Tumbija Yehova na Mingilo Milumbuluke

¹ Shi ubatanwa na kimpumpu kikomo, amba utale mpakala mwa kufyama, bine i biyampe mpata! Shi mu mpakala’mwa mudi kakyanga senene, muyampe shē, ne shi bantu badi’mo i bantu ba kizaji, bine usa kusangela kushikata’mo. Ne mwingilo wa kusapula Bulopwe nao mo monka, uludikilanga bantu ku mpakala ya uno muswelo, banyema ngikadilo ya Satana. Lelo mwiendelejo wetu wa difuku ne difuku ukokeja kukwasha bantu nabo bamone muneñanine kino kinyemeno? Eyo bikokejika, mwanda Yesu wānene amba bantu ‘bakamona mingilo yenu miyampe, nabo bakatumbije Shenu wa mūlu.’​—⁠Mat. 5:⁠16.

² Lelo tukokeja kwiendeja namani nabya mingilo yetu ikokele bakwabo kudi Yehova ne ku bulongolodi bwandi? I na kuleka binenwa bya Yesu bidi mu Luka 6:31 ne 10:27 bisendulule būmi bwetu difuku ne difuku. Kino kiketutonona tute bantu netu mutyima na buswe, kadi kiketushiyañanya na ino ntanda yambulwa kizaji isūdile bantu.

³ Kaka umo wadi ukende ku kyombo, wamona nsongwakaji umo mukomenwe kukwata mwanandi wa ku kyadi mwanda wa lukebekebe. Kaka wamulomba amba mpe mwana’o nkukwatyile’ye. Nsongwakaji wamunena amba le nkufwija’ko na bika, kaka wamulondolola’mba: ‘Nakulombe ukateje Batumoni ba Yehova shi abaiya kobe.’ Uno lolo nandi walongela monka, pano aye ne mulumyandi ke Batumoni. Mingilo milumbuluke yo yaikele kusonshila muswelo obaitabile ku musapu wa Bulopwe.

⁴ I Mwanda Utala Būmi Bwetu Bonso: Mwiendelejo wetu na bekalwa nabo, ku kaji nansha ku masomo, ne mu bitatyi bya kwipwija mukose upanga bakwetu mumweno kampanda potudi ne pa mutōtelo wetu. O mwanda tufwaninwe kwiipangula’mba: ‘Le bantu betutala betumwene namani, ami ne kisaka kyami? Lelo balondakani bamwene amba njibo ne lupango lwetu bitōka kadi bikwatakanibwe senene? Le botwingila nabo ne botufundanga nabo betumwene bu bantu bafikanga pa kitatyi, bengila na kininga? Lelo bamonanga mumwekelo wetu bu mufikile kadi wa bulēmantu?’ Mingilo yetu milumbuluke ikamwekeja mutōtelo wa Yehova bu kintu kikoka bantu bininge.

⁵ Petelo wādyumwine amba bene Kidishitu kebakabulwepo kufutululwa. (1 Pet. 4:⁠4) Nanshi tufwaninwe kwita mityima mpata, kutyina’mba mwiendelejo wetu wakalengeja lubabo lwa kwitunenena bibibibi. (1 Pet. 2:12) Shi mingilo yetu ya difuku ne difuku itumbijanga Leza otutōta, nankyo tubaikala pamo bwa malampi mapudikwe palampe, alombola bakwetu mpakala miyampe shē yobetupele kudi Yehova.​—⁠Mat. 5:​14-16.