Yehova Upānanga Bukomo Butabukile Pa Bwikalwanga Nabo Nyeke
1 Bana-babwanga ba Yesu bonso i bapebwe madyese malēme a kwingila mwingilo ukola: ke mwingilo wa bwine Kidishitu kadi. (Mat. 24:14; 28:19, 20) Ino, pa mwanda wa kubulwa kubwaninina kwa bu muntu ne bikambija bitukunkubete mu ino ngikadilo ya bintu, dimodimo tukokeja kwimona bu ketubwanyapo.
2 Ekale shi kino kibetufikila, tukokeja kukankamikwa na mukanda wātuminwe na mutumibwa Polo kudi bene Kidishitu bashingwe-māni ba mu Kodinda. Wāsonekele’mba: “Tudi ne kyabuleme kino monka mu bintu bibumbe bya dīma.” (2 Kod. 4:7) Polo wādi musumininwe amba: “Byo tudi ne buno bwingidi, . . . ketupungilapo, ehe.” (2 Kod. 4:1) Tuyukei amba kekudipo muntu nansha umo, shi mushingwe-māni, shi wa mu “mikōko mikwabo,” ukokeja kunena’mba ami kusapula nyeke myanda miyampe ‘pampikwa kupungila’ kumpēlelanga. Tusakanga Leza etupe bukomo, ‘bukomo butabukile pa bwikalwanga nabo nyeke.’—Yoano 10:16; 2 Kod. 4:7b.
3 I kintu kikankamika bininge pa kumona’mba, nansha byokudi lwana lwa malwa, misongo mikomokomo ne bufudile mu myanda itala lupeto, Batumoni bavule i basapudi bapyasakane. Batwe bonso tufwaninwe kuyuka’mba mwingilo wetu wa busapudi ukwatakanibwanga na Yehova. Nanshi, ketukilekai mpungiji ya mutyima nansha malangalanga bizōzeje kusumininwa kwetu, ino “[tu]kankaman[e]i mudi Mfumwetu monka mu bukomo bwandi bukatakata.”—Ef. 6:10, MB; Nk. 24:10.
4 Muswelo wa Kutambula Bukomo bwa Leza: Tulombelei Leza na kininga, kumulomba bukwashi bwandi ne bukomo bwandi. (Loma 12:12; Fid. 4:6, 7) Kupwa, tutūlei kikulupiji kyetu kyonso mudi Yehova, na mutyima wetu onso, mwanda tuyukile amba uketupa bukomo butabukile pa bwikalwanga nabo nyeke. (Nk. 3:5) Tutangei nsekununi ya būmi bwa banabetu idi mu mapepala; i bine, iletanga bukamoni bulombola’mba Yehova ukwashanga bengidi bandi banekenye matompo. Twinangilei nyeke na batutu ne bakaka ba pa kipwilo, kadi ketwakilekai kutanwa ku kupwila.—Loma 1:11, 12; Bah. 10:24, 25.
5 Tulongei buninge bwetu bonso tufikile pa kutambula bukomo bwa Yehova, bukomo butabukile pa bwikalwanga nabo nyeke buketukwasha tuleke kuzobolola mwingilo mwinemwine wa kusapula Bulopwe.