‘Bakumbanye Byonso Mwanda Wa Mwingilo Onso Muyampe’
1 Dyalelo bantu ba Yehova badishibwanga bidibwa bya kumushipiditu bilumbuluke kadi bivule. (Is. 25:6) Tudi na myanda mulwi imanine pa Bible ya kubandaula mu kifundwa kya pa kasuku ne kya kisaka, ku kupwila kwa pa kipwilo ne ku bitango. Lelo tumwenanga’mo kamweno kakatampe ne kwitungila kitungo kya kwikala ‘bakumbanye byonso mwanda wa mwingilo onso muyampe’?—2 Tem. 3:17.
2 Tulangulukei bidi pa bidibwa bya kumushipiditu bya mu mwaka wa 1998, byoketudi batyimbakane’mo pa bukata! Ku kupwila kwa pa kipwilo kulongwa yenga ne yenga, tusokolanga’ko bityebitye myanda mikatampe idi mu mikanda 23 ya Bisonekwa bya Kingidiki bya bwine Kidishitu, tulangulukanga pa būmi bwa bantu 49 basekunwinwe mu Bible kupityila ku myanda itulombola dibuku Auxiliaire pour une meilleure intelligence de la Bible kadi tubandaulanga mapaje 138 a dibuku Mashaidi wa Yehova. Kadi tufundanga kimo kya mu bipindi bisatu bya dibuku Buyuki, ne kisengele dibuku Būmi Bwansangaji mu Kisaka dyonso, ne dibuku Neno la Mungu dyonso dituntulu. Kekwapwile, kudi ne manimelo 12 ya Mwingilo Wetu wa Bulopwe, bishinte 52 bya Kiteba kya Mulami ne bishinte bya bantu bonso nabyo bivule monka, bisambila pa myanda mishileshile imanine pa Bible ne itudisha. Ku bino byonso kutentekelwa ne mpangiko ya bitango. Bine i bupeta bwa kumushipiditu bwa ntanda ne miseke!
3 Twikalei na Mutyima wa Kufwija’ko Pangala pa Mpangiko Itukwatyila Yehova: Pa kunena’mba tumwene’mo, tufwaninwe kwivwanija bidi buluji bwitupela Yehova bidibwa bivule uno muswelo. Kudya nyeke bino bintu bilumbuluke, kūbakanga lwitabijo lwetu ne kuningisha kipwano kyotupwene nandi. (1 Tem. 4:6) Inoko bidibwa bya kumushipiditu kebitupelwangapo mwanda wa kwitufundija kete, mhm. Bitutononanga tuyukije bakwabo bubinebine ne kwitukumbanya twikale bengidi babwino ba myanda miyampe.—2 Tem. 4:5.
4 Ketukizobololai nansha dimo bisakibwa byetu bya kumushipiditu, ino twikalei nyeke na kyaka kikatampe kya kusaka kudya bidibwa bivulevule bya kumushipiditu bitūlwa ku meza a Yehova, kadi byotutondwa. (Mat. 5:3; 1 Pet. 2:2) Shi tusaka kumwena’mo, i biyampe kwitūdila’ko kitatyi kya kufunda, senene kadi nyeke, kifundwa kya Bible pa kasuku nansha mu kisaka, ne kutanwa ku kupwila. (Ef. 5:15, 16) Byabuyabuya bikalupuka’ko bikakwatañana na kukankamikwa kwākankamikilwe bene Kidishitu Bahebelu na Polo, kutanwa mu Bahebelu 13:20, 21.