Kokelwa Boba Kebakingilanga
1. Mwanda waka tusaka kukankamika boba kebakingilanga?
1 Lelo uyukile’ko muntu umo kakingilanga? Padi ke muleke kwilunga na kipwilo ne kusasukila kungi. Ubwanya kwitana na bantu ba uno muswelo mu mwingilo wa ku njibo ne njibo. Tufwaninwe kuyuka amba bano bantu bakidi banabetu ku mushipiditu. O mwanda tusaka kwibakulupija’mba tukibaswele kadi tukimbanga kwibakwasha bajokele ku kipwilo ne “kudi Mukumbi, Mukulumpe wa kilelo” kya myuya yetu.—1 Pet. 2:25.
2. I muswelo’ka otukokeja kukankamika yewa kakingilanga?
2 Wibate Mutyima: Kwita ku telefone nansha kupempula muntu kakingilanga kukamupa kikulupiji amba ketumwidilwepo. Le tukanena nandi bika? Padi tukamukankamika na kumuyukija’tu amba tukulañanga. Mīsambo yenu ifwaninwe kwikala miyampe ne yūbaka. (Fid. 4:8) Tukokeja kutela mwanda wetusangeje ku kupwila kwa panopano. Pakwabo twamwita nandi āye ku kupwila nansha ku kubungakana kwiya’ko ne kumulombola amba tukamulamina kyaba nansha kumufutyila dishinda.
3. I muswelo’ka washilwile kaka umo kwingila monka?
3 Kaka umo obatene mu mwaba kampanda wadi kakingilanga mu bula bwa myaka 20 ne musubu. Uno kaka nansha byaadi upela kwitabija kifundwa kya Bible, ino kaka wamutene’wa wajokēle kwadi wamushila mapepala a panopano. Kitango kya distrike pa kupwa, uno musapudi wakasapwila uno kaka kakingilanga myanda mikatampe ya ku kitango, ponka’po kaka’wa washilula kwingila monka.
4. Lelo tukamona namani muntu ushilula monka kupwila netu?
4 Shi Muntu Wajoka: Shi musapudi kakingilanga waiya ku kupwila, le tukamumona muswelo’ka? Biyampe, le Yesu wāmwene namani bandi bana ba bwanga pobāpwile kumunyema kyaba kityetye? Wēbatelele na kyanga kyonso bu “bāna betu,” wēbakulupila ne kwibakulupila. Kadi wēbapele ne mwingilo wa mvubu mpata. (Mat. 28:10, 18, 19) Kinondanonda’tu na penepa, bāshilula kusapula myanda miyampe ne “kuleka’byo kufundija mpika.”—Bil. 5:42.
5. Tela myanda ilomba kwisamba na bakulumpe pangala pa mwanetu kakingilanga.
5 Kumeso kwa kunena mwanetu washilula kwingila monka amba twifunde nandi Bible nansha kumeso kwa kunena mwanetu kakingilanga pano ke myaka mivule akutwale mu busapudi, i biyampe bidi kwipangula bakulumpe bakupe’ko milangwe. Shi ubatana musapudi kakingilanga mu mwaba, i kipite buya kuyukija’mo bakulumpe amba bakamupe bukwashi bwasakilwa.
6. I nsangaji’ka yotukamwena mu kukwasha boba kebakingilanga?
6 Monka mulombwela Bible pampikwa kafinda, enka boba banyema lubilo kufika ne ku mfulo bo bakapanda. (Mat. 24:13) O mwanda kokelwa boba bakukala nansha boba basāsuka mu dishinda. Shi twiula na kitūkijetyima buswe bwa Yehova na kuta bantu ba uno muswelo mutyima, nankyo tukekala na nsangaji ya kwibaluja mu mwingilo ukola otukengila nabo pamo.—Luka 15:4-10.