Mpangiko mipya ya kubungakana kwa pa bula kwa difuku dimo
Mpangiko ya kubungakana kwa pa bula kwa difuku dimo ikashilula mu Kweji 9, 1999 idi na mutwe wa mwanda unena’mba: “Tukimbei mu Bintu bya mu Nkulwe bya Leza.” (1 Kod. 2:10) Lelo i bintu’ka bya kamweno byotukafunda’ko?
Bantu bavule bakimbakimbanga buyuki, ino buyuki bobatana kwibatondwa mpika. Bible aye witukankamikanga, pamo na motukekivwanina mu mwisambo wa mutadi wa kipindi unena’mba “Kukimba mu Kinenwa kya Leza Kufukatyijanga Mityima.” Muneni mupempudi ukalombola kukwatañana kukwatañene kubandaula mu bintu bya mu nkulwe bya Leza na busapudi bwa myanda miyampe pa kulondolola kipangujo kinena’mba “Lelo Umwene Namani Busapudi bwa Bulopwe?”
Lelo bambutwile nabo bakokeja kukwasha namani babo bana bakole mu nkulwe milampe ya Kinenwa kya Leza? Kudi madingi mayampe akaletwa mu kipindi kinena’mba “Komenejai Kinenwa kya Leza mu Benu Bana.” Bene Kidishitu bankasampe bālamunwanga mu muswelo muyampe na kisense kya na banabetu bapye kumushipiditu ba mu kipwilo. Bifwa bilombola mobālamwinwa na kino kisense bikaletwa mu kipindi kinena’mba “Bankasampe Baboila Ñeni ku Batame.”
Yehova i Musokodi wa bifibwe. Ino mwanda waka tufwaninwe kukimba na kininga bupeta bwa kumushipiditu bukidi bufyame mu kino kitatyi? Muneni mupempudi ukashintulula bintu byāsokwele Yehova pa kala ne byakitusokwela dyalelo, mu kishinte kinena’mba “Yehova Witusokwelanga Bityebitye Bintu bya mu Nkulwe.” Kino kikaningisha kusumininwa kotusumininwe ‘kukimba mu bintu bya mu nkulwe bya Leza.’
Kwata kala mpangiko ya kukatanwa’ko. Boba bonso basaka kukalombola na kubatyijibwa kwipāna kobepene kudi Yehova, bafwaninwe kwalwila’ko kulombola mutadi mwimaniji. Mutyima wetu umo otwipēne nao mu kukola mu Kinenwa kya Leza ukaningijibwa na myanda yotukevwana’ko. Kokolwa kubulwa buno bufundiji bwa kumushipiditu!