Yehova Ulekelanga bya Binebine

1. Kukwatañana na Musapudi 7:20, le i bubine’ka bwānenene Mulopwe Solomone?

MULOPWE Solomone wānenene amba: “Kekudipo moloke nansha umo pano panshi uloñanga nyeke biyampe ne kulonga bubi mpika.” (Mus. 7:20) Wānenene bya bine! Batwe bonso twi babipya-mambo. (1 Yo. 1:8) Mu kino kitatyi, batwe bonso tusakilwa kulekelwa na Leza ne na bakwetu.

2. Le wiivwananga namani shi mulunda nobe wa pa mutyima wakulekela?

² Padi ye uno ubavuluka kitatyi kyowasanshije mulunda nobe wa pa mutyima. Byowadi usaka mwaluje kipwano kyenu, wakamumwene ne kumulomba lusa bya binebine. Le weivwene namani paakulekēle na mutyima tō? Le watūkijibwe mutyima? I amo, kadi waikele’nka ne kusangala!

3. Le i bika byotusa kwisambila’po mu kino kishinte?

³ Tusakanga Yehova ekale mulunda netu wa pa mutyima, inoko kyaba kimo tubwanya kunena nansha kulonga bintu bimusanshija. Ino mwanda waka tubwanya kukulupila’mba Yehova usakanga kwitulekela? Mwanda waka lulekelo lwa Yehova i lwa kutendelwa shi twiludingakanye na lulekelo lwa bantu? Ne i ani obabwanya kulekela kudi Leza?

YEHOVA USAKANGA KULEKELA

4. Mwanda waka tubwanya kukulupila’mba Yehova usakanga kulekela?

⁴ Kinenwa kya Leza kitukulupija’mba Yehova usakanga kulekela. Pēlombwele Yehova kudi Mosesa ku Lūlu lwa Shinai, wēsambīle kupityila kudi mwikeulu amba: “Yehova, Yehova, Leza wa lusa ne kanye, wija pa kukwatwa bulobo kadi muyule buswe bwa ndamatyidile ne bubine, ulombola buswe bwa ndamatyidile ku tununu ne tununu, ulekela bilubo ne kujilula ne bubi.” (Div. 34:6, 7) Yehova i Leza wa kanye ne lusa, mwine usakanga kulekela banonga-bibi besāsa.​—Neh. 9:17; Ñim. 86:15.

5. Mungya Ñimbo ya Mitōto 103:13, 14, le Yehova byayukile bantu senene, bimulengejanga alonge bika?

⁵ Yehova byadi Umpangi wetu, uyukile kanda ne kanda ketutala. Langa’po bidi! Uyukile kanda ne kanda katala muntu ne muntu pano pa ntanda. (Ñim. 139:15-17) Pa kino, umonanga kubulwa kubwaninina konso kotupyene ku bambutwile betu. Kadi uyukile myanda yonso yetutene mu būmi, mine ilengeja twikale motwikadile’mu. Le Yehova byayukile bantu senene, bimulengejanga alonge bika? Bimulengejanga etwivwanine lusa.​—Ñim. 78:39; tanga Ñimbo ya Mitōto 103:13, 14.

6. Le Yehova i mwilombole namani amba usakanga kulekela?

⁶ Yehova i mwilombole amba usakanga kulekela. Wivwanije amba pa mwanda wa bintu byālongele Adama muntu mubajinji, batwe bonso twi bafingwe mafingo a bubi ne lufu. (Loma 5:12) Kekwadipo muswelo wa kwinyongolola batwe bene mu ano mafingo, nansha kunyongolola’mo bantu bakwabo. (Ñim. 49:7-9) Inoko, Leza wetu wa buswe wetwivwanine lusa ne kukwata’ko mpango ya kwitunyongolola. Le walongele’po namani? Yoano 3:16 ulombola’mba, Yehova watumine wandi Mwana wa bunka amba afwe pa mwanda wetu. (Mat. 20:28; Loma 5:19) Yesu wafwile pa kyetu kyaba​—mwanda wa kunyongolola muntu ense ulombola lwitabijo mwadi. (Bah. 2:9) Bine, byasense Yehova bininge kumona wandi Mwana wasenswe ufwa lufu lubi, kadi lwa kafutululo! Na bubine, shi Yehova kadipo usaka kwitulekela, kadipo wa kwitabija wandi Mwana afwe.

7. Le i bimfwa’ka bimo bya mu Bible bya bantu bobālekēle kudi Yehova na mutyima tō?

⁷ Mu Bible mudi bimfwa bivule bya bantu bobālekēle kudi Yehova na mutyima tō. (Ef. 4:32) Lelo kudi muntu owavuluka? Padi ye uno ubavuluka Mulopwe Manase. Uno muntu mubi wālongele bubi bukatampe ku meso a Yehova. Wātōtele baleza ba bubela ne kukankamika bantu bakwabo bebatōte. Wāipaya bandi bana, na kwibalambula bu bitapwa ku baleza ba bubela. Wākatūla enka ne kilezaleza mu tempelo ikola ya Yehova. Bible unena pādi amba: “Walonga bibi bya mwiko ku meso a Yehova, mwanda wa kumusanshija.” (2 Bi. 33:2-7) Inoko, Manase pa kwisāsa bya binebine, Yehova wāmulekela na mutyima tō. Leza wāmwalwija enka ne pa kitenta kyandi kya bu mulopwe. (2 Bi. 33:12, 13) Padi ye uno ubavuluka ne Mulopwe Davida, wālongele bubi bukatampe ku meso a Yehova, bwa makoji ne kwipayañana. Inoko, Davida pa kwitabija kilubo kyandi ne kwisāsa bya binebine, Yehova wāmulekela. (2 Sa. 12:9, 10, 13, 14) Bine, tubwanya kukulupila’mba Yehova usakanga kulekela. Kadi monka motusa kwibimwema, lulekelo lwa Yehova i lwa kutendelwa shi twiludingakanye na lwa bantu.

LULEKELO LWA YEHOVA I LWA KUTENDELWA

8. Le kwikala kwikele Yehova bu Mutyibi muyampe kumukwashanga namani mu kulekela?

⁸ Yehova i “Mutyibi wa ntanda yonso.” (Ngo. 18:25) Mutyibi muyampe unenwe kuyuka senene bijila. Mo mwikadile ne Yehova, mwanda i Mutyibi kadi Mujidiki wa Bijila. (Isa. 33:22) Kekudipo muntu nansha umo ubwanya kudingakanibwa na Yehova, mu kuyuka kiyampe ne kibi. Lelo i kintu’ka kikwabo kisakilwa mutyibi muyampe? Usakilwa ne kubandaula myanda yonso ya mu kisambo, kumeso kwa kuleta butyibi. Ne mu uno mwanda namo, Yehova i Mutyibi muyampe mwanda uyukanga nyeke myanda yonso.

9. Le i myanda’ka iyukanga Yehova shi kakwata butyibi bwa kulekela nansha kuleka kulekela?

⁹ Kwishila na batyibi ba pano pa ntanda, Yehova uyukanga senene myanda yonso yatyiba’mo mambo. (Ngo. 18:20, 21; Ñim. 90:8) Aye kadipo pamo bwa bantu bemaninanga enka pa byobevwana ne byobamona. Wivwanije senene mwikadile kibutwila, kitamina, ne kifuko kitamine’ko muntu, enka ne malango ne mwiivwanino mobikadile na lupusa pa bilongwa bya muntu. Kadi Yehova uyukanga bidi mu mutyima wa muntu. Wivwanijanga senene kine kyalengeja muntu alonge kintu kampanda. Kekudipo kintu nansha kimo kifyeme kudi Yehova. (Bah. 4:13) Nanshi shi Yehova kalekela muntu, i mwanda uyukile senene myanda yonso.

10. Mwanda waka tubwanya kunena’mba butyibi bwa Yehova bwikalanga nyeke boloke kadi bwendele’mo? (Kupituluka mu Bijila 32:4)

¹⁰ Butyibi bwa Yehova bwikalanga nyeke boloke kadi bwendele’mo. Aye kadipo na mboloji nansha imo. Kalekelangapo muntu mwanda wa mumwekelo, bupeta, kitenta nansha bwino bwandi. (1 Sa. 16:7; Yak. 2:1-4) I kutupu muntu ubwanya kuningila Yehova akwate butyibi kampanda, nansha kumutyiba milomo. (2 Bi. 19:7) Kadi kakwatangapo butyibi na bukalabale nansha na kīji. (Div. 34:7) Bine, Yehova i Mutyibi muyampe mwanda uyukile myanda yonso itutala ne ngikadilo yotudi’mo.​—Tanga Kupituluka mu Bijila 32:4.

11. Mwanda waka lulekelo lwa Yehova i lwa kutendelwa?

¹¹ Balembi ba Bisonekwa bya Kihebelu bāitabije amba, lulekelo lwa Yehova i lwa kutendelwa. Mu myanda imo, bāingidije kishima kya Kihebelu kine kishotolwelwe na dibuku dimo amba, “kino kishima kingidijibwanga enka pa kulombola muswelo ulekelanga Leza banonga-bibi, kino kishima kekibwanyapo kufunkila pa muswelo ulekelanga bantu.” Enka Yehova kete ye ubwanya kulekela bya binebine nonga-bibi wesāsa. Le bikalanga namani shi Yehova wetulekela?

12-13. (a) Le i bika bimwenanga’mo muntu shi abamulekela kudi Yehova? (b) Lelo i bika kebiloñangapo Yehova shi wapu kulekela muntu?

¹² Shi twitabije amba Yehova i mwitulekele, twikalanga na “bitatyi bya kutūja,” mwine mubadilwa ndoe ya mutyima ne mutyima wa mundamunda utōka. Muntu kabwanyapo kwitulekela uno muswelo, poso’nka “Yehova mwine.” (Bil. 3:19) Shi Yehova wetulekela, ujokejanga kipwano kyotwadi tupwene nandi, monka mokyadi kikadile kumeso kwa kulonga bubi.

¹³ Shi Yehova wetulekela, ketutopekangapo monka nansha kwitupa mfuto pa bubi’bwa. (Isa. 43:25; Yel. 31:34) Yehova welanga bubi bwetu kulampe “monka mwikadile kutambanga dyuba kulampe na kuponanga dyuba.”b (Ñim. 103:12) Tukekala na mutyima wa kufwija’ko ne kwivwana nzuba, shi tulangulukila pa mubaile lulekelo lwa Yehova. (Ñim. 130:4) Ino le i ani obakalekela kudi Yehova?

LE I ANI OBAKALEKELA KUDI YEHOVA?

14. Le i bika byotwefunda pa mukwatyilanga Yehova butyibi bwa kulekela muntu nansha kuleka kumulekela?

¹⁴ Tubamone amba, Yehova shi kakwata butyibi bwa kulekela muntu nansha kuleka kumulekela, kemaninangapo pa mubaile nansha mutyepele bubi bwa muntu. Kadi tubamone amba, Yehova wingidijanga buyuki bwandi bwa bu Umpangi, Mujidiki wa Bijila ne Mutyibi, kitatyi kyakwata butyibi bwa kulekela muntu nansha kuleka kumulekela. Le i bika bibandaulanga Yehova?

15. Mungya Luka 12:47, 48, le i kintu’ka kimo bidi kibandaulanga Yehova?

¹⁵ Kintu kimo bidi kibandaulanga Yehova i kuyuka shi nonga-bibi wadi uyukile amba byaadi ulonga’bya i bibi. Yesu wālombwele patōka uno mwanda mu Luka 12:47, 48. (Tanga.) Shi muntu wakwata mpango ya kulonga kintu kibi ku kusaka, aye papo uyukile senene amba i bintu bipeleje Yehova, nabya walonga bubi bukatampe. Uno muntu udi mu kyaka kya kuleka kulekelwa. (Mako 3:29; Yoa. 9:41) Inoko tufwaninwe kwitabija’mba, kyaba kimo tuyukanga’mba byotwalongele’bya i bibi. Le tubwanya kulekelwa shi bidi uno muswelo? I amo, tubwanya kulekelwa! Kino kibetutwala ku kintu kikwabo kibandaulanga Yehova.

16. Le kwisāsa i bika, ne mwanda waka i kwa kamweno shi tusaka’mba Yehova etulekele?

¹⁶ Kintu kikwabo kibandaulanga Yehova, i kuyuka shi nonga-bibi i mwisāse bya binebine. Le kwisāsa i bika? Kwisāsa i “kushinta milangwe, ngikadila, ne bitungo.” Mubadilwa mulangwe wa kwialakanya ne kwitopeka pa bintu bibi bilongelwe nansha pa kuleka kulonga bintu biyampe byadi bifwaninwe kulongwa. Muntu mwisāse kevwanangapo bulanda enka pa bintu bibi byalongele, ino i ne pa kuleka kwaalekele kipwano kyandi na Yehova kizoze, kine kyamulengeje afule ku kulonga bintu bibi. Vuluka’mba Mulopwe Manase ne Davida bālongele bubi bukatampe; ino Yehova wēbalekēle mwanda besāshile bya binebine. (1 Ba. 14:8) Bine, Yehova witulekelanga enka shi wamone kilomboji kya kwisāsa. Inoko kwialakanya’tu pa bubi botwalongele kekubwenepo. Tufwaninwe ne kulonga’po kintu.c Kino kibetutwala ku kintu kikwabo kibandaulanga Yehova.

17. Le kushinta i bika, ne mwanda waka i kwa kamweno shi ketusakepo kujokela mu bubi botwalongele mafuku kunyuma? (Isaya 55:7)

¹⁷ Kintu kikwabo kya mvubu kibandaulanga Yehova i kushinta. Kushinta i “kwalamuka.” Ko kunena’mba, muntu ufwaninwe kuleka kulonga bintu bibi ne kushilula kwikala na būmi busaka Yehova. (Tanga Isaya 55:7.) Muntu ufwaninwe kushinta milangwe yandi, amba aludikwe na milangwe ya Yehova. (Loma 12:2; Ef. 4:23) Kadi ufwaninwe kusumininwa kuleka mulangilo wandi wa kala ne bilongwa byandi. (Kol. 3:7-10) Na bubine, lwitabijo lwetu mu kitapwa kya Kidishitu lo lulengejanga Yehova etulekele ne kwitutōkeja ku bubi. Yehova uketulekela kupityila ku kino kitapwa shi wamone amba, tuloñanga bukomo bwa binebine mwanda wa kushinta mwiendelejo wetu.​—1 Yo. 1:7.

KULUPILA’MBA YEHOVA USA KUKULEKELA

18. Le i bika byotwefunda pa lulekelo lwa Yehova?

¹⁸ Tupitulukei bityetye mu myanda mikatampe yotwesambila’po. Mūlu monso ne pano pa ntanda Yehova ye ulekelanga bya binebine. Mwanda waka tubanena namino? I mwanda dibajinji, usakanga kwitulekela. Dya bubidi, uyukile kanda ne kanda ketutala. Uyukile senene motwikadile, kadi aye ye ubwanya kuyuka shi twi besāse bya binebine. Ne dya busatu, shi Yehova wetulekela, ubulanga bubi bwetu bonso enka na batwe kebadipo balongele bubi. Kino kitulengejanga twikale na mutyima wa mundamunda utōka ne kwitabijibwa nandi.

19. Nansha byotudi bampikwa kubwaninina kadi bendelela kulonga bubi, mwanda waka tubwanya kwikala na nsangaji?

¹⁹ Na bubine, byotukidi bampikwa kubwaninina, tukendelela kulonga bubi. Inoko, tubwanya kusengibwa na binenwa bidi mu dibuku Étude perspicace des Écritures, Volime 2, paje 765, bya amba: “Yehova byatanga mutyima ku bukōkekōke bwa bengidi bandi na lusa, kebafwaninwepo kwendelela kwitopeka pa bilubo byabo bitamba ku kubulwa kubwaninina kobapyene. (Ñim. 103:8-14; 130:3) Shi banangila na mutyima umo mu mashinda a Leza, bakekala na nsangaji. (Fid. 4:4-6; 1 Yo. 3:19-22).” Bine bikankamika’po kashā!

20. Le i bika byotukesambila’po mu kishinte kilonda’ko?

²⁰ Tufwija’ko bininge Yehova mwanda usakanga kwitulekela shi tubealakanya bya binebine pa bubi botulongele. Le penepo, i muswelo’ka otubwanya kwiula lulekelo lwa Yehova? Le kulekela kwetu kwiifwene na kwa Yehova muswelo’ka, ne i kwishile namani? Mwanda waka kuyuka kuno kwishila i kwa mvubu? Tukatana bilondololwa ku bino bipangujo mu kishinte kilonda’ko.