Malondololo Ku Bipangujo Byenu

◼ Lelo i kyendele’mo kwifunda monka Bible na tutu nansha kaka mukōkekōke shi mwanetu umo wa mu Komite wa Mingilo wa pa kipwilo waleta lupusa lwa kwifunda nandi?

Bakulumpe badi na kiselwa kya kukumba bantu ba pa kipwilo bonso, ne bakōkekōke bene kumo. Bebapempulanga, balanguluka pa bukwashi busakilwa muntu ne muntu. Dimodimo i biyampe kunena mwanetu mukōkekōke endejibwe kifundwa kya Bible. Dibuku Tumefanywa Tengenezo Tutimize Huduma Yetu dilombola pa paje 103 amba, komite wa mingilo wa pa kipwilo ye utyiba mbila amba kampanda usakilwa buno bukwashi.

Mutadi wa mingilo ye ukatala i mwanetu’ka ufwaninwe kuleta buno bukwashi, i myanda’ka ikabandaulwa ne i dibuku’ka difwaninwe kwifundwa. Kepabulwe padi mwanetu wāfundije musapudi wakōka’u nansha mwanetu mukwabo wayukile ne waswele ye ukafwaninwa kumukwasha. Kifwa, mukokeja kunena kaka wabwino, mupye, akakwashe kaka mukōkekōke. Ino divule, ke biyampepo musapudi mukwabo akatwale mwanetu wendeja kifundwa. Shi mubayukija mwanetu wa kukendeja kifundwa, nabya ukabala kitatyi kyapityija, kujokelamo kupya ne kifundwa.​—⁠Tala Mwingilo Wetu wa Bulopwe wa Kweji 3, 1987, paje 3, Falanse.

Ino yukai amba mwifundi i muntu mubatyijibwe, kekidipo na mvubu kulepeja kifundwa mu bula bwa kitatyi kilampe. Kitungo kine i kukwasha mwanetu mukōkekōke ashilule monka kupwila, ekale musapudi usapula myanda miyampe kitatyi ne kitatyi. Mutadi wa mingilo ukabandaula kwendelela kwa bifundwa bya uno muswelo. Buno bukwashi bwa buswe bufwaninwe kutonona bano batutu ne bakaka bavuije biselwa bibapele Yehova, “[ba]shimatyijibwe bwa miji, ne kuningishibwa” nkēe mu bubinebine.​—⁠Ef. 3:17; Ngat. 6:⁠5.