Tumwenei Mu Masomo A Mwingilo Wa Teokratike Mu Mwaka Wa 1996—Kipindi 2
1 Pakupwa kushintulwa kwa Masomo a Mwingilo wa Teokratike mu mwaka wa 1943, musambo umo wa Sosiete wēsambile’mba: “Ino mpangiko milumbuluke i mikwashe batutu bavule, bādi balanga’mba kebakabwanya’po kwisamba kumeso a bantu bavule, pano mu kitatyi kityetye, ke baneni balumbuluke ne basapudi babwino bukatampe.” Masomo akyendelela kupāna bufundiji buninge botusakilwa batwe bonso.
2 Butangi bwa Bible: Ke enkapo boba bapāna kishinte bamwenanga kamweno mu masomo. Na bubine, batwe bonso tutambulanga mwisambo: butangi bwa Bible bwa ku yenga ne yenga. Mpangiko ya masomo ilombolanga mashapita otufwaninwe kutanga ku yenga ne yenga. Mu Bisonekwa mudi misoñanya isambila pa mvubu ya kutanga Bible difuku ne difuku. (Yos. 1:8; Mit. 1:2; Bil. 17:11) Buno butangi i bwa mvubu mwanda wa kwikala bakomo kumushipiditu; budishanga mushipiditu ne mutyima wetu. Na kutanga Bible nansha minite itano ku difuku, tukokeja kulonda mpangiko ya ku yenga ne yenga. Kumfulo kwa mwaka, tukatanga kubwipi kwa mashapita 150 ne kupita a Kinenwa kya Leza. Shi twilamije Bible konso kotwenda, bine kikekala kipela kwimutanga kipindi kimo difuku ne difuku.
3 Kishinte kya Bufundiji: Mwanda wa kusombela batutu ne bakaka bengidile Yehova na kikokeji ne bupyasakane, muneni upityija kishinte kya bufundiji ufwaninwe kwikala mufundiji mulumbuluke, ufwaninwe kulombola buluji bwa myanda ibandaulwa ne kutonona boba bamuteleja mutyima mwanda wa batamije kufwijako Leza, kutala pa Kinenwa kyandi ne pa bulongolodi bwandi. Bakulumpe ne bengidi ba mingilo bakekibwanya kupityila ku kwiteakanya kulumbuluke, na kupityija madiskure kukwatañana na kishinte kibapelwe, ne na kunena na kikulupiji kyonso ne na muneneno wa kyanga. (Bah. 4:12) I kyamvubu mwisambi alēmeke kitatyi kimupelwe. Mu dibuku “Kila Andiko” mudi mikanda mivule isangaja ne isambila pa Bisonekwa bikunka ku mutyima, byotukokeja kumwenamo kamweno ka kumushipiditu. Dibuku Prédicateurs dilombolanga mānga ya bulongolodi bumweka bwa Yehova kadi dīsambilanga pa myanda yāfikile bantu bādiko bine balombwele bukamoni bwa lwitabijo lwabo, bupyasakane, kwipāna ne buswe bwabo. Bine tudi na bivule bya kwifunda bitala pa mānga ya bulongolodi bwa kiteokratike ne muswelo wesela Yehova bantu bandi mu kino kyetu kitatyi kyotudimo.
4 Myanda Mikatampe ya mu Butangi bwa Bible: Bana betu batambula uno mwisambo bafwaninwe kutonga mavese mapotoloke, obakokeja kwingidija bifwaninwe mwanda wa kukwasha kipwilo. I kyamvubu nanshi batange mashapita atelelwe, balanguluke’po ne bakimbe nshintulwilo itala pa ano mavese matongwe mwanda wa kutana nshintulwilo ikalombola bipotōloke buluji bwa’o. Kumfulo kwa Index des publications de la Société Watch Tower, kutanwa “Index biblique,” ukokeja kwikala na mvubu mikatampe kitatyi kyotukimba nshintulwilo itala pa vese umo wapabula. Batutu bapāna kino kishinte bafwaninwe kulombola butyibi buyampe ne kwepuka kwisambila pa myanda ya kubulwa kukwatañana na myanda yobabandaula. Kebafwaninwepo kuteakanya nshintulwilo mivule yokebakokejapo kubwanya kushintulula yonso mu minite isamba.
5 Umo ne umo umbukata mwetu ukokeja kumwena byabuyabuya mu Masomo a Mwingilo wa Teokratike. Bine akokeja kwitukwasha ku kuleulula bwino bwetu bwa buneni ne bwa bufundiji. Nanshi kumwena nakampata mu ino mpango kuketukwasha mwanda wa ‘kwendelela kwetu kumweke ku bantu bonso.’—1 Tem. 4:15.