‘Tūbakei Njibo Yetu’
1 Kepadipo kya kutatana, konso konso, būmi bwa kisaka pano bwenda boneka. Ntanda ibikelwe na Satana isepelelanga bibi ne byamunyanji. (1 Yoa. 5:19) Kino kilombola amba, pano po pene potufwaninwe ‘kūbaka njibo yetu,’ ne kufundija bantu netu muswelo obakokeja nabo kūbaka yabo.—Nk. 24:3, 27.
2 Misoñanya ya mu Bible i Bulami: Kwingidija misoñanya ya mu Bible lo lufungulo lwa būmi bwa nsangaji yabinebine mu kisaka. Bubinebine bwa bukomo butanwa mu Bible i bwakamweno ku umo ne umo wa mu njibo mu myanda yonso ya umbūmi. Wivwane kisaka kingidijanga buno bubinebine, nankyo kidi na būmi bwansangaji, ne kadi kiloelelwanga na ndoe ya Leza.—Tala Isaya 32:17, 18.
3 Misoñanya itupa muswelo wa kūbaka njibo yetu i milombolwe patōka mu dibuku dipya Le secret du bonheur familial. Shapita ne shapita udi na kapango ku mfulo, kalupwila patōka misoñanya ifwaninwe kuvulukwa na boba bonso badi mu kisaka. Tupango tuvule tushilula na kipangujo amba “Ino misoñanya ya mu Bible ikokeja kukwasha namani . . . ?” Kino kitukokela ku kuta mutyima ku milangwe ya Leza, ne kadi kitukoma mu ñeni yetu mumweno wandi pa mwanda kampanda wisambilwa’po.—Is. 48:17.
4 Twiibidijei na dino dibuku. Twifundei kusokola misoñanya ikokeja kwitukwasha kitatyi kilupuka bikambija. Dino dibuku i disambile pa myanda mivule, kimfwa: kyokya kifwaninwe kukimbwa ku muntu osaka ekale mwine-pobe (shapita 2), kyalwilo kya busongi bwakulādila kadi bwansangaji (shapita 3), kyokya kikokeja kulonga bambutwile mwanda wa babo bana bansongwanzele bakekale batame bayukile kwitabija biselwa, bakaminwe Leza (shapita 6), muswelo wa kukinga kisaka ku lupusa lwa kyonakani (shapita 8), misoñanya ya kukwasha bisaka bilelwa na mbutwile umo bikale kutubuluka (shapita 9), bukwashi bwa kumushipiditu ku bisaka bikamba na butondwe ne na bukalabale (shapita 12), mwa kulongela shi bijimba bya busongi kebidi kubwipi na kukutuluka (shapita 13), bintu bifwaninwe kulongela bambutwile ke banunu mwanda wa kwibapa bulēme (shapita 15), ne mwa kuteakenya kyenu kisaka būmi bwakulādila nyeke (shapita 16).
5 Twingidijei Dino Dibuku Dipya mu Myanda Yonso: Lelo kyokemwifundila dino dibuku Bonheur familial mu kyenu kifundwa kya kisaka i kika, shi kemwaikele kwifunda’dyo? Ne kadi, shi kisaka kyenu i kiponene mu bikambija bipya, nansha mu ngikadilo mikomo, nankyo pitulukai mu mashapita a dino dibuku esambila’po, mwikale ne kulanguluka mu milombelo pa muswelo wa kwingidija madingi adi’mo. Pakwabo napo, twikalei na buntu bwa kwibikila’ko kitatyi kya kutambila umbusapudi, ne kwikankila’ko kupāna dibuku Le secret du bonheur familial ku kibalwa kikatampe mpata kya bantu mu kweji wabuná.
6 Bisaka bingidija lulamato lwa kudi Leza bikekala bimanije kumushipiditu, kadi bīkutyile umbumo, bīteakanye kala ku kwepa miketo ya matompo a Satana. (1 Tem. 4:7, 8; 1 Petelo 5:8, 9) Shi kepano, tubafwijako bikatampe Mushiludi wa kisaka witupa bufundiji bwandi!