Tutandikei Mpangiko Kumeso kwa Kitatyi!

¹ Bulongolodi bwa Yehova butūdile’ko mpangiko ya mingilo ya kiteokratike mwanda wa kuvuija bisakibwa byetu bya kumushipiditu. Mutyima wetu wa kufwija’ko witutononanga tumwene kamweno kakatampe mu bintu byonso biteakanibwa, kifwa bupempudi bwa mutadi wendakana, kubungakana ne bitango, ne mpangiko mikwabo ya pa bula ikwatwa pa kipwilo. (Mat. 5:⁠3) Ino banabetu bamobamo babulwanga kumwena biyampe mu mpangiko mivule ya kumushipiditu, balēmeka’ko mpangiko yobetūdile’ko abo bene. Lelo tukalonga namani mwa kwepukila uno mulongelo? Le i bika byotukalonga kutyina’mba mingilo ya bwine ntanda yakatādila ‘bintu bya mvubu mikatampe’?​—⁠Fid. 1:⁠10.

² Kutandika Bintu na Tunangu Kudi na Kamweno: Nkindi 21:5 usoñanya’mba: “Mifwatakanyo ya muntu mupyasakane itwala enka ku bungibungi: Ino enselele wakampeja-bukidi wenda enka ku bufudile.” Pa kutana “bungibungi” bwa kumushipiditu, kitulomba kutandika bintu senene kumeso kwa kitatyi, koku tulamine mu ñeni mpangiko ya mingilo ya kiteokratike. Tufwaninwe kutūla mpangiko ya mingilo ya batwe bene mu kitatyi kyokeiketukankajapo kutambula byabuyabuya bya kumushipiditu. Ekale tudi na kampeja-bukidi ka kutandikila mpangiko ya kulonga bintu bitutala batwe bene, pakubulwa kuta mutyima ku bintu bikatampe bya kiteokratike bīya kumeso, nankyo yuka’mba tukekala mu “bufudile” bwa kumushipiditu.

³ Ketwakisuminwai! Batwe bonso tutandikanga mpangiko ya byotukalonga mu mafuku a kumeso, kifwa kwenda konje, kukasunga, kukapempula bambutwile, ne mikwabo. Ino kumeso kwa kukwata kya mfulo nansha kutandika mpangiko yobe, tala bidi mpangiko ya mingilo ya kumushipiditu ikengilwa kumeso. Shi ubamone amba mutadi wa kipindi usa kwiya kwimupempula nansha shi kubungakana kampanda kukekala mu kitatyi kyosaka kwenda, nabya longa buninge ulongolole myanda dipya senene mwa kumwena biyampe mu ino mpangiko. Myanda mikatampe ikalongwa kumeso ikalanga nyeke itulombolwa kumeso kwa kitatyi. Pakwabo kadi, bakulumpe ba pa kyenu kipwilo bakokeja kukulombola mpangiko kampanda ya pa kyenu kipwilo yobakwete.

⁴ Wivwane tutandike mpangiko yetu na kutala bintu bya mvubu mikatampe, nabya ‘tukayulwa bipa bya boloke . . . bya kupeja Leza ntumbo ne mitendelo.’​—⁠Fid. 1:⁠11.