Tusapulei Bulopwe

¹ Twi bakankamikwe mu Bahebelu 10:23 amba ‘tuminine ne kinyinga ku lukulupilo lwetu lotusapula’ lwimanine pa Bulopwe bwa Leza. Yesu wāsoñenye patōka’mba myanda miyampe ya Bulopwe ikasapulwa mu mizo yonso. (Mako 13:10) Tufwaninwe kulama kino mu ñeni kitatyi kyotwingila mwingilo wa busapudi.

² Shi tubetana na bantu, tufwaninwe kushilula mīsambo na myanda ibasangaja nansha ibatala. Pavule, tunenanga myanda yobapotolwele kala, pamo bwa buñonaona mu kibundi, makambakano atala bansongwanzele, milangwe ya mwa kumwena bisakibwa byetu nansha ya kukoma kwa misokwe. Bantu bavule byobatele mityima yabo ku “byakūmininwa bya buno būmi,” betusekunwinanga bikalanga bibakambakanya shi tubelombola bu twibatele mutyima ne kwibemvwana. (Luka 21:34) Kino kikokeja kwitupa muswelo wa kwibalombola lukulupilo lwetu.

³ Inoko shi ketutadije’po, mīsambo yetu ikemanina’nka pa milangwe ya bibi bilongeka, twakomenwa ne kitungo kyotwadi twīdile: Kusapula musapu wa Bulopwe. Nansha byotukankamika bantu pa ngikadilo ya bulanda ileta makambakano mavule, kitungo kyetu i kukokela milangwe yabo pa Bulopwe, lukulupilo lumo kete ku muzo wa muntu. Pakubulwa ne kutatana kwine, tudi na lukulupilo lwa kutendelwa, lufwaninwe kuyuka bantu bonso. Nansha shi tubashilula na kutela tuyukeno tumo-tumo twa ‘bitatyi bibi, bikoma ne mwa kushikatyila,’ tufwaninwe kukokela bukidi-bukidi mīsambo yetu ku musapu wetu, ke “myanda miyampe ya nyeke” kadi. Shi tulonge namino, nankyo tukavuija senene mwingilo wetu.​—⁠2 Tem. 3:1; 4:5; Kus. 14:⁠6.