“Upana Bukomokomo Kudi wa Mpungiji”
1 Batwe bonso tukōkanga kitatyi ne kitatyi. Bukōke kebutambepo enkapo ku twaji nansha ku mingilo mikwabo ya ngitu, ino kadi butambanga ne ku bikoleja byotutanwa nabyo mu ino “myaka ya malwa.” (2 Tem. 3:1) Byotudi bengidi ba Yehova, le i muswelo’ka otukokeja kumona bukomo bwa ku mushipiditu bwitusakilwa kutyina’mba twakazoza mu mwingilo wetu? I na kukulupila mudi yewa mwine wa “bukomokomo,” ke Yehova kadi. (Is. 40:26) Aye uyukile senene byotubudilwe kadi udi na mutyima wa kwitukwasha.—1 Pet. 5:7.
2 Mpangiko ya Yehova: Yehova witukomejanga kupityila ku mushipiditu sandu wandi, bukomo bumo bonka bwa wāingidije pa kupanga diulu ne ntanda. Mushipiditu wa Leza witukwashanga ‘tusangule bukomo’ bwetu shi tubakōka. (Is. 40:31) Wiipangule bidi amba, ‘I dya bunga dyonefudile’ko kulomba mushipiditu sandu unkomeje mbwanye biselwa bya Bwine Kidishitu?’—Luka 11:11-13.
3 Shi tutanga ne kulanguluka difuku ne difuku pa Kinenwa kya Leza kya ku bukomo bwa mushipiditu ne kudishibwa ku mushipiditu kupityila ku kifundwa kya kitatyi ne kitatyi kya mabuku a Bwine Kidishitu, nabya tukekala pamo bwa “mutyi mukunwe pa tunonga twa mema, wakupa bipa byao pa mwaka wao, ne dyani dyao kufumba mpika.”—Mit. 1:2, 3.
4 Yehova wingidijanga kadi ne banabetu mu lwitabijo, babwanya kwikala ‘bakwitukomeja pa mutyima.’ (Kol. 4:10, 11) Betukankamikanga ku kupwila kupityila ku mīsambo yabo ikankamika, malondololo, ne mashikulu. (Bil. 15:32) Bakulumpe Bene Kidishitu baletanga bukwashi bwa ku mushipiditu ne kwitutūkija mutyima.—Is. 32:1, 2.
5 Mwingilo: Shi ubemone amba ubakōka, kokaleka’byo kusapula! Nansha byotudi na twaji tukwabo tuvule, kutambila mu mwingilo kitatyi ne kitatyi kwitutūkijanga mityima binebine. (Mat. 11:28-30) Kusapula myanda miyampe kwitukwashanga tute mityima yetu ku Bulopwe bwa Leza ne kulama mu ñeni yetu milao yandi ya kutendelwa.
6 Kukidi bivule bya kulonga kumeso kwa ino ngikadilo ya bintu konakanibwa. Tudi na nsambu mivule ya kushadila bemanije mu mwingilo wetu, mwanda wimanine pa “bukomo bwa kupebwa na Leza.” (1 Pet. 4:11) Bine, na bukwashi bwa Yehova, ketukabulwepo kuvuija mwingilo wetu, mwanda aye “upana bukomokomo kudi wa mpungiji.”—Is. 40:29.