MUTWE WA MWANDA WA PA KIBULU | LELO BULOPWE BWA LEZA—BUBWANYA KUSHINTULULA BIKA KODI?

BULOPWE BWA LEZA Bukashintulula Bika Kodi?

Padi ubaivwanijanga mu bishinte bibadikile amba, Bulopwe bwa Leza bushintulula bivule ku Batumoni ba Yehova. Kadi padi ubateñwanga na madyese akaleta Bulopwe bwa Leza mu mafuku a kumeso esambilwe’mo. Mu kitatyi kimo kyonka, ubwanya kwiipangula shi ino milao ikafikidila.

I biyampe wikale mudyumuke pa kyaba kya kwitabija kintu kyo-kyonso kyoivwana. (Nkindi 14:15) Mu miswelo imo, budyumuku bobe bubwanya kudingakanibwa pamo na bwa bene Belea ba pa kala.a Kitatyi kyobēbalombwele dibajinji myanda miyampe ya Bulopwe, bene Belea bāitabije byobāivwene, ino ke pa mwandapo’tu wa kusaka kobādi basaka ikale ya bine. Ino, bābandawile Bisonekwa senene “mwa kuyukila shi bino bintu ye mobikadile.” (Bilongwa 17:11) Mu muneneno mukwabo, bene Belea bādingakenye myanda miyampe yobāivwene na binena Bisonekwa. Mu kine kitatyi’kya, bāitabije’mba myanda miyampe yādi imanine bininge pa Kinenwa kya Leza.

Batumoni ba Yehova bakwita na kyanga ulonge uno muswelo. Kupityila ku mpangiko yetu ya kwifunda Bible ku bitupu, tubakupe mukenga wa kudingakanya byobya bikulupile Batumoni ba Yehova pa Bulopwe bwa Leza na byobya bifundija Bible.

Kutentekela pa kwifunda myanda ya Bulopwe bwa Leza, kwifunda kowifunda Bible kubwanya kukukwasha utane malondololo ku bipangujo bimo bikatampe bya mu būmi.

Lelo twātambile kwepi?
Lelo būmi budi na kitungo’ka?
Mwanda waka Leza ulekele’ko masusu?
Lelo i bika bitufikilanga potufwanga?
Lelo ntanda ikonakanibwa?
Le i bika biletanga nsangaji mu kisaka?

Nakampata kwifunda Bible kukakukwasha ‘ufwene kudi Leza.’ (Yakoba 4:8) Shi ubafwena kudi Leza, ukamona mukokejeja Bulopwe bwa Leza kushintulula bintu biyampe kodi—ke enkapo pano, ino nyeke ne nyeke. Yesu aye mwine wālombele kudi Shandi amba: “Buno’bu bo būmi bwa nyeke, bekale kukuyuka abe, Leza umo kete wa bine, ne yewa owatumine, Yesu Kidishitu.”—Yoano 17:3.

Batumoni ba Yehova babwanya kwingidija dino dipepala mwanda wa kwifunda nobe Bible.

Shi usaka kulomba baye bakufundije Bible ku bitupu, lombola Kamoni wa Yehova ye-yense nansha kudinga kakanda kadi pa www.pr418.com. (Tala LOMBA KIFUNDWA KYA BIBLE pa paje wa ñanjilo)

a Belea kyādi kibundi kya mu Masedonya wa kala.

Mushintulwila Bulopwe bwa Leza Kwadi

Panopano ponka, banene mwana-mukaji wa myaka dikumi witwa bu Folake kulembela abo masomo pa mutwe wa mwanda unena amba: “Bintu Byonsenswe Bininge mu ino Ntanda.” Folake watongele kulemba kine kyasanshilwe kusapwila bakwabo myanda ya Bulopwe bwa Leza.

Folake washintulwile amba, “Bulopwe bwa Leza i umbikalo udi’ko bine. Inoko kebumwekangapo, ko kunena’mba kubwanyapo kwibumona—nansha shi uvwele makalashi!”

Folake waendelela kulemba myanda itala madyese akaleta Bulopwe atengele bininge. Pa kutela makambakano amo akapwija Bulopwe, walembele amba, “Ngivwananga bulanda kitatyi nkyomonanga bantu bakubulwa mobo bashikete mu mashinda,” ne “bana bafwa nzala mu bipindi bishileshile bya ntanda.” Ubweja’ko amba, “Ngivwananga kadi nsangaji kitatyi kyontanga Isaya 65:21.” Kino kisonekwa kilaya pangala pa bantu bakaludikwa na Bulopwe bwa Leza amba: “Bakōbaka mobo ne kwikala monka; kadi bakadima madimi a mañanza ne kudya bipa byayo.”

Folake wanene amba utengele ne kitatyi kikatalula’ko Leza misongo yonso kupityila ku Bulopwe bwandi. Mu bilembwa byandi, wapitulukile mu kisonekwa kya Kusokwelwa 21:4, kine kinena’mba Leza “ukapampulanga impolo yonso ku meso abo, ne lufu kelukekala’kopo dikwabo, nansha madilo nansha miyoa nansha misanshi mine keikekala’kopo monka.” Wafudije na kupituluka mu binenwa bitala padi Yehova ne Bulopwe bwandi amba, ye byasenswe bininge mu ino ntanda. Na bubine, Bulopwe bwa Leza budi pa kifuko kya pa bula mu mutyima wa uno nkasampe mwana-mukaji!