Muswelo Otubwanya Kukwasha pa Kuvuija Bisakibwa bya Bakwetu
FRANÇOIS, mukulumpe udi mu ntanda myendelele unena’mba, “bupolapola bwalupukile pa kupwa kwa vote yapelelwe na bantu, bwalengeje maelefu ne maelefu a Batumoni ba Yehova banyeme mu mobo abo. Bya kudya ne bundapi byasakana, kadi bintu bikwabo byakanda lupoto. Mabanki afungwa, ne mashini kwa kutweja kalata ka banki aleka kwingila.”
Banabetu ba ku bilo ya musambo bashilula kuleta lupeto ne kutumina’lo bukidibukidi Batumoni ba Yehova bānyemene, bādi bakongakanibwe mu Mobo a Bulopwe mu ino ntanda. Balwana bajika mashinda, ino bonso byobādi bayukile’mba Batumoni kebekujangapo mu myanda ya ntanda, myotoka ya musambo yadi ipita pampikwa kukambakanibwa.
François unena’mba “mu dishinda dyenda ku Njibo ya Bulopwe imo, bantu badi bepayañana bashilula kwasa wetu motoka masashi. Inoko bidyanga byadi bitupita. Pa kumona sola wiya kotudi lubilo ukwete buta ku kuboko, twatonta motoka lubilo ne kujokela ku musambo. Twāfwijije’ko Yehova pa kwikala bōmi. Difuku kyālondele’po, banabetu 130 badi mu ino Njibo ya Bulopwe bafika mu kifuko kya mutyima-ntenke. Bamo bāiya ku bilo ya musambo, kwine kotwāvuije bisakibwa byabo bya ku mushipiditu ne bya ku ngitu kufika ne byāpwile tuvutakanya.”
François unena’mba, “bilo ya musambo yātambwile mwenda mafuku mikanda mivule ya kufwija’ko ya banabetu batambile ku ntanda’ya. Kwimwena muswelo wadi wibakwasha banababo ba mitamba mikwabo, kwatamije kikulupiji kyabo mudi Yehova.”
Mu kitatyi kya bimpengele bya kipangila ne byobya bilengejibwa na bantu, ketunenangapo batutu ne bakaka basakilwa bukwashi’mba “[kotei] mudilo, mwikute.” (Yak. 2:15, 16) Ino tukimbanga kuvuija bisakibwa byabo bya ku ngitu. Mu muswelo umo onka, pa kupwa kudyumunwa ku kipupo kya nzala kyadi kya kufika mu myaka katwa kabajinji, “bāna-babwanga batele ponka mutyima wa kutumina bāna babo byakupandilamo badi bēkele mu Yudea, monka mwadi mwikadile bupeta bwabo balongela monka, wa twandi wa twandi.”—Bil. 11:28-30.
Batwe bengidi ba Yehova, tudi na mutyima wa kukwasha bantu basakilwa bukwashi bwa bintu bya ku ngitu. Inoko, bantu badi kadi ne na bisakibwa bya ku mushipiditu. (Mat. 5:3) Pa kwibakwasha bayuke bino bisakibwa ne kutabula matabula a kwibivuija, Yesu wāpele balondi bandi mwingilo wa kulonga bana ba bwanga. (Mat. 28:19, 20) Batwe bonso tupānanga kitatyi kyetu, bukomo, ne bituntwa byetu mwanda wa kuvuija uno mwingilo. Byotudi mu bulongolodi, twingidijanga lupeto lutūlwa mwanda wa kukwasha bantu ku ngitu, ino byabuntu bingidijibwanga nakampata mwanda wa kwendeleja tumweno twa Bulopwe kumeso ne mwanda wa kusapula myanda miyampe. Mu uno muswelo, tulombolanga buswe botuswele Leza ne bakwetu.—Mat. 22:37-39.
Boba bakwatakanya mwingilo wa Batumoni ba Yehova wingilwa ntanda yonso babwanya kukulupila amba, byabuntu byabo bingidijibwanga biyampe kadi mobyendele. Lelo ubwanya kukwasha banabenu basakilwa bukwashi? Le usakanga kukwatakanya mwingilo wa kulonga bana ba bwanga? Shi i amo, “Kokapelejapo biyampe kudi bene’byo, po dikōkeja dikasa dyobe kulonga’kyo.”—Nk. 3:27.