelwa kwikisokola dikwabo mwanda twekimwene pokidi.
15. Mwanda waka tufwaninwe kutanga ne mapya adi mu mabuku alupwilwe, ne le utañanga’o namani?
15 Tanga ne mapya. Myanda imo idi mu mabuku etu ketwifundanga’yopo ku kupwila, ino i miteakanibwe mwanda wa kamweno ketu. Nansha myanda ya mu mapepala etu otupanga bantu itulongolwedilwe ne batwe. Mu ino ntanda ya kavutakanya, bitulombanga divule kwilaija muntu nansha kintu kampanda. Shi tuselele mabuku o ketwatangile nansha otutangile bya kūlukūlu, tukokeja padi kwiatanga mu kyaba’kya. Bamo batañanga mapya na kuteja mabuku etu makwatwe ku mawi pobananga nansha pobendeja motoka. Ino myanda yonso ikaningija mutyima wetu wa kufwija’ko pa bintu bya ku mushipiditu, shi twikale kwiikimba na katentekeji nansha byoilembelwe bantu bonso.—Hab. 2:2.
16. I kamweno’ka kadi mu kulemba ne kukimba malondololo a bipangujo bikwiya mu ñeni?
16 Languluka. bininge potanga Bible ne mabuku esambila pa Bible, wilamije’ko kitatyi kya kulanguluka. Polonda na katentekeji mwilondela milangwe, bipangujo bikokeja ku kwiya mu ñeni. Soneka’byo, ne kwibikimba kitatyi kikwabo. Divule, tufulanga ku kusokola bidi mu nkulwe potubandaula na mushike myanda itudimbakena. Kwivwanija ko twivwanija kukekala kimo kya mu bilēme byotukokeja kunyemena’ko shi tusakile.—Mat. 13:52.
17. Lelo i mpangiko’ka yolondanga mu kifundwa kya kisaka nansha kya kasuku?
17 Tūla’ko mpangiko ya butōtyi bwa kisaka. Kitango Kyendeji i kitukankamike batwe bonso kwitongela’ko kyolwa kimo nansha kitatyi kikwabo mu yenga kya kwifunda kwa kasuku ne kwa kisaka. Kusendululwa kwa mpangiko ya kupwila i kwitupe muswelo wa kulonda ano madingi. I bika byomubandaulanga mu Butōtyi bwa Kisaka bwa kyolwa? Bamo batañanga Bible, kulonga bukimbi bwa mavese aleta bipangujo mu ñeni yabo ne kulemba tushintulwilo tutyetye mu Mabible abo. Bisaka bivule bilaminanga’ko kitatyi kya kutala muswelo obabwanya kwingidija mu kisaka myanda yobefunda. Mitwe imo ya bisaka itoñanga myanda yobamona’mba isakilwa kisaka kubandaula nansha kwisambila pa myanda nansha bipangujo byaipangwilwe mu kisaka. Ubwanya ne kuvuluka myanda mikwabo ya kubandaula mwenda mafuku.a
18. Mwanda waka ketufwaninwepo kwikaka kwifunda bubinebine bwa mushike budi mu Kinenwa kya Leza?
18 Yesu wānene amba mushipiditu ukengila pamo bwa mukwashi. Nanshi ketufwaninwepo kwikaka kwifunda bubinebine bwa mushike budi mu Kinenwa kya Leza. Buno bubinebine bubadilwa mu buyuki bwa “kuyukidija Leza,” ne tubasoñanibwa kukimba’bo. (Tanga Nkindi 2:1-5.) Busokolanga bivule bitala bintu “byebalongolwedile Leza, boba bakumusanswa.” Shi tulonge bukomo bwa kwifunda bivule bitala pa Kinenwa kya Yehova, mushipiditu sandu uketukwasha, mwanda “Mushipiditu usakidilanga bintu byonsololo, ne bikomo bīne bya Leza kumo.”—1 Kod. 2:9, 10.
[Kunshi kwa dyani]
a Tala Mwingilo Wetu wa Bulopwe wa Kweji 10, 2008, pa paje 8.
Usa Kulondolola Namani?
• Lelo mushipiditu witukwashanga tusakidile “ne bikomo bīne bya Leza” mu miswelo’ka ibidi?
• Lelo mushipiditu sandu wāsokwele bubinebine bwa mushike mu myaka katwa kabajinji kupityila kudi bāni?
• Lelo mushipiditu sandu wingilanga namani pa kutōkeja myanda mu ano etu mafuku?
• Lelo i bika byokalonga pa kumwena mu mwingilo wa mushipiditu?
[Kapango pa paje 30]
Muswelo Wāsokwele Mushipiditu Buluji bwa Tempelo ya ku Mushipiditu
Mu “bikomo bīne bya Leza” byāsokwelwe mu myaka katwa kabajinji mubadilwa ne kuyuka amba tabenakulo ne tempelo byādi byelekeja kintu kikatampe kya binebine kya ku mushipiditu. Polo wātelele kino kya binebine bu “kipema-kyakikalo kilumbuluke kyāpopele Mfumwetu, kekumuntupo, ehe.” (Bah. 8:2) Ino i tempelo mikatampe ya ku mushipiditu, mpangiko itūdile’ko Leza ya kumufwena kupityila ku kitapwa ne butobo bwa Yesu Kidishitu.
“Kipema-kyakikalo” kyāikele’ko mu 29 K.K. pābatyijibwe Yesu ne kwitabijibwa na Yehova bu kitapwa kibwaninine. (Bah. 10:5-10) Yesu pa kupwa kufwa ne kusangulwa, wātwelele mu Kikola Nakampata kya tempelo ya ku mushipiditu ne kufikija bulēme bwa kitapwa kyandi “pa mpala ya Leza.”—Bah. 9:11, 12, 24.
Mutumibwa Polo i musoneke pantu pakwabo Bene Kidishitu bashingwe māni benda bavula “ke njibo īkola ya Leza monka mudi Mfumwetu.” (Ef. 2:20-22) Lelo ino njibo i imo yonka na “kipema-kyakikalo” kyaātelele mwenda mafuku mu mukanda wandi ku Bahebelu? Myaka mivule, bengidi ba Yehova badi balanga’mba i akyo. I kimweke amba Bene Kidishitu bashingwe māni badi balongololwa pano pa ntanda mwanda wa kwikala bu “mabwe” mu njibo ya Yehova ya momwa mūlu.—1 Pet. 2:5.
Inoko kubwipi na mwaka 1971, bemaniji ba kabumbo ka umpika bashilwile kujingulula amba tempelo nansha njibo yēsambīle’po Polo ku Bene Efisesa ke tempelopo mikatampe ya Yehova ya ku mushipiditu. Shi kino “kipema-kyakikalo” kyādi kibundwe na Bene Kidishitu bashingwe māni basanguke, kyadi kya kwikala’ko kupwa kwa lusangukilo lwabo kushilula mu bula bwa “kwikala’ko kwa Mfumwetu.” (1 Tes. 4:15-17, NW) Polo pa kwisambila pa tabenakulo, wāsonekele amba: “nakyo i kyelekejo kya mu onka uno mwaka uno’u.”—Bah. 9:9.
Pa kudingakanya bino bisonekwa ne bikwabo, kyamwekele patōka amba tempelo ya ku mushipiditu keidipo mu ditabula dya kūbakwa’yo, ne amba Bene Kidishitu bashingwe māni ke ‘mabwepo’ asongwa pa ntanda mwanda wa kwiatweja’mo. Ino Bene Kidishitu bashingwe māni bengilanga mu kipango ne mu Kikola kya tempelo ya ku mushipiditu, bela kudi Leza “kitapwa kya kutōtelapo” difuku ne difuku.—Bah. 13:15.
[Kifwatulo pa paje 31]
Le tubwanya kulumbulula namani mwimvwanino wetu wa bintu “bikomo bīne bya Leza”?