Tutangidijei bintu Bya Mvubu Mikatampe Kumeso
1 Lelo i bintu’ka bimobimo bya mvubu bitukwasha mu būmi bwetu bwa kumushipiditu? I bintu bivule, mudi kifundwa kya pa kasuku, kutanwa ku kupwila, kutakamana mu milombelo, kisense kilumbuluke, ne mwingilo wa bwine Kidishitu. Wivwane tuleke kutangidija bino bintu bya mvubu kumeso, būmi bwetu bwa kumushipiditu bukekala bwa kubelabela.
2 Inoko batwe bonso tudi na bulwi botulwa na bilokoloko bya ngitu, omwanda tusakilwa kwikala bedingile. (Ngat. 5:17) Ketwakididikai amba kulondalonda bitungo bya kwisakila kuketuletela byabuyabuya. (Yel. 17:9) Nanshi, pa kusaka tulame mutyima wetu ne kuleka kubombolwa, i biyampe twibandaule bukile bukya.—Nk. 4:23; 2 Kod. 13:5.
3 Twibandaulei Mityima Yetu: Pa kino, tufwaninwe kwibandaula mityima yetu na kwiipangula bino bipangujo na kusumininwa’mba: Lelo ndi na melu a kutanga Kinenwa kya Leza? (1 Pet. 2:2) Lelo ndyukile binebine amba kutanwa ku kupwila konso kwa pa kipwilo kudi na mvubu mikatampe? (Bah. 10:24, 25) Le nakitakamene nyeke mu milombelo? (Loma 12:12) Lelo bantu bonsakanga kwenda nabo kisense i bantu ba kumushipiditu? (Loma 1:11, 12) Lelo ndi mwipāne mu busapudi bwa myanda miyampe? (1 Kod. 9:16) Wivwane tulondolole ku bino bipangujo amba eyo, nankyo tudi na mutyima wa kutangidija bintu bya mvubu mikatampe kumeso.
4 Tubandaulei Mpangiko Yetu ya Difuku ne Difuku: Pa kusaka amba tulonge mungya musakila mityima yetu, tufwaninwe kuyuka i bintu’ka bya mvubu mikatampe bya kutangidija kumeso mu mpangiko yetu. Kushintulula ko kunena amba, witungile’ko kitatyi kya kutanga difuku ne difuku Bible, nimelo yonso ya Kiteba kya Mulami ne ya Amkeni! ne kitatyi kya kuteakanya kupwila. Tufwaninwe ne kushīla’ko kisaka kyaba kya kulonga kifundwa kya kisaka nansha kya kulombela milombelo pamo. Twitūdilei mikalo ku kitatyi kyotutalanga televijo nansha kyotwingidijanga kompyuta. Tusumininwei kutanwa ku kupwila konso kwa pa kipwilo ne kwikutūla kumeso kwa bintu byonso. Teakanya’ko kitatyi kya kusapula na kisaka kyonso pamo yenga ne yenga.
5 Na bubine, wivwane tutangidije bintu bya mvubu mikatampe kumeso mu būmi bwetu, tukamwena’mo nsangaji mikatampe.