‘Badishibwe Binenwa bya Lwitabijo’
1 Kulondalonda būmi bwa bwine Leza kulomba kwielela’ko na bukomo. (1 Tem. 4:7-10) Shi tulonda buno būmi na bukomo bwetu kete, ketukejepo kukoka ne kukukala. (Is. 40:29-31) Ino muswelo umo wa kumona bukomo butamba kudi Leza i kwikala ‘badishibwe binenwa bya lwitabijo.’—1 Tem. 4:6.
2 Bidibwa bya ku Mushipiditu Binune: Yehova, mu Kinenwa kyandi ne kupityila kudi “umpika wa binebine, udi na manwa,” witudishanga bidibwa bya ku mushipiditu binune. (Mat. 24:45) Le netu tudyanga’byo amba tumwene’mo? Lelo tutañanga Bible difuku ne difuku? Le twitūdile’ko kitatyi kya kwifunda pa kasuku ne kya kulanguluka’po? (Mit. 1:2, 3) Mudīlo muyampe wa ku mushipiditu wa uno muswelo o uleta bukomo ne kwitukinga ku mpungiji itamba ku ntanda ya Satana. (1 Yoa. 5:19) Shi tuyuje mu ñeni yetu bintu bilumbuluke ne kwibilonda mu būmi bwetu, Yehova ukekala netu.—Fid. 4:8, 9.
3 Kadi Yehova witukomejanga kupityila ku kupwila kwa pa kipwilo. (Bah. 10:24, 25) Bufundiji bwa ku mushipiditu ne kisense kiyampe kidi ku kuno kubungakana bituningishanga ne kwitwimanija mu matompo. (1 Pet. 5:9, 10) Nsongwakaji umo mwine Kidishitu wanene amba: “Ñendanga dyuba dyonso ku masomo, ne kino kimpungijanga. Ino kupwila ako kudi pamo bwa kyumbu kya mema mu ntanda myūmu, mwanda kuntūkijanga mutyima mwa kulwila na difuku dilonda’ko ku masomo.” Bine tweselwanga pangala pa bukomo botulonga bwa kukatanwa ku kupwila!
4 Kusapula Bubinebine: Kusapwila bantu kwādi pamo bu bidibwa kudi Yesu. Kwādi kumukomeja. (Yoa. 4:32-34) Netu mo monka, kitatyi kyotusapwila bakwetu milao ya kutendelwa ilaile Leza, twivwananga bukomo. Kadi kuputumina mu mwingilo kulamanga mityima ne ñeni yetu yotutele pa Bulopwe ne pa madyese obukaleta. Na bubine kwitutūkijanga mityima.—Mat. 11:28-30.
5 Bine ne bine ponka, twi badyese pa kumwena mu bidibwa bya ku mushipiditu binune bipāna Yehova ku bantu bandi dyalelo! Nanshi twendelelei kwimba ne tusepo mitendelo yandi.—Is. 65:13, 14.