Mbwanya Kushilula Namani?

Le i manwa’ka akakukwasha usangele butangi bobe bwa Bible ne kumwena’mo bininge? Tala ano manwa atano akweshe bavule.

Kimba kifuko kiyampe. Kimba pantu padi talala. Fundula byonso bibwanya kukulabika amba ute mutyima ku byotanga. Kitōkeji ne kaluvula kayampe bikakukwasha umwene bininge mu butangi bobe.

Ikala na mumweno muyampe. Bible byatambile kudi Tata wetu wa mūlu, ukamwena’mo ne pa mfulo shi wikale bwa mwana usaka kufundijibwa na mbutwile wandi wa buswe. Shi udi na milangwe mibi ne mfwatakani pa Bible, talula ino milangwe mu ñeni amba Leza akufundije.​—Ñimbo ya Mitōto 25:4.

Lombela kumeso kwa kutanga. Mu Bible mudi milangwe ya Leza, nanshi ke kya kutulumukapo shi tusakilwa bukwashi bwandi pa kumwivwana. Leza i mulaye kupāna “mushipiditu ujila ku boba bamulomba.” (Luka 11:13) Uno mushipiditu ujila ubwanya kukukwasha wivwanije milangwe ya Leza. Ukakuputula bityebitye ñeni ya kwivwanija “bintu bya mushike bya Leza.”​—1 Kodinda 2:10.

Tanga amba wivwanije. Kokatanga mwanda’tu wa kupwa byotanga. Langulukila na mushike pa byobya byotanga. Wiipangule kimfwa bino bipangujo: ‘I ngikadila’ka yonamona mu uno muntu wisambīlwe’po mu byontanga? I muswelo’ka ombwanya kwibingidija mu būmi bwami?’

Witungile bitungo bipotoloke. Pa kumwena mu butangi bobe bwa Bible, kimba bintu bibwanya kushinta būmi bobe. Ubwanya kwitungila bino bitungo: ‘Nsaka kuyuka bivule padi Leza.’ ‘Nsaka kwikala muntu, mulume, nansha mukaji muyampe.’ Kupwa tonga mikanda ya mu Bible ikakukwasha ufikile pa bino bitungo.a

Ano manwa atano akakukwasha ushilule. Ino ukalengeja namani butangi bobe bwa Bible bwikale busangaja mpata? Kishinte kilonda’ko kileta’po milangwe.