“Yewa Udi ne Dīso dya Bu-Kyababulāle Ukeselwa”

TAMBA kala bitapwa bidi na mvubu mu mutōtelo wa bine. Bene Isalela bādi balambula bitapwa bya banyema, bene Kidishitu nabo balambulanga nyeke “kitapwa kya mitendelo.” Inoko, kudi bitapwa bikwabo bisangajanga Leza. (Bahebelu 13:15, 16) Bino bitapwa bituletelanga nsangaji ne madyese’nka na mwikilombwela bimfwa bilonda’ko’bi.

Hana, mwingidi wa kikōkeji wa kala, wādi wabila kwikala na mwana, inoko wādi ñumba. Wāpikile mpiko kudi Yehova mu milombelo yandi amba shi abutule mwana, nabya ukamupāna “kudi Yehova mafuku onsololo a bumi bwandi.” (1 Samwele 1:10, 11) Kitatyi pa kupita’po, Hana wāimita ne kubutula mwana mwana-mulume, wāmwinika bu Samwele. Samwele pa kulekeshibwa, Hana wākamutwala ku kipema, enka na mwaāpikile mpiko yandi. Yehova wāesele Hana pa mwanda wa mutyima wandi wa kwipāna. Wāikele na dyese dya kubutula bana bakwabo batano, kadi Samwele wāikele bu mupolofeto ne mulembi wa Bible.—1 Samwele 2:21.

Pamo bwa ba Hana ne Samwele, bene Kidishitu dyalelo badi na dyese dya kwipāna mu mwingilo wa Umpangi wabo. Yesu wālaile amba kitapwa kyonso kyotulambula mwanda wa kutōta Yehova, kiketupadilwa mpalo mivule.—Mako 10:28-30.

Mu myaka katwa kabajinji, mwana-mukaji umo mwine Kidishitu witwa bu Dokasa wādi muyukane mwanda wa “bilongwa biyampe bivule ne kupāna byabuntu bingi bya ku lusa”—ko kunena’mba byabuntu byaādi ukwasha nabyo bantu bakwabo. Inoko yō, mwanda “wabelele wafwa,” ne kino kyāletēle kipwilo kyonso bulanda. Bana ba bwanga pa kwivwana’mba Petelo udi ku kibundi kya pabwipi, bākamwita āye bukidibukidi. Langa’po bidi mobāivwanine nsangaji pāile Petelo ne kusangula Dokasa—aye ye muntu mubajinji kusangulwa na mutumibwa! (Bilongwa 9:36-41) Leza kāidilwepo byabuntu bya Dokasa. (Bahebelu 6:10) Nsekununi ya kimfwa kyandi kya buntu yālaminwe mu Kinenwa kya Leza bu kimfwa kiyampe kyotufwaninwe kwiula.

Mutumibwa Polo nandi wāshile kimfwa kiyampe kya kuta bantu mutyima ne kupāna kitatyi kyandi ku buntu bitupu. Aye pa kulembela banababo bene Kidishitu ba mu Kodinda, wānenene amba: “Amiwa’ko nsa kusangela mpata kupāna bintu byami ne kupānwa ami ense pa mwanda wa myuya yenu.” (2 Kodinda 12:15) Polo wāyukile kupityila ku byāemwenine amba kwipānina bantu bakwabo kekuletangapo’tu enka nsangaji kete—ino kya mvubu nakampata—kuletanga madyese a Yehova ne kwitabijibwa nandi.—Bilongwa 20:24, 35.

Bine, Yehova usangalanga shi twingidija kitatyi ne bukomo bwetu mwanda wa kwendeleja kumeso tumweno twa Bulopwe ne kukwasha banabetu. Ino le kudi miswelo mikwabo yotubwanya kukwatakanya’mo mwingilo wa busapudi bwa Bulopwe? En-en, idi’ko! Kutentekela pa mingilo yetu ya buswe, tubwanya kadi kutumbija Leza kupityila ku byabuntu byetu bya kwilanga. Bino byabuntu bingidijibwanga mwanda wa kukwatakanya mwingilo wa busapudi wa ntanda yonso, bamishonele ne bengidi bakwabo ba pa bula ba kitatyi kyonso. Kadi, kuteakanibwa ne kwalamunwa kwa mabuku ne mavideo, mwingilo wa kukwasha bantu baponenwa na bimpengele bya kipangila, ne lūbako lwa Mobo mapya a Bulopwe, bino byonso’bi bikwatakanibwanga na byabuntu byetu bya kwilanga. Tukulupilei amba “yewa udi ne dīso dya bu-kyababulāle ukeselwa.” Kadi, shi tupa Yehova bintu byetu bya bulēme, nabya tumutumbijanga.—Nkindi 3:9; 22:9.

Muswelo Utūlanga Bantu Bamo Byabuntu Bya Mwingilo Wa Ntanda Yonso

Pamo’nka na mu mafuku a mutumibwa Polo, bantu bavule dyalelo ‘baleanga’ko kantu kampanda,’ nansha misokwe, buvule bwa lupeto ne kwilutūla mu kasanduku ka byabuntu ka pa kipwilo kalembelwe’po amba “Mwingilo Wingilwa Ntanda Yonso.” (1 Kodinda 16:2) Kweji ne kweji, bipwilo bitumanga bino byabuntu ku bilo ya Batumoni ba Yehova ya mu yabo ntanda. Kadi ubwanya ne kutumininina kyabuntu kyobe kupityila ku kiyukeno kya leta kingidijanga Batumoni ba Yehova mu yenu ntanda. Pa kuyuka dijina dya kiyukeno kya leta kingidijanga Batumoni ba Yehova mu yenu ntanda, ipangula ku bilo ya musambo itala wenu mwaba. Ubwanya kutana adelese ya bilo ya musambo pa www.jw.org. Kukwatañana na ngikadilo ya kwenu, mu miswelo ya byabuntu byobwanya kutumininina mubwanya kubadilwa ne ino:

BYABUNTU BYA KUTUMINININA

Byabuntu bibwanya kutūlwa bukidibukidi kupityila ku tulata twa ku banki. Mu misambo imo ubwanya kutūla byabuntu kupityila ku jw.org nansha ku Diteba dikwabo ditongelwe.
Ubwanya kutūla kyabuntu kya lupeto lodi nalo ku makasa. Bilomba ne kulemba mukanda ulombola’mba lupeto’lwa i kyabuntu kyowatuma.

BYABUNTU BITEAKANIBWE KALA

Kutentekela pa byabuntu bya lupeto, kudi miswelo mikwabo ya kukwatakanya mwingilo wa Bulopwe wingilwa ntanda yonso. Ino miswelo i mitelwe kunshi’ku. Shi ubatonge muswelo kampanda wa mwa kutumina kyabuntu kyobe, dibajinji ipangula bidi ku bilo musambo wa mu yenu ntanda mwanda wa kuyuka miswelo ingidijibwa mu yenu ntanda. Myanda itala bijila bya Leta ne bitanshi byobishintanga kyaba ne kyaba, o mwanda i kya kamweno kukimba kitanshi kya panopano ne bengidi bayampe ba leta kumeso kwa kutonga muswelo wa kutuma kyabuntu.

Mukanda wa Kwikinga ku ma Akishida (Assirance) ne wa Pasho: Muntu ubwanya kulembeja dijina dya kiyukeno kya leta kingidijanga Batumoni ba Yehova mwanda wa batambule lupeto lwandi lwa mukanda wa kwikinga ku ma akishida nansha lwa pasho.

Kufungula Konte ya Banki: Muntu ubwanya kufungula konte ya banki na kuleta dijina dya kiyukeno kya leta kingidijanga Batumoni ba Yehova mwanda wa bakasele lupeto shi aye wafu na kulonda bijila bya banki ya mu ntanda yadi’mo.

Njibo ne Mikanda: Ubwanya kwibileta bu kyabuntu mu dijina dya kiyukeno kya leta kingidijanga Batumoni ba Yehova nansha na kulemba mukanda wa kwiivwanika bebisele shi ubafu.

Lubanza: Muntu ubwanya kwilutūla bu kyabuntu mu dijina dya kiyukeno kya leta kingidijanga Batumoni ba Yehova. Shi muntu’wa ukishikete’po, ubwanya kwendelela na kushikata’po kufika enka ne byakafwa.

Mukanda wa Bupyani (Testament): Muntu ubwanya kuleta bintu nansha lupeto mu dijina dya kiyukeno kya leta kingidijanga Batumoni ba Yehova na kulemba uno mukanda wa bupyani mungya bijila bya leta, ne kulombola patōka’mba bo abo bafwaninwe kukapebwa bintu’bya. Ino mpangiko ibwanya kulengeja muntu afute lupeto lutyetye lwa bitanshi.

Monka mulombwela’kyo kishima “byabuntu biteakanibwe kala,” bino byabuntu bilomba muntu upāna’byo eteakanye. Kupityila ku ino miswelo ya byabuntu biteakanibwe kala, bantu bavule bakwatakanyanga mutōtelo wetu ne mingilo yetu ya kukwasha bantu ingilwa ntanda yonso, kadi leta wibatyepejejanga’ko mfutwa ya lupeto lwa bitanshi.

Shi usaka kuyukila’ko myanda mikwabo, toneka pa “Leta Kyabuntu ku Mwingilo Wetu wa Ntanda Yonso” pa jw.org kunshi kwa paje ye-yense, nansha kwipangula bilo ya musambo.