Twiulei kubulwa kusañuna kwa Yehova
1 Yehova utele bantu bonso mutyima. Kasañunangapo amba yeu ye yeu, ehe, witabijanga muntu ye-yense ulonga kiswa-mutyima kyandi. (Bil. 10:34, 35) Ne Yesu nandi mo monka, kitatyi kyaādi usapwila bantu, kādipo usañuna amba yeu ye yeu. (Luka 20:21) Tufwaninwe netu kwiula kifwa kyabo, pamo na mwāiwidile’kyo Polo, wāsonekele amba: “Mfumwabo i umo enka, Mfumwandya bonso, muvudilwe bintu wa bonso bakumwita.”—Loma 10:12.
2 Kusapula myanda miyampe ya Bulopwe bwa Leza ku bonso botwitana nabo kuletelanga Leza ntumbo. Twendelelei na kusapwila bakwetu uno musapu mupite kunengela, pakubulwa kusañuna amba i ba musaka kampanda, i ba kitenta kansangwa, bafundile masomo kamukaya, nansha amba i ba misokwe kañana. (Loma 10:11-13) Ko kunena amba tufwaninwe kusapwila boba bateleka—bana-balume, bana-bakaji, bankasampe ne banunu. Tufwaninwe kufika ku kibelo ne kibelo mwa kupela kisaka ne kisaka mukenga wa kuteleka bubinebine.
3 Ta mutyima ku umo ne umo: Kitungo kyetu i kufikila muntu ye-yense shi bibwanika. Basapudi bamo, badi kala na kino kitungo mu mityima yabo, basapulanga biyampe mpata mu mabilo a badokitele, mu mpitalo, mu mobo mupēlwanga balanda bidibwa, mu mabilo a bukwashi, mu bifuko bya kulekeja bantu bitomibwa bikolwañana, mu mabilo a balungu, ne mu bifuko bya bampulushi. Kadi bano basapudi basapwilanga ne boba bemanine madilo a bafwa, batadi ba masomo ne bengidi nabo, ne bazuji. Kyaba kifikwa ku balungu i kiyampe kwibatendela pa mingilo ya bukwashi yobalongela bantu. Mwisambei nabo na bulēme, utonga ne mitwe ya myanda ilupwilwe panopano ikwatañene na yabo mingilo ne makambakano ayo.
4 Difuku dimo, kaka umo waendele kukesamba na zuji mu yandi bilo. Kupwa’tu kwa ino mīsambo miloe, zuji’o wamusabila mwanda, amba: “Le uyukile kyonsanshilwe Batumoni ba Yehova? I mwanda abo badi na milangwe miluji yobalondanga pakubulwa kwiisasuka.” Enka namino, bukamoni bulumbuluke bwapānwa kudi uno mfumu.
5 Ketubwanyapo kuyuka bintu bidi mu mityima ya bantu. Ino wivwane twisambe na muntu ye-yense otwitana nandi, nankyo tubalombola lwitabijo lwetu mudi Leza mwinē lupusa luludika mwingilo wetu. Kadi, dino i dyese kobadi dya nabo kuteleka ne kwitaba ku uno musapu wa lukulupilo. (1 Tem. 2:3, 4) Nanshi twingidijei kitatyi kyetu na tunangu, koku tulonga bukomo bwa kwiula kubulwa kusañuna amba yeu ye yeu kwa Yehova na kufikila bantu bonso na myanda miyampe.—Loma 2:11; Ef. 5:1, 2.