Twibakwashei Bashilule Kwingila Monka
1 Pāikele kujingulula’mba kyaka kikatampe kyādi kitengele balunda nandi bakristu, mutumibwa Polo wāsonekele’mba: “Kino i kitatyi kya kulanguka mu tulo. Mwanda [pano] lupandilo lubafwena pabwipi netu, kutabuka popa po twaitabije.” (Loma 13:11, MB) Polo wādi uzumbija mutyima pamwanda wa bana babo bādi kebapungile kumushipiditu; wādi usaka kwibakankamika bekale monka bapyasakane mu mingilo.
2 Nabubine, tukokeja kunena’mba bufuku bwa ino ntanda ke bukomo bininge, ne misanya ya ntanda impya keisake kutamba. (Loma 13:12) Pa kino, tudi na buluji bulumbuluke bwakutompola pa mwanda utala banabetu kebaleke kutambila netu pamo mu busapudi bwa myanda miyampe. Mwaka wapityile’u, enka mu Amerika kete, kubwipi kwa basapudi 27000 ne kupita bāalwile monka kusapula. Lelo i muswelo’ka otukokeja kukwasha bakristu bakwabo ke bapungile bashilule kwingidila Yehova monka?
3 Kikokeja Kulonga Bakulumpe: Bakristu bavule bapungile kebalekelepo bubinebine; ibemike bitupu kusapula pamwanda wa kuzozeja mutyima, makambakano a kikasuku, byabupeta, nansha kuzumbija-zumbija mutyima umbūmi. (Luka 21:34-36) Shi kibwanika, i kilumbuluke nakampata kukwasha basapudi kumeso kwa kebaikele kupungila. Shi musapudi ashilule kutwala lapolo wandi wa mingilo na kutabuka mweji umo umo, mulembi wa pa kipwilo ukalombola bukidibukidi mwendeji wa kifundwa kyandi kya kitabu. Mpangiko ikateakanibwa mwanda wa akapempulwe na bakulumpe ne akakankamikwe. Bakulumpe bafwaninwe kujingulula kintu kikatampe kine kine kitala pa uno mwanda ne bukwashi bobakokeja kupāna.—Tala Kiteba kya Mulami kya 15 kweji 9, 1993 paje 20-23, Falanse.
4 Muswelo Otukokeja Kupāna Bukwashi Bwetu: Bavule umbukata mwetu ibayuke muntu kampanda yewa kakisapulangapo. Pakwabo ukokeja kwikala muntu otwadi tupwene nandi pakatampe kala. Lelo i kika kyotukalonga mwanda wa kumukwasha? Lelo ketukokejapo kwimana pandi bityetye mwanda wa kumupempula? Mulombole’mba mudi na mēlu a kutambila nandi mu busapudi. Ikala wa nsangaji ne ūbaka. Mulombole’mba utompolanga pa mwanda wandi, pakubulwa’ko kumulombola’mba i mubemvu kumushipiditu. Musekunwine myanda ikankamika nansha bintu bikwabo bilongelwe pa kipwilo. Musapwile na kyanga myanda itala kitango kya distrike “Mikendi ya Ndoe ya Leza.” Mukankamike akatanwe ku kitango kya distrike shi kekyalongelwe. Kitatyi kyakashilula kufika monka ku kitango, pakwabo kikamukwasha pakatampe kupitako bukwashi bo-bonso bukamupebwa. Mulae mwanda wa kwenda nandi ku kupwila. Lombola bakulumpe mwādi walondolwela.
5 Mukristu wādi kemupungile kitatyi kyajoka monka mwanda wa kubungakana, padi kakeivwanapo senene pakamona boba baadi uyukile kala. Kemumwipangulai’mba: “Lelo wādi kwepi?” Ino, mukwashei emone bu imutundailwe biyampe. Mutwejei mu misambo yenu. Mulombolei boba bakayukile. Shikata nandi pamo pa kupwila ne jingulula shi udi na dibuku dya ñimbo ne mikanda ifundwa. Mukankamike ajoke monka ne mulombole’mba ukamukwasha shi kudi kisakibwa.
6 Byobadi na kisanso kya mushike ku boba bajimina, Yehova ne Yesu basangalanga bininge kitatyi kyobamona bantu badi namino kwikala monka bakomo kumushipiditu. (Mal. 3:7; Mat. 18:12-14) Tukekala na nsangaji imo yonka shi tukwashe bakristu bashilule monka kwingidila Yehova.