Yehova Weselanga Bininge Mutyima wa Kwipāna

MUPANGI wetu i mupe bantu kyabuntu kilēme mpata kya bwanapabo. Kadi weselanga bininge boba bengidija bwanapabo bwabo kwampikwa kwisakila mwanda wa kwendeleja butōtyi bwa bine kumeso ne kulonga bukomo bwa kutumbija dijina dyandi dijila ne kukwatakanya mpango yandi mikatampe. Yehova kasakangapo kikōkeji kya buzazangi kitononwa na moyo nansha na kuningilwa. Ino usangelanga bininge kwipāna kwa na mutyima tō kutononwa na buswe bwa binebine ne na mutyima wa kufwija’ko.

Kimfwa, kitatyi kyādi bene Isalela mu ntanda mutuputupu ya Shinai, Yehova wēbalombwele bobake kifuko kya kutōtela’po. Wānene amba: “Yatai ko mudi mulambu wa kudi Yehova; ense udi ne mutyima uswele, alete’o mulambu wa Yehova.” (Div. 35:5) Mwine Isalela ense wādi wa kuleta kintu kyonso kyaādi ubwanya kuleta, kadi kyabuntu kyonso kya kwisakila—kikale kityetye nansha kikatampe—kyadi kya kwingidijibwa mu muswelo mwendele’mo mwanda wa kufikidija mpango ya Leza. Le bantu balongele’po namani?

“Ense mutununwe ku mutyima” ne “ense muswejibwe ku mushipiditu wandi” waleta kyabuntu kya kwisakila, ‘ense wa mutyima uswele.’ Bana-balume ne bana-bakaji baleta na mutyima tō kintu kampanda ku mwingilo wa Yehova: tuzaza twa nsahabu, ne nzenze ya ku matwi, ne tuningamunwe twa kiyukeno, ne nsahabu, ndalama, mukuba, mwino ufituluka, ne utyiluluka, ne utyididila pyā, ne bukonge bunekenenena, ne moya a bambuji, ne mikupo ya mikōko milume myabike mu mwino utyila, ne biseba bya tumpunzu, mutyi wa akashia, mabwe a bulēme, bisombelwa ne māni. Na bubine, “bintu byo badi nabyo byadi bibwanine bya mingilo yonsololo [ya kwingilwa], kwasubuka ne byakusubuka kadi.”—Div. 35:21-24, 27-29; 36:7.

Byāletēle Yehova nsangaji ke bintupo byāpēnwe, ino i mutyima wa kwipāna wa boba bākwatakenye mutōtelo utōka. Kadi bātonwenwe kupāna ne kitatyi kyabo ne bukomo bwabo bwine. Nsekununi inena’mba, “bāna-bakaji bonso badi ne mutyima wa bwino, baluka byakuluka na maboko abo.” Kabidi “bana-bakaji bonso batununwa ku mutyima mu manwa, baluka moya a bambuji.” Kadi Yehova wāpele Bezalela “ñeni, kwivwanija, kuyukidila mu miswelo yonso ya busendwe.” Na bubine, Leza wāyujije ba Bezalela ne Ohodiaba bwino bobādi basakilwa mwanda wa kwingila mwingilo wēbapelwe.—Div. 35:25, 26, 30-35.

Pānene Yehova bene Isalela bapāne kyabuntu, wādi ukulupile na bubine amba ‘ense wa mutyima uswele’ usa kukwatakanya butōtyi bwa bine. Kupwa wāesela na buntu mutyima wa kwipāna na kwibaludika ne kwibayuja nsangaji. Pa kino, Yehova wālombwele amba kitatyi kyaesela mutyima wa kwipāna wa bengidi bandi, ukulupilanga amba kekukabulwepo kintu nansha bwino pa kufikidija kiswa-mutyima kyandi. (Ñim. 34:9) Poingidila Yehova pampikwa kwisakila, nandi ukesela binebine mutyima obe wa kwipāna.

MUSWELO UTŪLANGA BANTU BAMO BYABUNTU BYA MWINGILO WA NTANDA YONSO

Pamo’nka na mu mafuku a mutumibwa Polo, bantu bavule dyalelo ‘baleanga’ko kantu kampanda,’ nansha misokwe, buvule bwa lupeto ne kwilutūla mu kasanduku ka byabuntu ka pa kipwilo kalembelwe’po amba “Mwingilo Wingilwa Ntanda Yonso.” (1 Kod. 16:2) Kweji ne kweji, bipwilo bitumanga bino byabuntu ku bilo ya Batumoni ba Yehova ya mu yabo ntanda. Nobe ubwanya kutumininina byabuntu byobe ku “Association Sans But Lucratif ‘Les Témoins de Jéhovah,’” 75, 13e Rue, Industriel, Limete-Kinshasa, République Démocratique du Congo. Pa kuyuka dijina dya kiyukeno kya leta kingidijanga Batumoni ba Yehova mu yenu ntanda, ipangula ku bilo ya musambo ya mu yenu ntanda. Ubwanya kutana adelese ya bilo ya musambo pa www.jw.org. Miswelo ya byabuntu byobwanya kutumininina i ino:

MISWELO MIKWABO YA KUPĀNA BYABUNTU

Byabuntu bibwanya kutūlwa bukidibukidi kupityila ku tulata twa ku banki. Mu misambo imo ubwanya kutūla byabuntu kupityila ku jw.org nansha ku Diteba dikwabo ditongelwe.
Shi ukimba kuyukila’ko myanda mikwabo, lembela “Association ‘Les Témoins de Jéhovah’” ku adelese idi kūlu nansha kwita ku ano manimelo: 0998189791 nansha 0815551000.

BYABUNTU BYA KWAPWIJA BULONGOLODI

Muntu ubwanya kwapwija “Association ‘Les Témoins de Jéhovah’” lupeto mwanda wa mwingilo wa busapudi wingilwa ntanda yonso. Inoko, shi walombe lupeto lwandi, bakamujokeleja’lo.
Muntu ubwanya ne kuleta mukanda na kiyukeno kya Leta kingidijanga Batumoni ba Yehova

BYABUNTU BITEAKANIBWE KALA

Kutentekela pa byabuntu bya lupeto, muntu ubwanya kuleta byabuntu bya muswelo mukwabo mwanda wa mwingilo wa Bulopwe wingilwa ntanda yonso wendelele kumeso. Kimfwa:

Mukanda wa Kwikinga ku ma Akishida (Assurance): Muntu ubwanya kulembeja dijina dya “Association ‘Les Témoins de Jéhovah’” mwanda wa atambule lupeto lwandi lwa mukanda wa kwikinga ku ma akishida nansha lwa pasho shi wafu.

Kufungula Konte ya Banki: Muntu ubwanya kufungula konte ya banki, kuleta mukanda wa kutweja lupeto ku banki (certificat de dépôt), nansha kufungula konte ya banki na lupeto lwandi lwa pasho mu dijina dya “Association ‘Les Témoins de Jéhovah,’” nansha kuleta dijina dya “Association ‘Les Témoins de Jéhovah’” amba ikasele lupeto shi aye wafu na kulonda bijila bya banki ya mu ntanda yadi’mo.

Njibo nansha lubanza: Ubwanya kwibileta bu kyabuntu. Ubwanya kwendelela na kushikata’mo kufika ne byokafwa. Kumeso kwa kutūla byabuntu pamo bwa bino, ufwaninwe kuyukija bilo ya mu yenu ntanda.

Kutūla Lupeto ku Banki Imwenwa’mo: Muntu ubwanya kutūla lupeto ku banki nansha kuleta mukanda na kiyukeno kya Leta kingidijanga Batumoni ba Yehova. Kupwa, muntu’wa nansha muntu mukwabo wakatonga aye mwine ukashilula kusela lupeto lumwenwa’mo lwa ku mwaka ne mwaka. Pa kino, Leta ukatūkidija uno muntu lupoto lwa bitanshi lwafwaninwe kufuta mu mwaka watūdile kino kyabuntu.

Mukanda wa Bupyani (Testament): Muntu ubwanya kupa “Association ‘Les Témoins de Jéhovah’” bintu nansha lupeto. Kumeso kwa kulemba uno mukanda wa bupyani, muntu ufwaninwe kuyukija bilo ya musambo mwanda wa ayuke myanda mivule ne buludiki bwa “Association ‘Les Témoins de Jéhovah.’” Ino mpangiko ibwanya kulengeja muntu afute lupeto lutyetye lwa bitanshi.

Monka mulombwela’kyo kishima “byabuntu biteakanibwe kala,” bino byabuntu bilomba muntu upāna’byo eteakanye.

Shi usaka kuyuka myanda mikwabo, ubwanya kwita nansha kulembela “Association ‘Les Témoins de Jéhovah’” ku adelese idi kunshi, nansha kwenda ku bilo ya Batumoni ba mu kyenu kibundi.