Yehova Upānanga Bukomo
1 Lelo bilongwa bya mutumibwa Polo nenu bimupanga mulangwe’ka? Kyaba kyotutanga mukanda wa Bilongwa, tutendelanga mpata muswelo waādi ukankamene mu mwingilo wa Yehova. Le Polo wābwenye namani bino byonso byaādi ulonga? Wānene amba: “Ne mukomo wa kulonga bintu byonso mudi aye wakunkomeja.” (Fid. 4:13) Netu tukokeja kumwena ku buno bukomo bupāna Yehova. Namani? I na kukwatakanya mpangiko isamba itutūdile’ko Yehova mwanda wa kwitupa bukomo ne kwitukankamika ku mushipiditu.
2 Kinenwa kya Leza: Monka motudilanga byakudya mwa kwikadila nyeke na bukomo ku ngitu, mo monka motufwaninwe ne kudila bidibwa bya Kinenwa kya Leza mwa kwikadila bōmi nyeke ku mushipiditu. (Mat. 4:4) Bible witupanga bukomo bwa kwitukwatakanya. Pa kulama bupyasakane bwetu ne buzanzamuke bwetu bwa kulonda bubinebine, tufwaninwe kwipāna mpata mu kwifunda kwa kasuku ne mu kulanguluka, difuku ne difuku shi bibwanika.—Mit. 1:2, 3.
3 Milombelo: Kufwena Yehova mu milombelo kudi na mvubu mpata, nakampata mu kyaba kyotufikilwa na bintu bitumija umeso. Yehova, kupityila ku mushipiditu wandi, upānanga bukomo ku boba bamulomba’bo mu milombelo. (Luka 11:13; Ef. 3:16) Bisonekwa bitukankamikanga ‘kwipāna mu milombelo.’ (Loma 12:12) Le ye molongelanga?
4 Kipwilo: Kadi tumwenanga bukomo ne bukankamane mu kupwila kwa pa kipwilo ne mu kisense kya kyanga kyotwikalanga nakyo na batutu ne bakaka. (Bah. 10:24, 25) Shi tubakolejibwa, abo betukankamikanga ne kwitukwasha na buswe.—Nk. 17:17; Mus. 4:10.
5 Mwingilo wa Budimi: Kutambila kitatyi ne kitatyi mu mwingilo kwitukwashanga tubambile meso etu pa Bulopwe ne pa madyese obukaleta. Mityima yetu iloelelwanga kitatyi kyotukwashanga bakwetu nabo bayuke myanda ya Yehova. (Bil. 20:35) Eyo, ke batwe bonsopo babwanya kutaluka kukengidila kokwa kusakibwa bengidi bavule nansha kwingila mwingilo wa kitatyi kyonso, inoko tukokeja kwela’ko kuboko byabinebine mu miswelo kampanda.—Bah. 6:10-12.
6 Batadi Bene Kidishitu: Tumwenanga kamweno mu kukankamika kwitukankamikanga bakulumpe ne bukwashi bobetukwashanga. Yehova i mwibape mwingilo wa kukumba luombe lwandi lobapelwe kulela. (1 Pet. 5:2) Batadi bendakana bobakanga banabetu mu bipwilo byobapempula, mwādi mwibobakila Polo mu myaka yabo’ya.—Loma 1:11, 12.
7 Bifwa bya Banabetu ba Kikōkeji: Kubandaula bifwa bya bengidi netu ba kikōkeji ba pa kala ne ba mu ino yetu myaka kwitukankamikanga. (Bah. 12:1) Shi usaka kukankamikwa, mwene i kiyampe kutanga mānga ya būmi bwa banabetu itanwa mu etu mapepala, ne malapolo obaka adi mu Kitabu-Mwaka, nansha nsekununi isangaja ya mānga ya ino myaka ya Batumoni ba Yehova idi mu dibuku Prédicateurs?
8 Tutu umo, udi pano na myaka makumi kitema ne bya pangala, wāitabije bubinebine mu busongwalume. Aye ukidi nkasampe, matompo a mu lwitabijo lwandi nao āmutana. Dibajinji, bamo bādi mu kipwilo kyaādi’mo bābombokele mu bulongolodi bwa Yehova. Ebiya kadi matompo makwabo i mwingilo wa kusapula ku njibo ne njibo waādi umwene bu mukomo mpata. Inoko wādi ukulupile nyeke mudi Yehova. Kepāijije’po wāshilula kusangela kutambila mu mwingilo. Le dyalelo nadyo? Nansha byakaenda ukoka mu bidyoma, inoko ukidi umo wa mu kisaka kya Betele ya Brooklyn, wingila mu Kitango Kyendeji. Kealakanyangapo mwanda wa kulamata kwalamete ku bulongolodi bwa Yehova.
9 Kaka umo wa mu kisaka kya Betele ya Beletanye wābatyijibwe aye na myaka 13. Mwaka ulonda’po, wāshilula kusapula na tutu wandi, papita mwaka umo mukwabo, shabo wākutwa buloko pa mwanda wa kubulwa kwikuja mu bimyanda bya ntanda pa Divita II dya Ntanda. Uno kaka wādi ukulupile enka mudi Yehova, Leza wabine, wa kumupa bukomo, koku wendelela na kumwingidila. Kupwa, bamusonga kudi tutu umo wakikōkeji, abo bonso baendelela na kulonga kiswa-mutyima kya Yehova. Walāla myaka 35 mu kwisonga, kupwa mulumyandi wafwa lufu lwa mu kitulumukila. Kadi monka wamwena bukomo kudi Yehova, ne dyalelo dino ukyendelela na kumwingidila, ubambile enka kumeso kwakengidila Yehova nyeke ne nyeke mu kisaka kyandi kya pano panshi.
10 Yehova ukwashanga ne kukankamika bengidi bandi bakikōkeji. “Upana bukomokomo kudi wa mpungiji, ne kudi yewa wampikwa bunkanka ulundako bukomo.” Netu tukokeja kutapula mu ino nsulo ya bukomo bwakubulwa mpwilo na kulonda mpangiko yonso isamba itelelwe kungala’i. Vuluka’mba: “Boba bakungila Yehova bakansangula bukomo bwabo; . . . bakanyema, ne kukōkapo kwine mpika; bakananga, ne kupungilapo kwine mpikila.” (Is. 40:29-31) Polo wādi wiubije mpata mudi Yehova wa kumupa bukomo, netu tufwaninwe kulongela monka.