Lelo Udi na Bumvu?
1 Kumona mwana nkasampe wiinyainya munyuma mwa inandi nansha mwa shandi ke kintupo kya kutulumuka. Bumvu i kintu kikalanga na muntu yense ku bwanuke. Nansha ke ku bukulumpe kwine, bamo bashalanga na kabumvu ka kibutwila. Shi nobe bumvu bukukwatanga mu mwingilo wa busapudi, ukalonga’po namani?
2 Mwa Kupwila Bumvu: Kya mvubu nakampata i kuta mutyima ku “muntu mufyame udi munda.” (1 Pet. 3:4) Loeja buswe bobe boswele Yehova ne bantu nobe. Yuka amba kwingila mwingilo wa busapudi kufikija’o ne pa mfulo o muswelo wa kulombola buswe bwa kwipānina bakwenu mutabuke kunengela. Ikala nyeke na kibidiji kiyampe kya kifundwa kya kasuku ne kutanwa ku kupwila. Lombela kitatyi kyonso, utela bintu bipotoloke mu kobe kwabija Yehova. Lwitabijo lukomo ne kwiubija mudi aye bikashimatyija kikulupiji kyobe, kadi bikakupa bukomo mpata bwa “kuningija na kusapula mwanda wa Leza, ne moyo mwine mpika.”—Fid. 1:14.
3 Lwa na milangwe ya kwityepelwa. Bimweka bu Temote wādi ulwa nayo. Mwanda Polo wāmukankamikile amba “kekukēkala muntu wakakufutulula’mba, wi mwanuke,” wāmuvuluja amba “Leza ketupelepo mutyima wa nzuzu, mhm; i wa bukomo.” (1 Tem. 4:12; 2 Tem. 1:7) Yehova wāingidije Temote bininge byabwanya kukwingidija ne abe nobe shi ubaendelela kumeso na kikulupiji kyonso mudi Aye.—Mit. 56:11.
4 Kulanguluka pa kisonekwa kya mu Bible, kifwa Mateo 10:37, kwakweshe kaka umo wadi na butalale bubi bwamufikije ne ku kutyina wandi mulume wadi umulondalonda. Ino mu kwielela’ko kwandi, mwingilo waikala keumupēlela mpata, mwenda mafuku, wandi mulume, inandi ne banababo, abo bonso baitabija bubinebine!
5 Kwiteakanya Kudi na Mvubu: Kuninga kwa kikulupiji kya muntu i kwiteakanya byabinebine kumeso kwa kutambila mu mwingilo. Tonga’ko musapwilo umo upēla mu dibuku Comment raisonner nansha mu manimelo a Mwingilo Wetu wa Bulopwe, kwata’o pa mutwe, kupwa pituluka’mo. Pa kyaba kya kushilula kuzumbija mutyima bitupu, abe langa biyampe. Mwena bukankamane mu kwingidila pamo na bakwenu. Yuka amba bantu bavule bokatana ku mobo nabo badi na bumvu’nka bwa bobe. Muntu ye-yense ufwaninwe kusapwilwa musapu wa Bulopwe.
6 Shi udi na bumvu, kokapungila. Abe wielele’ko’nka nankyo, Yehova ukakukwasha wikale musapudi wa myanda miyampe ulupula bipa. Nabya ne nsangaji mu mwingilo ukekala nayo.—Nk. 10:22.