Malondololo ku Bipangujo Bimanine pa Bible

Le tubwanya kulekelwa bubi bwetu?

Kukwatañana na Bible, bantu bonso i babipya-mambo. Twāpyene milangwe ya bubi kudi Adama muntu mubajinji. O mwanda tuloñanga kyaba kimo bintu bibi, kadi tubwanya kwialakanya mwenda mafuku pa byotwalongele. Yesu Kidishitu Mwanā Leza, wāfutyile mfutwa na kufwila pangala pa bubi bwetu. Kitapwa kyandi kya kikūlwa i kilengeje tulekelwe bubi. I kyabuntu kitambile kudi Leza.—Tanga Loma 3:23, 24.

Bantu bamo bālongele bubi bukatampe ne kwiipangula shi Leza ubwanya kwibalekela. Na bya dyese, Kinenwa kya Leza kinena amba: “Mashi a Yesu wandi Mwana ētutōkejanga ku bubi bonsololo.” (1 Yoano 1:7) Yehova ulekelanga na mutyima tō nansha ke bubi bukatampe shi twisāsa bya binebine.—Tanga Isaya 1:18.

Le tufwaninwe kulonga bika pa kulekelwa?

Shi tusaka Yehova Leza etulekele, tufwaninwe kwifunda yandi myanda—kwivwanija mashinda andi, madingi andi ne misoñanya yandi. (Yoano 17:3) Yehova ulekelanga bitupu boba besāsa pa mwiendelejo wabo ne kulonga bukomo bwa kushinta.—Tanga Bilongwa 3:19.

Kwitabijibwa na Leza ke kukomopo kotudi. Yehova uyukile bukōkekōke bwetu. I wa lusa ne kanye. Le kanye kandi kekakakutononapo usake kwifunda bivule pa muswelo wa kumusangaja?—Tanga Mitōto 103:13, 14.

Shi usaka kuyukila’ko bivule, tala shapita 5 wa dino dibuku: Lelo I Bika Bine Bifundija Bible? dilupwilwe na Batumoni ba Yehova

[Kifwatulo pa paje 15]

Kwitabijibwa na Leza ke kukomopo