Nsakanga Kifundwa Kya Bible!
1 Bavule muno motudi babilanga kwendeja kifundwa kya Bible, i bine badi na bubinga. Kwendeja bifundwa bya Bible ko kotufikijanga nako kitungo kya kulonga bana-babwanga. (Mat. 28:19, 20) Ino bavule umbukata mwetu ke balāle myeji, pakwabo myaka, pampikwa kutompa ku nsangaji ya pa bula itambanga ku kufundija muntu bubinebine. Shi ke pano, i kika kyotukalonga mu uno Kweji wa Dikumi ne Kamo? Byotupāna dibuku Buyuki uno kweji, tufwaninwe kulonga bukomo bwabinebine tushilule nadyo bifundwa bya Bible.
2 Witūdile’ko Mfulo ya Yenga Umo Nansha ya Mayenga Mavule: Tukankamika umo ne umo etūdile’ko kitatyi kampanda kya kukimba kifundwa kya Bible mu uno kweji. Bendeji ba Kifundwa kya Kitabo kya pa Kipwilo bakatonga difuku dimo nansha mafuku mavule ku mfulo kwa yenga a kuputumina mu uno mwingilo, kupwa bakakwata’ko mpangiko mu bisumpi byabo ya kwipāna bininge mu kulonga kujokelamo kupya.
3 Ponso poenda ku kupwila kwa kutambila mu busapudi, paika papye olembanga’po kujokelamo kupya. Ebiya kapempule boba bonso balombwele kusepelela, baselele mabuku, ne baile ku kupwila. Ponso popempula muntu kampanda, ikala na kitungo kya kushilula nandi kifundwa.
4 Longai Kyakumwenako kya Kifundwa kya Bible: Shi kemupwila kupwila kwa kwenda mu busapudi kwimanine pa uno mwingilo, longai ne kyakumwenako kiteakanibwe biyampe, kilombola mwa kushilwila kifundwa mu kujokelamo kupya. Ukokeja kunena’mba: “Bantu bavule badi shabo na Bible, ino kebayukilepo amba uletanga malondololo ku bipangujo bya mvubu byotwiipangulanga umbūmi. [Lombola kifunka mu dibuku Buyuki, tanga mutwe wa mwanda wa shapita 3, 5, 6, 8, ne 9.] Shi twifunde dino dibuku, kintu kya nsaa imo ku yenga ne yenga, ukekala na buyuki bwa Bible bwa kyalwilo mu myeji mityetye yonka. Shi usaka, tonga’po mutwe wa mwanda umo ukusangaja, nami nkulombole mwifundilwanga.” Ino shi muntu wekaka kwifunda mwanda wa mingilo imuvudile, nabya mushintulwile amba twikalanga ne na bwifundi bwa mu kīpi. Mulombole mukanda Kisaka Leza, munene mushilule kwifunda nandi mu kīpi kifundwa kimo ku yenga mu minite 15 ku 30.
5 Shi batwe bonso tulonge bukomo bwa kushilula bifundwa, ne shi tulombe Yehova esele kininga kyetu, ketukabulwepo kutana bifundwa! (1 Yoa. 5:14, 15) Bine, shi usakanga kifundwa kya Bible kya kwendeja, pano po pakwendeja’ko kimo!