Malondololo ku Bipangujo Byenu

◼ Shi mwanetu kakisapulangapo mu bula bwa kitatyi kilampe, lelo ukokeja kukwashibwa namani ekale monka musapudi wa myanda miyampe?

Shi mwanetu kakisapulanga welombola amba ukidi na mutyima wa kwingidila Yehova, uno i mwanda uleta nsangaji mpata. (Luka 15:​4-6) Padi uno mwanetu watyumwinwe mutyima na bya kulondwalondwa nansha na bikambija bya umbūmi, pa kūminwa waleka ne kwifunda kifundwa kya kasuku, kutanwa ku kupwila, ne kutambila mu mwingilo wa budimi kwine. I muswelo’ka mulumbuluke obwanya kumukwasha nandi endelele ku mushipiditu?

Umo ne umo umbukata mwetu ufwaninwe kukwata’ko mulangwe wa kumulombola buswe bwetu bwabinebine bwa bwine Kidishitu. Bakulumpe bafwaninwe kwikala na kampeja-bukidi ka kuyukila bisakibwa binebine byasakilwa ku mushipiditu. (Yak. 5:​14, 15) Shi walekele’byo kusapula mu bula bwa kitatyi kityetye kete, bakamukwasha nansha kudi musapudi wa bwino umo kete mwanda wa ashilule kutambila monka mu mwingilo wa busapudi. Ino shi mwanetu kakisapulanga’wa ke muleke kukongakena pamo na kipwilo mu bula bwa kitatyi kilampe, nankyo kudi bukwashi buvule bwafwaninwe kupebwa. I biyampe kushilula nandi kifundwa kya Bible mu dibuku kampanda mwanda wa kūbaka lwitabijo lwandi ne kumukwasha anze kukwata bintu na mutyika. Mu uno muswelo mutadi wa mingilo ukanena musapudi wa bwino endeje kino kifundwa. (Bah. 5:​12-14; tala Malondololo ku Bipangujo Byenu mu Mwingilo Wetu wa Bulopwe wa Kweji 11, 1998.) Shi uyukile mwanetu usakilwa buno bukwashi, nankyo lombola mutadi wa mingilo wa pa kyenu kipwilo.

Kumeso kwa kwita mwanetu ulekele kusapula mu bula bwa kitatyi kilampe amba atambile mu mwingilo dikwabo, i kiyampe bakulumpe babidi betane bidi nandi, bamubandaule shi ukibwenye bisakibwa bya kwikala musapudi wa Bulopwe. Bakalonda mulongelwanga shi kebabandaula mwanetu ukimba kwikala musapudi mupya wa myanda miyampe. (Tala Kiteba kya Mulami kya mafuku 15 Kweji 11, 1988, paje 17, Falanse.) Mwanetu wadi kakisapulanga nandi ufwaninwe kwikala muntu wabila mpata kusapwila bakwabo myanda miyampe. Kadi ufwaninwe kubwanya bisakibwa bikatampe bitelelwe pa paje 98-99 mu dibuku Notre Ministère, kadi ufwaninwe kutanwa nyeke ku kupwila.

Kwikala na bibidiji biyampe mu bintu bya ku mushipiditu kukakwasha mpata mwanetu wajoka nandi amone kuningisha ne kulama kipwano kilēme kyapwene na Yehova ne kunangila nyeke mu dishinda ditwala ku būmi bwa nyeke. (Mat. 7:14; Bah. 10:​23-25) Bukomo bwandi bwalonga na ‘mutyima wa kupyasakana’ ne kutamija kwatamija ngikadilo ya bwine Kidishitu ya kulādila nyeke, bikamulama aleke kwikala monka ‘muntu kengila, nansha wakubulwa kulupula bipa’ mu mwingilo waingila bu mwanā-bwanga wa Kidishitu.​—⁠2 Pet. 1:​5-8.