Kulupila’mba Yehova I Mukulekele

1-2. Le Yehova uloñanga namani kitatyi kyotwisāsa bubi bwetu? (Tala ne kifwatulo .)

MULOPWE Davida wādi uyukile mwikadilanga muntu witopeka pangala pa bubi bwa pa kala. (Ñim. 40:12; 51:3; bilembwa bya kūlu) Wālongele bilubo kampanda bikatampe mu bwandi būmi. Inoko wēsāshile bya binebine kadi Yehova wāmulekele. (2 Sa. 12:13) Kino kyālengeje Davida ekale na nsangaji itamba ku kulekelwa na Yehova.—Ñim. 32:1.

² Pamo bwa Davida, netu tubwanya kwikala na nsangaji itamba ku kulekelwa na Yehova. Kisenga’po kashā kuyuka’mba Yehova witulekelanga na mutyima umo bubi bwetu—enka ne bubi bukatampe—shi tubesāsa bya binebine ne kulonga bukomo bwa kuleka kujokela mu bilubo bimo byonka! (Nki. 28:13; Bil. 26:20; 1 Yo. 1:9) Kadi bisenga’po mpata kuyuka’mba Yehova witulekelanga bubi bwetu bya binebine pamo’nka bwa abo kebwalongekelepo!—Ezk 33:16.

3-4. Le kaka umo weivwene namani pa kupwa kubatyijibwa, ne i bika byotusa kubandaula mu kino kishinte?

³ Kitatyi kimo, bibwanya kwikala bikomo kukulupila’mba Yehova i mwitulekele. Tubandaulei’ko kimfwa kya Jennifer, watamīne mu bubine. Mu kusongola kwandi, washilwile kwiendeja bibi ne kwikala na būmi bwa mapala abidi. Myaka pa kupita’po, wajokela kudi Yehova ne kubwanya bisakibwa bya kubatyijibwa. Unena’mba: “Mu būmi bwami bwa pa kala nadi nsenswe bininge bintu bya ku ngitu, busekese, mutomeno-mpata ne bulobo bupitepite. Nadi ndyukile amba byonesāsa ne kulomba Yehova andekele bubi bwami, natōkejibwa pa mwanda wa kitapwa kya Kidishitu. Inoko nkyabwenyepo kukulupija mutyima wami amba Yehova i mundekele.”

⁴ Le kitatyi kimo bikukomenanga kukulupija mutyima obe amba Yehova ke mukulekele bilubo byobe bya pa kala? Yehova usakanga tukulupile amba i mwitulekele monka mwākulupidile Davida. Mu kino kishinte, tusa kubandaula’mo kine kyotunenwe kukulupidila’mba Yehova i mwitulekele ne bibwanya kwitukwasha tulonge namino.

MWANDA WAKA TUFWANINWE KUKULUPILA’MBA YEHOVA I MWITULEKELE?

5. Le Satana usakanga tukulupile bika? Leta kimfwa.

⁵ Kukulupila’mba Yehova i mwitulekele, kubwanya kwitukwasha tuleke kuponena mu dikinga dimo dya Satana. Vuluka’mba Satana uloñanga bukomo bwandi bonso mwanda wa kwitukankaja kwingidila Yehova. Pa kufikila pa kino kitungo, Satana ubwanya kulonga bukomo bwa kwitulengeja tukulupile amba Yehova ketulekelangapo bubi bwetu. Tubandaulei’ko kimfwa kya mwana-mulume umo wa mu Kodinda mwine wāfundwilwe mu kipwilo pa mwanda wa busekese bwaālongele. (1 Ko. 5:​1, 5, 13) Kitatyi kyaēsāshile, Satana wādi usaka bantu ba mu kipwilo baleke kumufwila lusa ne kuleka kumutundaila mu kipwilo. Enka mu kine kitatyi’kya, Satana wādi ukimba uno muntu wēsāshile alange amba kafwidilwepo lusa—mwanda wa ‘alēmenenwe na kufītwa mutyima bipitepite’ amba aleke kwingidila Yehova. Satana kashintyile kitungo kyandi nansha manwa andi. Inoko batwe “ketwidilwepo manwa andi.”—2 Ko. 2:​5-11.

6. Le i bika byotufwaninwe kulonga shi twi balēmenenwe na kwitopeka?

⁶ Kukulupila’mba Yehova i mwitulekele kubwanya kwitukwasha tuleke kwitopeka. Mungya kipangila shi tubalonga bubi, twitopekanga. (Ñim. 51:17) Kulonga namino i kuyampe. Mutyima wetu wa mundamunda ubwanya kwitukwasha tulemunune mwiendelejo wetu. (2 Ko. 7:​10, 11) Inoko shi twendelele kwitopeka mu bula bwa kitatyi kilampe pangala pa bubi botwisāshile, kino kibwanya kwitulengeja tuleke kwingidila Yehova. Ino kukulupila’mba Yehova i mwitulekele, kubwanya kwitukwasha tuleke kwitopeka. Ebiya tukabwanya kwingidila Yehova monka mwasakila—ko kunena’mba na mutyima wa mundamunda utōka ne na nsangaji mikatampe. (Kol. 1:​10, 11; 2 Tm. 1:3) Le penepo, i muswelo’ka otubwanya kukulupija mutyima wetu amba Leza i mwitulekele?

LE I BIKA BIBWANYA KWITUKWASHA TUKULUPILE AMBA YEHOVA I MWITULEKELE?

7-8. Le Yehova wēyukenye namani kudi Mosesa, ne kino kitukulupija bika? (Divilu 34:​6, 7)

⁷ Langulukila pa muswelo wēyukenye Yehova aye mwine. Kimfwa, tala byobāsapwidile Mosesa kudi Yehova ku Lūlu lwa Shinai.a (Tanga Divilu 34:​6, 7.) Nansha Yehova byadi na ngikadila mivule miyampe, ino aye wātongele kusapwila Mosesa amba i “Leza wa lusa ne kanye.” Le uno Leza wa lusa ukatunya kulekela mutōtyi wandi wisāsa bya binebine? Aa! Kulonga namino i kubulwa lusa, kadi i kwikala na mutyima mūmu—ngikadila mine keikabwanyapo kulombola Yehova.

⁸ Tukulupilei amba kitatyi kitusapwila Yehova amba i wa lusa, i bubine bwaetusapwila mwanda kabepangapo. (Ñim. 31:5) Nanshi tukulupilei byanena. Shi ubakomenwa kutalula milangwe ya kwitopeka pangala pa bubi bobe bwa pa kala, wiipangule amba: ‘Le nkulupile bya binebine amba Yehova i Leza wa lusa ne kanye kadi kakabwanyapo kulandula mambo a bubi bwa kipya-mambo wisāshile? Le mbulwe’po kukulupila’mba i mundekele?’

9. Le kulekelwa bubi bwetu kushintulula bika? (Ñimbo ya Mitōto 32:5)

⁹ Langulukila pa kine kyālengeje Yehova ape balembi ba Bible bukomo bwa mushipiditu amba besambile pa lulekelo lwandi. Kimfwa, tala Davida mulembi umo wa Bible mwaālombwedile mwikadile lulekelo lwa Yehova. (Tanga Ñimbo ya Mitōto 32:5.) Davida wānenene amba, “Waundekela kilubo kya bubi bwami.” Kishima kya Kihebelu kyalamwinwe bu “lulekelo,” kibwanya kushintulula “kutekuna,” “kutalula,” nansha “kusela.” Yehova paālekele Davida bubi bwandi, udi pamo bwa aye wēbutekwine ne kwibwela kulampe. Ebiya Davida watūkijibwa kiselwa kilēma kya kwitopeka kyaādi uselele. (Ñim. 32:​2-4) Netu tubwanya kwiivwana uno muswelo. Kitatyi kyotwisāsa bya binebine bubi bwetu, ketufwaninwepo kwendelela kusela kiselwa kilēma kya kwitopeka pangala pa bubi bwitutalwile Yehova ne kwibwela kulampe netu.

10-11. Le binenwa bya amba “kwijepo kulekela” bitusapwila bika padi Yehova? (Ñimbo ya Mitōto 86:5)

¹⁰ Ñimbo ya Mitōto 86:5. Pano Davida wisambila padi Yehova amba ‘kejengapo kulekela.’ Dibuku dimo dishintulula myanda ya mu Bible dīsambila padi Yehova amba: “[Aye] i ‘wa lulekelo—ye ‘mwaikadile.’” Mwanda waka Yehova i wa lulekelo? Kipindi kya bubidi kya vese 5 kinena’mba: “Wi muyulwe buswe bwa ndamatyidile ku boba bonso bakwita.” Monka motwefundile’kyo mu kishinte kibadikile, buswe bwa ndamatyidile bulengejanga Yehova alamate nyeke batōtyi bandi ba kikōkeji. Pa mwanda wa buswe bwandi bwa ndamatyidile, Yehova “ukalekela na mutyima tō” babipya-mambo bonso besāsa. (Isa. 55:​7, kunshi kwa dyani) Shi i bikomo kodi kukulupila’mba Yehova i mukulekele, wiipangule amba: ‘Le nkulupile amba Yehova i wa lulekelo—ne amba ulekelanga babipya-mambo bonso besāsa ne kumulomba lusa? Le mbulwe’po kwitabija’mba waundekele kitatyi kyonamulombele lusa?’

¹¹ Kuyuka’mba Yehova wivwanije amba twi bantu ba bubi, kubwanya kwitusenga. (Ñim. 139:​1, 2) Kino i kimweke patōka mu lwimbo lukwabo lwa mitōto lwa Davida, lwine lubwanya kwitukwasha tukulupile amba Yehova i mwitulekele.

KETWAKILWAI BYOBYA BIVULUKANGA YEHOVA POTUDI

12-13. Mungya Ñimbo ya Mitōto 103:​14, le Yehova uvulukanga bika potudi, ne kino kimulengejanga alonge bika?

¹² Tanga Ñimbo ya Mitōto 103:14. Davida wisambila padi Yehova amba “uvulukanga’mba twi luvumbi.” Bino binenwa bya Davida bilombola bubinga bumo bulengejanga Yehova alekele batōtyi bandi besāsa, bwa amba: Uyukile amba twi bantu ba bubi. Pa kwivwanija uno mwanda biyampe, tubandaulei na katentekeji bino binenwa bya Davida.

¹³ Davida unena’mba Yehova “uyukile biyampe motubumbīlwe.” Wāpangile Adama “ku luvumbi lwa biloba.” Nanshi uyukile mwāpangilwe bantu ne byobya byobasakilwa. Kimfwa kudya, kulāla, ne kufoma. (Ngo. 2:7) Inoko ba Adama ne Eva pa kulonga bubi, kupangwa kwabo kwa ku luvumbi kwāikele na buluji bukwabo. Byotudi ba ku lutundu lwabo, twi bapyane bubi bwine bwitutononanga tulonge bintu bibi. Yehova uyukile amba twi bantu ba bubi; inoko kadi Davida unena pādi amba “uvulukanga” ne kuvuluka uno mwanda. Kishima kya Kihebelu kingidijibwe pano kibwanya kushintulula kuvuluka kulonga kintu kiyampe. Tubwanya kulombola mu kīpi byādi bikimba kunena Davida amba: Yehova wivwanije amba kitatyi kimo tubwanya kulonga bilubo; inoko shi kino kibetufikila, uketabija kwisāsa kwetu na kwitulombola lusa ne lulekelo.—Ñim. 78:​38, 39.

14. (a) Le i myanda’ka mikwabo yānenene Davida pa muswelo witulekelanga Yehova? (Ñimbo ya Mitōto 103:12) (b) Le kimfwa kya Davida kilombola namani mubaile lulekelo lwa Yehova? (Tala kapango “Muswelo Ulekelanga Yehova ne Kwilwa Bilubo.”)

¹⁴ Le lulekelo lwa Yehova i lukatampe namani? (Tanga Ñimbo ya Mitōto 103:12.) Davida unena’mba kitatyi kilekelanga Yehova, utūlanga bubi bwetu kulampe “monka mwikadile kutambanga dyuba [kutunduka] kulampe na kuponanga dyuba [kushika].” Na bubine, kutunduka i kulampe bininge na kushika; kadi ino mitamba ibidi keibwanyapo kwitana nansha dimo. Le kino kitufundija bika pa mwitulekelanga Yehova bubi bwetu? Dibuku dimo dya kunyemena’ko dyelekeja uno mwanda namino: “Shi bubi bubaelwa kulampe, kukevwanapo kaluvumba nansha kumona lwayo, ko kunena’mba bubajimina lonso.” Mwanda shi kwikale luvumba, muntu ubwanya kuvuluka. Inoko shi Yehova wetulekela, kekushalangapo lwayo nansha kaluvumba kabwanya kumuvuluja bubi botulongele.—Ezk. 18:​21, 22; Bil. 3:19.

15. Le tukalonga namani shi mutyima wetu wendelela na kwitutopeka pangala pa bilubo byetu bya pa kala?

¹⁵ Le binenwa bya Davida bidi mu Lwimbo lwa Mitōto lwa 103 bitukwasha namani tukulupile amba Yehova i mwitulekele? Shi mutyima wendelela kwitutopeka pangala pa bilubo byetu bya pa kala, i biyampe twiipangule amba: ‘Le nailwa’mba Yehova uvulukanga’mba ne muntu wa bubi—ne amba ulekelanga kipya-mambo wisāsa pamo bwa ami? Kadi le mvulukanga byobya bitongele Yehova kwilwa—ko kunena’mba bubi bwakadi mundekele bwakabwanyapo kunandula monka?’ Yehova katengapo mutyima pa bubi bwetu bwa pa kala. Netu ketufwaninwepo kuta’ko mutyima. (Ñim. 130:3) Shi ukulupile amba Yehova i mukulekele, nabya ukelekela abe mwine bilubo byobe bya pa kala ne kwendelela kumeso.

16. Leta kimfwa kilombola kyaka kidi mu kwendelela kwitopeka pangala pa bubi bwa pa kala. (Tala ne kifwatulo.)

¹⁶ Tubandaulei’ko kino kimfwa. Kwendelela kuvuluka bubi bwa pa kala kudi pamo bwa shofele wendeja motoka koku wendelela kutala mu dikalashi ditala kunyuma. Shako i biyampe kutala’ko na dimodimo mu dikalashi mwanda wa kumona byaka bidi kunyuma. Inoko pa kwenda senene, shofele ufwaninwe kutala kumeso. Muswelo umo onka, kuvuluka na dimodimo bilubo byetu bya pa kala, kubwanya kwitukwasha tuboile’ko ñeni ne kuningija kusumininwa kwetu kwa kuleka kujokela’mo. Inoko shi twendelele kuta mutyima pa bilubo byetu bya pa kala, kwitopeka’kwa kubwanya kwitulengeja tuleke kwingidila Yehova. Nanshi i biyampe twendelele kutala kumeso. Tudi mu dishinda ditwala mu ntanda mipya ya Leza, mwine ‘kemukavulukwapo’ bintu bibi.—Isa. 65:17; Nki. 4:25.

TWENDELELEI KUKULUPIJA MITYIMA YETU

17. Mwanda waka tufwaninwe kwendelela kukulupija mityima yetu amba Yehova witusenswe kadi i mwitulekele?

¹⁷ Tufwaninwe kwendelela kukulupija mityima yetu amba Yehova witusenswe kadi i mwitulekele. (1 Yo. 3:​19, kunshi kwa dyani) Mwanda waka? Mwanda Satana kakalekapo kulonga bukomo bwa kwitukulupija’mba Yehova ketusenswepo kadi ketulekelepo bilubo byetu. Kadi kitungo kyandi i kimo kyonka: i kya kwitulengeja tuleke kwingidila Yehova. Tubwanya kutengela’mba Satana ukendelela kulonga bukomo bwa kwitukankaja kwingidila Yehova mwanda uyukile amba kubamushadila kakitatyi katyetye. (Kus. 12:12) Ketwakilekai Satana anekenye!

18. Le ukalonga bika pa kukulupija mutyima obe amba Yehova ukusenswe kadi i mukulekele?

¹⁸ Pa kuningija kikulupiji kyobe kya amba Yehova ukusenswe, ingidija myanda yotwefundile mu kishinte kibadikile. Pa kukulupija mutyima obe amba Yehova i mukulekele, langulukila pa muswelo wilombwele Yehova mwaikadile. Kadi langulukila pa kine kyālengeje Yehova ape balembi ba Bible mushipiditu ujila mwanda wa besambile pa lulekelo lwandi. Kokelwa amba Yehova uyukile amba wi muntu wa bubi kadi ukakulongela bintu na lusa. Vuluka’mba shi wa kulekela, ukulekelanga bya binebine. Bine, shi nobe ukulupile pamo bwa Davida amba Yehova i wa lusa, ukabwanya kunena’mba, “Wafwa’ko Yehova pa nkundekela ‘bubi bwami’!”—Ñim. 32:5.