Tulondei Yesu Kitatyi Kyonso

¹ Yesu wānene mu kitatyi kimo amba: “Shi muntu usaka kunonda, nankyo ēpele aye mwine, atekune [mutyi wandi wa masusu kadi anonde kitatyi kyonso].” (Mat. 16:24) Na bubine, tusakanga kwitaba mu muswelo mulumbuluke ku lwito lwa Yesu. Tutalei bidi nshintulwilo ya kino na kubandaula mwanda umo umo.

² “Ēpele Aye Mwine”: Twēpelele batwe bene popa potwepēne kudi Yehova. Buluji bubajinji bwa kishima kya Kingidiki kyalamwinwe bu ‘kwipela’ i “kwituna.” Kino nanshi kishintulula’mba tubatune ku kusaka kwetu, masakila etu onso, kwabila kwetu ne kuloelelwa kwetu kwa kikasuku, nansha ke byakwisangaja bya kwisakila bine, ino tubasake na kusumininwa kusangaja’nka Yehova nyeke ne nyeke.​—⁠Loma 14:8; 15:⁠3.

³ “Atekune Mutyi Wandi wa Masusu”: Kwikala mukristu i kwikala na būmi bwa kusela mutyi wa masusu, ko kunena’mba kwingidila Yehova na mushipiditu wa kwipāna. Muswelo umo wa kulombola patōka uno mushipiditu wa kwipāna i kuputumina mu mwingilo. Tamba kungalwilo kwa uno mwaka, bavule umbukata mwa basapudi ke bashilule kala mwingilo wa bu pania mukwashi. Shi nobe wi umo umbukata mwabo, ukajingulula na bubine’mba boba bonso bengilanga uno mwingilo beselwanga madyese atabukile kwipāna ko-konso kukokeja kwipāna muntu. Basapudi bakankelwe kukwata uno mwingilo, bekalanga belongolola mwanda wa kusapula bininge. Omwanda bipwilo i bibweje’ko minite mibwane ku nsaa yobashilulanga kupwila kwabo kwa kwenda mu busapudi. Bushipo byokebwiya, basapudi bavule bakamwena mu kino kitatyi kiyampe mukenga wa kusapula. Bakwabo baikele kulupula bipa bilumbuluke, pobasakile’tu kukasapula ‘ku njibo yamfulo’ nansha pobasakile kusapwila’ko ‘minite mikwabo mityetye.’

⁴ Kwitungila bitungo byobe kasuku i muswelo mukwabo wa kulombola mushipiditu wa kwipāna. Bamo bāfikile ne pa kwikala bu bapania balonso, kitatyi kyobetūdile’ko senene mpangiko yabo ne kulemununa mwingidijijo wabo wa kitatyi. Bakwabo bafikile pa kwilongolola ne kwipāna na kwisakila kukengidila ku Betele nansha bu bamishonele. Bakwabo nabo baendele kukashikata mu myaba isakibwa’mo nakampata basapudi ba Bulopwe.

⁵ “Anonde Kitatyi Kyonso”: Nansha bana-babwanga ba Yesu byobātenwe na matompo mavule, bāikele kukankamikwa na bupyasakane ne kūminina kwālombwelwe na Yesu mu mwingilo wandi. (Yoa. 4:34) Bādi bevwana mushipiditu wabo wenda wikala monka umpya kupityila ku kwikala’po kwandi ne ku musapu wandi. Bo buluji bwine bwādi bwikadile boba bādi bamulonda na nsangaji yabinebine. (Mat. 11:29) Ne batwe netu mo monka, twikankamikei batwe bonso mu kuvuija na kūminina uno mwingilo wa mvubu otupelwe wa kusapula Bulopwe ne kulonga bana-babwanga.

⁶ Twitabei nanshi batwe bonso mu muswelo mulumbuluke ku lwito lwa Yesu lwa kumulonda kitatyi kyonso na kutamija mushipiditu wa kwipāna! Namino, tukamona nsangaji mikatampe tamba’nka pano ne tukatengela oa madyese makatampe akāya mu mafuku a kumeso.