Mwa Kulumbulwila Busongi Bobe bwa Bubidi

“Linda wēlubwile na wandi mulume mubajinji. Aye ne Herman i basangele kushikatyila pamo.” Inoko, monka mobayukile, busongi bwa bubidi bubwanya kuleta bikoleja kebyādipo mu busongi bubajinji.b

Shi wi musonge nansha kusongwa monka, le umonanga busongi bobe bwa bubidi namani? Mukaji umo witwa bu Tamara, wasongelwe monka myaka isatu pa kupwa kulubulwa, unena amba: “Kitatyi kyosongwa musunsa mubajinji, ulañanga’mba busongi bobe bukalādila nyeke. Ino mu busongi bwa bubidi, kubwanyapo padi kulanga namino, mwanda uyukile kala’mba busongi bobe bubajinji bwatyumukile.”

Inoko, ba mulume ne mukaji bavule batananga nsangaji mivule kadi ya nyeke pa kupwa kwisonga dikwabo. Bekalanga mu busongi bwa nsangaji​—kadi nobe ubwanya kwikala nayo! Namani? Tala bikoleja bisatu bivudile kumweka ne muswelo ubwanya kukukwasha misoñanya ya mu Bible ulwe nabyo.c

KIKOLEJA 1: ULWA NA KUPINGAKENYA BUSONGI BOBE BWA DYALELO PA BUSONGI BOBE BUBAJINJI.

Ellen, wikalanga mu Afrika wa Kunshi unena’mba, “nkibwanyapo kwilwa mu ñeni busongi bwami bubajinji, nakampata kitatyi kyotwenda ku bifuko byonādi ñenda na wami mulume mubajinji mu konje. Kyaba kimo mfulanga ku kudingakanya wami mulume ondi nandi pano na mulume mubajinji.” Pakwabo kadi, shi mwinē penu wādi na mwinē pandi mubajinji, ubwanya kuyuka shi mwinē pobe wisambila divule pa bwine busongi’bwa.

MADINGI: Itabija’mba ke biyampepo kukulupila amba abe nansha mwinē pobe ukelwa’tu busongi bubajinji, nakampata shi bwālele myaka mivule. Bine, bantu bamo betabijanga’mba, betanga mu kitulumukila benē pabo pa majina a benē pabo babajinji! Le ubwanya kunekenya namani mwanda pamo bwa uno nansha mukwabo wiifwene na uno? Bible udingila’mba, “ikalai ne mutyima umo.”​—1 Petelo 3:8.

Kokamukankaja na mukao kwisambila pa busongi bubajinji. Shi mwinē pobe usaka kwisambila pa būmi bwa mwinē pandi mubajinji, muteje na lusa. Kadi, kokafula ku kunenena bukidibukidi amba ukudingakanyanga. Ian, wasongele monka pano kepadi myaka 10 unena, “wami mukaji Kaitlyn kadipo umona kwisamba myanda ya wami mukaji mubajinji bu kumwela mwiko. Ino wadi wikumona bu muswelo wa kuyuka kine kyalengeje ngikale mongikadile dyalelo.” Padi ubwanya’nka ne kumona’mba ino mīsambo ikakukwasha utamije kipwano kya mpwaninine na mwinē pobe mupya.

Imanina pa ngikadilo miyampe kadi ya pa bula idi na mwinē pobe wa dyalelo. Shako, mwinē pobe ubwanya kubulwa kwikala na ngikadilo nansha bwino bumo bwadi na mwinē pobe mubajinji. Inoko, mwinē pobe wa dyalelo ubwanya padi kumupita mu bintu bikwabo. Nanshi, komeja kipwano kyopwene na mwinē pobe odi nandi dyalelo, ‘ne kumudingakanya na mukwabo mpika,’ kupityila ku kulanguluka ne kusangela byobya byosenswe padi mwinē pobe. (Ngalatea 6:4, Dibuku Dijila) Muntu umo witwa bu Edmond, wasongele misunsa ibidi unena’kyo uno muswelo’mba, “Monka kemwiifwanine balunda babidi, masongi abidi nao keiifwenepo.”

Le i muswelo’ka obwanya kuvuluka na ndiñamano busongi bobe bubajinji kukwatañana na būmi bowashilula na mwinē pobe mupya? Jared unena’mba, “difuku dimo nashintulwidile wami mukaji amba busongi bwami bubajinji bwadi pamo bwa dibuku diyampe dyonālembele ami ne wami mukaji mubajinji. Nadi mbwanya kwidiputula, kwiditanga kitatyi ne kitatyi ne kulangulukila pa bintu biyampe byotwemwenine. Ino, būmi bwami kebwadipo mu dino dibuku. Inoko, ami ne wami mukaji twasonekele pamo dibuku dyetu, kadi pano būmi bwami i bwa nsangaji mwanda wa dino dibuku.”

KIKOLEJA 2: ULWA PA KWISAMBA NA BALUNDA NOBE BA KALA KEBAYUKILEPO MWINĒ POBE MUPYA.

Javier, wasongele monka myaka isamba pa kupwa kwilubula na wandi mukaji unena’mba, “kyaba kimo pa kupwa kwisonga, wami mukaji wadi ulanga’mba balunda batyetye mu balunda nami badi bamubandaula ne kumutompa.” Mulume umo witwa bu Leo watenwe mu ngikadilo mishile na ino. Unena’mba, “bantu bamo badi balombola wami mukaji mu meso ami amba, badi basenswe wandi mulume mubajinji ne amba bamudilanga!”

MADINGI: Longa bukomo bwa kwitūla pa kyaba kya balunda nobe. Ian utelelwe kūlu unena’mba, “monanga bu balunda nami ba kala bakomenwanga kyaba kimo kupwana na muntu umo pa ba mulume ne mukaji bobayukile.” Nanshi ikala ‘wakupwanya, lombola butūkanye’ ku bantu bonso. (Tetusa 3:2) Shila’ko balunda nobe ne kisaka kitatyi kya kushinta. Busongi bobe byo bwashinta, kipwano kyobe nankyo kibwanya kushinta. Javier, utelelwe ku ngalwilo unena’mba, kitatyi pa kupita’po, aye ne wandi mukaji balumbulula bipwano byabo bya kala. Ubweja’ko amba, “ino tuloñanga ne bukomo bwa kusokola balunda bapya mu kisaka, kadi kino nakyo kitukwashanga.”

Yuka milangwe ya mwinē pobe popityija kitatyi pamo na balunda nobe ba kala. Kimfwa, shi bilomba kutweja mwinē pobe mubajinji mu mīsambo, ikala na bujinguludi kutyina mwinē pobe wa dyalelo wakeivwana bu misambo keimutalepo. Lukindi lumo lwa mu Bible lunena’mba, “kudi wa kampeja-bukidi ka kunenena pamo’nka bwa kusaba bwa kipete: Ino ludimi lwa bañeni luleta bukomo.”—Nkindi 12:18.

KIKOLEJA 3: ULWA PA KUKULUPILA MWINĒ POBE MUPYA MWANDA WA MWINĒ POBE MUBAJINJI KĀDIPO NA KIKŌKEJI.

Andrew, wanyemenwe na mukaji mubajinji unena’mba, “nadi nyeke ntyina kulongelwa buzazangi monka”. Wāsongele mwenda mafuku Riley mukaji wadi nandi pano. “Nadi neipangula divule shi mbwanya kwikala muyampe na mwandi mwikadile mulume mubajinji wa Riley. Nadi na malangalanga’mba ubwanya kunena’mba nkidipo muyampe bininge ne kwenda kwa muntu mukwabo.”

MADINGI: Lombola mwinē pobe milangwe yobe na bwanapabo. Bible unana’mba, “kokwa kekudipo kukala-ñeni biswa-mutyima bilāla.” (Nkindi 15:22) Kukala ñeni kwākweshe ba Andrew ne Riley mwenda mafuku bekulupila abo bonso. Andrew unena’mba, “nasapwidile Riley amba nkikanyemenapo ku dilubu bu dishinda dipēla dya kupwa myanda, kadi Riley waunkulupija’mba nandi kabwanyapo kulonga namino. Mwenda mafuku, namukulupila bya binebine.”

Shi mwinē pobe odi nandi pano bamulongele buzazangi mu busongi bubajinji, longa bukomo bwa kumukwasha akukulupile. Kimfwa, ba Michel ne Sabine ba busongi bwabo bubajinji bwāfudile na kwilubula, bāitabije kwilombola shi basaka kukesamba na benē pabo babajinji. Sabine unena’mba, “kuno kwiivwana kwitwikadijanga mu ndoe ne mutyima-ntenke.”​—Efisesa 4:25.

Masongi mavule a bubidi ekalanga na nsangaji, ne bobe nabo bubwanya kwikala na nsangaji. Ne kadi, byowāsongele kala musunsa mubajinji, ubwanya padi kwiyuka biyampe. Andrew utelelwe kūlu unena’mba, “natene busengi bukatampe mu busongi bwami na Riley. Pa kupwa myaka 13 mu busongi, twibapwane bininge—kipwano kyotupela kujimija.”